තරුෂිගේ ඔලිම්පික් සිහිනය බොඳ වීමේ අවධානමක් !

ශ්‍රී ලංකා මලල ක්‍රීඩා සංගමය විසින් සංවිධානය කරනු ලබන 102 වැනි ජාතික මලල ක්‍රීඩා ශූරතාවලියෙහි අවසන් දිනය වූ ඊයේ (27දා) දිනයේදීද අපේක්‍ෂිත දක්‍ෂතා අතරට ඒමට ක්‍රීඩක-ක්‍රීඩිකාවන් කිසිවකුට නොහැකි විය.

ඒ අනුව ඊයේ දිනයේදී බොහෝ දෙනකුගේ අවධානයට ලක්ව තිබූ මීටර් 800 කාන්තා අවසන් තරගයට එක්වූ තරුෂි කරුණාරත්න එම ඉසව්වේ පළමුවැනියා ලෙස තරගය අවසන් කළද පැරිස් ඔලිම්පික් කඩඉම අසලකටවත් ඒමට ඇයට අවකාශය නෙැලැබිණි. එහිදී ඇය එම ඉසව්ව වි.2.04.22කින් අවසන් කළද එම ඉසව්වේ මෙවර ඔලිම්පික් පරිසාධන මට්ටම වී තිබුණේ වි.1.59.30කි.

කෙසේ වෙතත් තරුෂි ඇතුළු ක්‍රීඩක-ක්‍රීඩිකාවන් වෙනුවෙන් මේ මස 30 වැනි දින කොළඹදී පැවැත්වෙන අවසන් තේරීම් තරගයට සහභාගි වී ඔලිම්පික් සුදුසුකම් සපුරා ගැනීමේ අවස්ථාවක් හිමිව ඇති අතර, එහිදීද එම කාලයන් තරණය කිරීමට කිසිවකුට අවකාශය නොලැබුණහොත් ‘වයිල්ඩ් කාඩ් (සහනදායී) ක්‍රමය යටතේ එක් ක්‍රීඩකයකුට හෝ ක්‍රීඩිකාවකට ඔලිම්පික් උළෙල නියෝජනය කිරීමේ අවස්ථාව හිමිව ඇතැයිද සඳහන්ය.

එසේම ඊයේ පැවැති පිරිමි මීටර් 100 ඉසව්වෙන් තත්. 10.44ක කාලයක් සටහන් කරමින් පළමුවැනියා බවට පත්වීමට ශ්‍රී ලංකා යුද හමුදාවේ වයි.සී.එම්. යෝධසිංහට අවකාශය සැලසිණි.

කෙසේ වෙතත් මෙම තරගාවලියේ මෙතෙක් වාර්තා වූ පළමු ශ්‍රී ලංකා වාර්තාවේ හිමිකාරිය බවට පත්වීමට එන්.දක්‍ෂිතා සමත්ව තිබිණි. ඒ අනුව රිටි පැනීමේ කාන්තා ඉසව්වට සහභාගි වූ ඇය එහිදී මීටර් 3.72ක දක්‍ෂතාවක් දක්වමින් 2022 වසරේදී සචිනි පෙරේරා විසින් තබා තිබූ මීටර් 3.65ක පසුගිය ශ්‍රී ලංකා වාර්තාව අකා මකා දැමීමට සමත්වූවාය.

මේ අතර ඊයේ මීටර් 200 පිරිමි ඉසව්වේ දෙවැනි තැන දිනූ ඉඳුසර විදූෂාන් තත්. 21.14ක කාලයක් සටහන් කරමින් නව කනිෂ්ට ජාතික වාර්තාවක් තැබූ අතර, ශ්‍රී ලංකා යුද හමුදාවේ ඒ.එස්.එම්.සෆාන් තත්.21.05ක කාලයක් සටහන් කරමින් එම ඉසව්වේ පළමුවැනියා බවට පත්විය.