සැප්තැම්බර් 21 ඡන්දය දාන්නේ කොහොම ද ?- මැතිවරණ කොමිෂන් සභාවෙන් නිවේදනයක් !

2024 සැප්තැම්බර් මස 21 වැනිදා පැවැත්වීමට නියමිත ජනාධිපතිවරණයේ ඡන්දය ප්‍රකාශ කළ යුතු පිළිවෙල සම්බන්ධයෙන් මැතිවරණ කොමිෂන් සභාව විසින් නිවේදනයක් නිකුත් කර තිබෙනවා.

මෙවර ජනාධිපතිවරණයේදී එක් අපේක්ෂකයකුට තම ඡන්දයත් තවත් අපේක්ෂකයන් දෙදෙනකුට පිලිවෙලින් දෙවන හා තුන්වන මනාපත් ඡන්ද පත්‍රිකාවේ ලකුණු කිරීමට හැකියාව ඇතැයිද අවශ්‍යනම් ඡන්දය පමණක් ලකුණු කිරීමට හැකියාව ඇතැයිද මැතිවරණ කොමිෂන් සභාව පවසනවා.

තමන් කැමති අපේක්ෂකයාට ඡන්දය ප්‍රකාශ කිරීමට නම් එම අපේක්ෂකයාගේ නම හා ලකුණ ඉදිරියෙන් ඇති කොටසේ ” 1″ ඉලක්කම ලකුණු කළ යුතුය.ඉන්පසුව 2 හා 3 ඉලක්කම් සලකුණු කර තමන් කැමති අපේක්ෂකයන්ට දෙවන හා තෙවන මනාප දැක්විය හැකි බවත් මැතිවරණ කොමිෂන් සභාව කියයි.

දෙවන හා තෙවන මනාප ලකුණු නොකළත් එක් අපේක්ෂකයෙකුට ඡන්දය ලකුණු කළ හැකිවනවා.

ඡන්දදායකයන් සිය චේතනාව ඡන්ද පත්‍රිකාව මත කරනු ලැබූ යම් සලකුණක් පැහැදිලිව පෙනෙන විට (උදාහරණයක් ලෙස කතිරය ලකුණ පමණක් ලකුණු කර ඇතිවිට)එය වලංගු ඡන්දයක් සේ සලකන බව මැතිවරණ කොමිෂන් සභාව පෙන්වා දෙයි .

කෙසේ වුවද කිසිම අපේක්ෂකයෙකුට ඡන්දය සලකුණු නොකිරීම,එක් අපේක්ෂයෙකුට වඩා ඡන්දය ලකුණු කිරීම,එක් අපේක්ෂකයෙකුට “1” හා තවත් අපේක්ෂකයෙකුට කතිරය ලකුණ යොදා ඇතිවිට ,ඡන්දය නොමැතිව දෙවන හා තෙවන මනාප පමණක් ලකුණු කර ඇති විට,”1″ හැර වෙනත් සලකුණක් සමග 2 හා 3 මනාප ලකුණු කර ඇතිවිට ,ඡන්දදායකයා හඳුනාගත හැකිවන පරිදි යම් දෙයක් ලියා හෝ සලකුණු කරනු ලැබූ විට සහ 1,2,3 ට වඩා ඡන්දය හා මනාප ලකුණු කර ඇති විට එම ඡන්ද පත්‍රිකා ප්‍රතික්ෂේප වූ ඡන්ද පත්‍රිකා ලෙස සැලකෙන බවද මැතිවරණ කොමිෂන් සභාව අද (30) නිවේදනයක් නිකුත් කරමින් සඳහන් කරනවා.