මෙරට ඉන්ධන තරඟයට තවත් සමාගමක් !

ඕස්ට්‍රේලියාවේ යුනයිටඩ් පෙට්‍රෝලියම් සමාගම ලබන මස සිට මෙරට ඉන්ධන බෙදා හැරීමේ කටයුතු ආරම්භ කිරීමට නියමිතව තිබෙනවා.

ඒ අනුව මෙරට ඉන්ධන වෙළදපොළට පිවිසෙන ඔවුන්, ඉන්ධන පිරවුම් හල් 150 කින් ඉන්ධන බෙදාහැරීමේ කටයුතු ලබන මාසයේ එනම් සැප්තැම්බර් මස ආරම්භ කිරීමට නියමිතයි.

ඕස්ට්‍රේලියානු සමාගමක් වන යුනයිටඩ් පෙට්‍රෝලියම්, ලංකා ඉන්දියානු තෙල් සමාගම, සයිනොපැක් සමාගම, ආර් එම් පාක්ස් – ශෙල් සමාගම යන සමාගම් වලට පසුව මෙරට ඉන්ධන වෙළදපොළට පිවිසෙන සිව්වැනි සමාගමයි.

ඕස්ට්‍රේලියාවේ යුනයිටඩ් පෙට්‍රෝලියම් සමාගම ශ්‍රී ලංකාවේ තුළ සිය මෙහෙයුම් දියත් කිරීමේ සමාරම්භක උළෙල “welcome to United” ඊයේ(22) ITC රත්නදීප හෝටලයේ දී පැවැත්වුණා.

එම අවස්ථාව සඳහා විදුලිබල හා බලශක්ති අමාත්‍ය කංචන විජේසේකර මහතා සහ ශ්‍රී ලංකාවේ ඕස්ට්‍රේලියාවේ මහ කොමසාරිස් පෝල් ස්ටෙෆන්ස් මහතා (Mr Paul Stephens) සහභාගී විය. ශ්‍රී ලංකාව තුළ යුනයිටඩ් පෙට්‍රෝලියම් සමාගමේ මෙහෙයුම් ආරම්භ කිරීම අමාත්‍යවරයා මෙහිදී නිල වශයෙන් පිළිගත්තා.

මෙම සමාරම්භක උත්සවය අතර වාරයේ යුනයිටඩ් පෙට්‍රෝලියම් සමාගමේ ප්‍රථම තෙල් නෞකාව ආරක්ෂිතව කොළඹ වරායට සේන්දු වී ඇති බව නිවේදනය කළා.

මෙරට ඉන්ධන වෙළඳ පොළට පැමිණි සිව්වන විදේශීය සමාගම වන්නේ යුනයිටඩ් පෙට්‍රෝලියම් සමාගමයි.

මේ වන විට ඉන්දියාවේ අයි.ඕ.සී., චීනයේ සිනොපෙක් සහ අමෙරිකාවේ ෂෙල් සමාගම්වලට මෙරට ඉන්ධන බෙදාහැරීමේ අවසරය හිමිව තිබෙනවා.

ලංකා ඛනිජ තෙල් නීතිගත සංස්ථාවේ හිටපු අධ්‍යක්ෂ මණ්ඩල සාමාජිකයෙකු මෙන්ම යුනයිටඩ් පෙට්‍රෝලියම් සමාගමේ මෙරට ප්‍රධාන විධායක නිළධාරී අචාර්ය ප්‍රභාත් සමරසිංහ මහතා සමාගමේ ජාත්‍යන්තර අත්දැකීම් පිළිබඳ පැමිණි සිටි පිරිස දැනුවත් කිරීම සිදු කළා.

ඔහු කියා සිටියේ මීට වසර 05කට එහා ගිය දැක්මක් සහිතව යුනයිටඩ් පෙට්‍රෝලියම් ශ්‍රී ලංකාව තුළ කටයුතු කරන බවය. ඉන්ධන අළෙවිය පමණක් නොව ඉන් ඉදිරියට ගොස් වටිනාකම් රැසක් සහිත සේවාවන් ලබා දීම මෙන්ම පාරිභෝගිකයාට නව අත්දැකීමක් ලබා දෙමින් ආහාර වෙළෙඳපලටද ප්‍රවේශවීමට යුනයිටඩ් පෙට්‍රෝලියම් සූදානම් බව අචාර්ය ප්‍රභාත් සමරසිංහ මහතා මෙහිදී පැවසුවා.

උත්සව සභාව අමතමින් විදුලිබල හා බලශක්ති අමාත්‍ය කංචන විජේසේකර මහතා කියා සිටියේ 2022 වසරේ දී ශ්‍රී ලංකාවට මුහුණ දීමට සිදු වූ ආර්ථික අර්බුධය සමඟ ඇතිවූ ඉන්ධන හිඟය සමථයකට පත් කිරීමට තවත් ඉන්ධන බෙදාහැරීමේ පාර්ශ්වයන්ගේ අවශ්‍යතාව පැණ නැගුණු බවයි. මේ අනුව ශ්‍රී ලංකාව මෙරට ඉන්ධන බෙදාහැරීමට ඇරයුම් කළ ආයතන ත්‍රිත්වයක් තොරාගත් බවත් ඒ ත්‍රිත්වය අතර යුනයිටඩ් පෙට්‍රෝලියම් සමාගම ද සිටි බව ඔහු සිහිපත් කළා.

යුනයිටඩ් පෙට්‍රෝලියම් සමාගමේ ඕස්ට්‍රේලියාවේ විධායක නිළධාරී ග්‍රාන්ට් මැක්ජෝජර් (Grant MCGregor) මහතා සිය අවුරුදු 30 කට වඩා වැඩි අන්තර්ජාතික බල ශක්තිය පිළිබඳ රටවල් 10 ක පමණ නැගී එන වෙළෙඳපොළ දැනුම තුළින් මෙහි මෙහෙයුම් කටයුතු පිළිබඳ පැමිණි පිරිස දැනුවත් කළා.

යුනයිටඩ් පෙට්‍රෝලියම් සමාගම, නව තාක‍්ණය සමඟ මුහුවුණු ඉන්ධන බෙදාහැරීමකට සූදානම් බව මෙම අවස්ථාව ඇමතූ යුනයිටඩ් පෙට්‍රෝලියම් සමාගමේ සාමාන්‍යාධිකාරී (මෙහෙයුම්) ග්‍රේෂන් වික්‍රමසිංහ මහතා පැවසීය.

ශ්‍රී ලංකාවේ ආර්ථික වර්ධනය පුළුල් වීමත් සමඟ ඕස්ට්‍රේලියාවේ මව් ශාඛාවේ මෙන් ගුණාත්මක පුළුල් සේවයක් ලංකාවේත් ක්‍රියා කිරීමට සමාගම අපේක්ෂා කරනවා..

නව ව්‍යාපාරිකයන් සමඟ ශක්තිමත් ව්‍යාපාරික සම්බන්ධතා ගොඩනගා ගනිමින් යුනයිටඩ් පෙට්‍රෝලියම් සමාගම සිය මව් ශාඛාවේ වටිනාකම් හා අගනාකම් අනුගමනය කරමින් පාරිභෝගිකයාට වඩාත් ගුණාත්මක සේවාවක් ඉටු කිරීමේ අරමුණ පෙරදැරි කරගෙන නව ගිවිසුම් ගත වීම සිදුවුණා.

යුනයිටඩ් පෙට්‍රෝලියම් සමාගම ඕස්ට්‍රේලියාවේ ප්‍රමුඛ පෙළේ ඛණිජ තෙල් අලෙවි සමාගමක් වන අතර ඕස්ට්‍රේලියාව පුරා සිය තෙල් බෙදා හැරීමේ මධ්‍යස්ථාන 500 කට අධික ප්‍රමාණයක් පවති.

එය ඕස්ට්‍රේලියාවේ Avi Silver මහතා සහ Eddie Hirsch මහතා විසින් ආරම්භ කරන ලද අතර මෙම සමාගම ප්‍රථම වරට ශ්‍රී ලංකාව තුළ සිය ව්‍යාපාරික ආයෝජනය මෙලෙස ආරම්භ කළා.