ක්ලබ් වසන්ත ඝාතනයේ මාස 3ක සැලසුමේ අනාවරණය මෙන්න !

2019 වසරේදී පාතාල කල්ලි නායකයෙකු වූ මාකදුරේ මධූෂ්, කංජිපානි ඉම්රාන් ඇතුළු පිරිසක් ඩුබායිහීදී පොලිස් අත්අඩංගුවට පත්වීමේ සිද්ධියට ක්ලබ් වසන්ත ද සම්බන්ධ බවට මේ වන විට තොරතුරු අනාවරණ වී තිබෙනවා.මාකදුරේ මධූෂ් සතු රුපියල් කෝටි 100ක මුදලක් ද ක්ලබ් වසන්ත භාරයේ තිබූ බවටයි වාර්තා වුණේ.

එම මුදල් තමන්ට ලබාදෙන ලෙසට කංජිපානි ඉම්රාන් විසින් ක්ලබ් වසන්තට අවස්ථා කිහිපයකදී දැනුම් දී ඇති බවටද තොරතුරු වාර්තා වන නමුත් ක්ලබ් වසන්ත විසින් එම මුදල් ලබාදී නැහැ.

ඒ අනුව මීට මාස කිහිපයකට පෙරදී නුවරඑළිය ප්‍රදේශයේදී ක්ලබ් වසන්ත ඝාතනය කිරීමට සැලසුම් සකස් කළත් එය අසාර්ථක වී තිබෙනවා.එවැනි පසුබිමකදී ක්ලබ් වසන්ත අතුරුගිරිය ප්‍රදේශයේදී වෙඩි තබා ඝාතනය කිරීම මාස 03ක කාලයක සිට සැලසුම් කර ඇති බවයි පොලිස් විමර්ශනවලදී අනාවරණ වී ඇත්තේ.අදාළ ටැටූ ආයතනයේ හිමිකරු ද මෙම ඝාතන සිද්ධියට සම්බන්ධ බවටයි අනාවරණ වී තිබෙනවා. ඒ අනුව පොලිසිය විසින් ටැටූ ආයතනයේ හිමිකරුද අත්අඩංගුවට ගෙන තිබෙනවා.

බලපිටිය ප්‍රදේශයේ පදිංචි ඔහුට ටැටූ ගැසීම සඳහා හැකියාවක් තිබුණත් ඒ සඳහා ආයතනයක් පවත්වාගෙන යාමට තරම් මුදල් නොතිබූ බවයි වාර්තා වන්නේ.ඒ අනුව බලපිටිය ප්‍රදේශයේ පදිංචි ඔහුගේ මිතුරෙකු හරහා විදේශගත පුද්ගලයෙකු සමග සබඳතා පවත්වා තිබෙනවා.

එහිදී විදේශගත පුද්ගලයා ටැටූ ආයතනයක් ආරම්භ කිරීමට මුදල් ලබාදීමට එකඟතාවය පළකර ඇති අතර ඒ සඳහා ඔහු විසින් මුදල් ලබාදී ඇති බව පොලිස් විමර්ශනවලදී අනාවරණ වුණා. අදාළ ටැටූ ආයතනය විවෘත කිරීම සඳහා උත්සවයක් සංවිධාන කරන ලෙසත් ඊට ක්ලබ් වසන්ත ඇතුළු ප්‍රසිද්ධ පුද්ගලයන් කිහිප දෙනෙකු සම්බන්ධ කරගන්නා ලෙසත් විදේශගත පුද්ගලයා විසින් ටැටූ ආයතනයේ හිමිකරුට දැනුම් දී තිබෙනවා.

ඒ අනුව ඔහු විසින් සමාජ මාධ්‍ය හරහා ක්ලබ් වසන්තට එම විවෘත කිරීමේ අවස්ථාවට පැමිණෙන ලෙසට ආරාධනා කර තිබෙනවා. එම ආරාධනය පිළිගත් ක්ලබ් වසන්ත, ඔහුගේ බිරිඳ මෙන්ම ගායන ශිල්පිනී කේ සුජීවා ඇතුළු පිරිසක් ඊයේ පැමිණ තිබුණා.

එහිදී මෝටර් රථයකින් පැමිණි පුද්ගලයන් දෙදෙනෙකු විසින් තප්පර 17ක් ඇතුළත අදාළ පිරිසට වෙඩි තබා පලායන ආකාරය CCTV කැමරාවල සටහන්ව ඇති ආකාරය දැකගත හැකියි. එම වෙඩි තැබීම හමුවේ ක්ලබ් වසන්ත සහ තවත් පුද්ගලයෙකු ජීවිතක්ෂයට පත් වුණා. වෙඩි තැබීමෙන් ක්ලබ් වසන්තගේ බිරිඳ, කේ සුජීවා ඇතුළු තවත් සිව්දෙනෙකු තුවාල ලබා රෝහල් ගත කෙරුණා.

කේ සුජීවා සහ තවත් පුද්ගලයෙකු අතුරුගිරිය රෝහලට ඇතුලත් කිරීමෙන් පසු වැඩිදුර ප්‍රතිකාර සඳහා කොළඹ ජාතික රෝහල වෙත මාරු කර යැවුනා.වෙඩි ප්‍රහාරයට ලක් වූ ජනප්‍රිය ගායන ශිල්පිණි කේ සුජීවාගේ එක් පාදයකට දැඩි හානි සිදුව තිබුණා.ඇය ශෛල්‍යකර්මයකට ද යොමුකළ බවයි ඊයේ රාත්‍රියේ රෝහල් ආරංචි මාර්ග සඳහන් කළේ.

ක්ලබ් වසන්තගේ බිරිඳ සහ තවත් කාන්තාවක් හෝමාගම මූලික රෝහලට ඇතුළත් කෙරුණත් පසුව ක්ලබ් වසන්තගේ බිරිඳ ඊයේ රාත්‍රියේ කළුබෝවිල රෝහලට ඇතුළත් කර තිබෙනවා.මේ අතර බුලත්සිංහල, අයගම, දෙල්මැල්ල ප්‍රදේශයේ පාලු ඉඩමක තිබී වෑන් රථයක් සොයාගෙන තිබෙනවා.ඒ, 119 හදිසි දුරකථන අංකයට ලද තොරතුරකට අනුවයි.අතුරුගිරියේ වෙඩි තැබීමට පැමිණි වෙඩික්කරුවන් වෙඩි තැබීම සිදුකර පළමුව මෝටර් රථයකින් පලාගොස් තිබුණා. එය කඩුවෙල, කොරතොට ප්‍රදේශයේ අතහැර දමා වෑන් රථයකින් පලාගොස් තිබූ බවයි පොලිසීය පැවසුවේ.

බුලත්සිංහල ප්‍රදේශයේ තිබී එලෙස සොයාගෙන ඇත්තේ වෙඩික්කරුවන් පලාගිය වෑන් රථය බවට පොලිසිය සැක කරන බවත් වාර්තා වනවා.මේ අතර පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව පැවසුවේ අතුරුගිරියේ ඝාතන සිද්ධිය සම්බන්ධයෙන් පරීක්ෂණ සඳහා පොලිස් කණ්ඩායම් කිහිපයක් යොදවා ඇති බවයි.