නාමයෝජනා ලබා දුන් අපේක්ෂකයන් තිදෙනෙක් පිළිබඳ කිසිඳු සටහනක් නෑ !

ජනාධිපතිවරණය සඳහා නාමයෝජනා ලබාදුන් අපේක්ෂකයන් තිදෙනෙකු පිළිබඳ කිසිදු තොරතුරක් නොමැති බව ප්‍රජාතාන්ත්‍රීය, ප්‍රතිසංස්කරණ හා මැතිවරණ අධ්‍යයන ආයතනයේ විධායක අධ්‍යක්ෂ මංජුල ගජනායක අනාවරණය කොටගෙන තිබෙනවා.

‘අද දෙරණ BIG FOCUS’ වැඩසටහනට එක් වෙමින් ඔහු ඒ බව සඳහන් කර තිබෙනවා.

මේ පිළිබඳ වැඩිදුරටත් අදහස් දක්වමින් ඔහු පැවසූවේ අභාවප්‍රාප්ත වූ පුද්ගලයා වෙනුවට වෙනත් අයෙක් තවමත් නම් කර ද නොමැති බවයි.

අපේක්ෂකයන් 38 දෙනාගෙන් 15 දෙනෙකු පමණක් පිරිස රැස් කර හමුවක් පවත්වා තිබෙන අතර අනෙක් අපේක්ෂකයන් 23 න් අපේක්ෂකයන් 3 දෙනෙක් පිලිබඳ කිසිඳු ආරංචියක් නොමැති බව ඔහු සඳහන් කර තිබෙනවා.

මැතිවරණ කොමිසම වෙත ඔවුන් ලබා දුන් දුරකථන අංක ඇමතුව ද ඔවුන්ව සම්බන්ධ කරගත නොහැකි බවයි ඔහු වැඩිදුරටත් සඳහන් කර ඇත්තේ. ඔවුන් නාමයෝජනා පත්‍රයේ අත්සන් කොට ඇප මුදල් තැම්පත් කර තිබුණද මාධ්‍ය ඉදිරියට හෝ පැමිණ නැති අය බවයි සඳහන් කර ඇත්තේ.

සියලූම අපේක්ෂකයන්ගෙන් පාස්පෝට් ප්‍රමාණයේ ඡායාරූපයක් ඔවුන්ගේ වෙබ් අඩවියේ ඵල කිරීමට අවශ්‍යතාව පැවතියත් අපේක්ෂකයන් 24 දෙනෙකු ඒ සඳහා කිසිඳු ප්‍රතිචාරයක් ලබා නොදුන් බව ද ඔහු පවසා තිබෙනවා.