ගුරු විදුහල්පති වර්ජනයට ග්‍රාම නිලධාරී සංගමයත් එක් වෙයි – දින දෙකක දීප ව්‍යාප්ත වැඩ වර්ජනයක් !

ගුරු- විදුහල්පති වෘත්තීය සමිති අද (27) දිනයේ ද ලෙඩ නිවාඩු වාර්තා කරමින් දීපව්‍යාප්ත වැඩවර්ජනයක නිරතවීමට තීරණය කර තිබේ.

කොළඹ පැවති විරෝධතාවයට පොලීසිය එල්ල කළ කඳුළු ගෑස් සහ ජල ප්‍රහාරයට විරෝධය පළ කරමින් ගුරු – විදුහල්පති වෘත්තීය සමිති මෙලෙස වැඩවර්ජනයක නිරත වීමට තීරණය කර ඇති බව වාර්තා වුණි.

අසනීප නිවාඩු වාර්තා කරමින් ඊයේ (26) දිනයේත් ගුරු – විදුහල්පති වෘත්තීය සමිත වැඩවර්ජනයක නිරත වු අතර මේ හේතුවෙන් දිවයිනේ බොහෝ පාසල්වල අධ්‍යයන කටයුතු ඇණහිට තිබිණි.

පාසල් රැසක ළමුන්ගේ පැමිණීම ද ඉතා අවම මට්ටමක පැවති අතර ඇතැම් පාසල්වලට පැමිණි සිසුන්ට පාසල්වලට ඇතුළුවීමට නොහැකි වීම හේතුවෙන් හැරී යාමට ද සිදුවු බව දැකගත හැකි විය.

කෙසේවෙතත් අද (27) දිනයේ දී සාමාන්‍ය පරිදි රජයේ සියලුම පාසල් පැවැත්වෙන බව අධ්‍යාපන අමාත්‍යංශය නිවේදනයක් නිකුත් කරමින් සඳහන් කළේය.

මේ අතර අද දිනයේ ආරම්භ කිරීමට සැලසුම් කර තිබු අධ්‍යයන පොදු සහතික පත්‍ර සාමාන්‍ය පෙළ විභාගයේ දෙවන අදියරේ ඇගයීම් කටයුතු නොවැළැක්විය හේතුවක් මත සිදුනොකරන බව විභාග කොමසාරිස් අමිත් ජයසුන්දර මහතා පවසයි.

ඒ අනුව දෙවන අදියරේ ඇගයීම් කටයුතු හෙට (28) දිනයේ සිට ආරම්භ කරන බව නිවේදනයක් නිකුත් කරමින් විභාග කොමසාරිස්වරයා දැනුම් දෙයි.

මේ අතර අද සහ හෙට යන දෙදින තුළ දීප ව්‍යාප්ත වැඩවර්ජනයක නිරත වන බව ශ්‍රී ලංකා එක්සත් ග්‍රාම නිලධාරීන්ගේ සංගමය පවසයි.

එහි සභාපති නන්දන රණසිංහ මහතා පවසන්නේ සිය ගැටලුවලට විසඳුම් ලැබෙනතුරු වෘත්තීය සමිති ක්‍රියාමාර්ග අඛණ්ඩව දියත් කෙරෙන බවය.

මේ අතර, රෙජිස්ට්‍රර් ජනරාල් දෙපාර්තමේන්තුවේ නිලධාරීන් ද අද සහ හෙට යන දෙදින තුළ වැඩවර්ජනයක නිරත වීමට තීරණය කර තිබේ.

ඒ අනුව ඉඩම් රෙජිස්ට්‍රාර්වරුන් සහ අතිරේක රෙජිස්ට්‍රාර්වරුන් දිවයින පුරා මෙම වැඩවර්ජනයේ නිරත වන බව රෙජිස්ට්‍රාර් සේවයේ නිලධාරීන්ගේ සංගමයේ සභාපති සමන් ජයවර්ධන මහතා සඳහන් කළේය.

කෙසේවෙතත් මේ මොහොතේ රට වෙනුවෙන් සියලුදෙනා වගකීමෙන් කටයුතු කළ යුතු බව ජනාධිපති වෘත්තීය සමිත අධ්‍යක්ෂ ජනරාල් සමන් රත්නප්‍රිය මහතා පැවසීය.