ඇමරිකානු ජනාධිපති ජෝ බිඩෙන්ගේ පුතා ඩොලර් මිලියන 1.4ක බදු වංචාවකට වරද පිළිගනී !

එක්සත් ජනපද ජනාධිපති ජෝ බිඩෙන්ගේ පුත් හන්ටර් බිඩෙන් පෙරේදා (05) ෆෙඩරල් බදු වංචා 09ක් පිළිබඳවූ චෝදනාවලට වරද පිළිගෙන තිබෙනවා.

ඔහු වරද පිළිගත්තේ සිය දැවැන්ත ඉපයීම්වල මුදල් මත්ද්‍රව්‍ය, ලිංගික ශ්‍රමිකයන් සහ සුඛෝපභෝගී භාණ්ඩ සඳහා අධික ලෙස වියදම් කරන අතර 2016 සිට 2019 දක්වා වර්ෂවල ඩොලර් මිලියන 1.4 ක නීත්‍යානුකූල බදු ගෙවීම පැහැර හැරීම පිළිබඳ සාපරාධී චෝදනා මත ලොස් ඇන්ජලීස් ෆෙඩරල් උසාවියක නඩු විභාගයට මුහුණ දෙමිනි.

එහිදී විනිසුරුවරයා හන්ටර් බිඩෙන්ට පැවසුවේ ඔහුට වසර 17 ක සිරදඬුවමක් සහ ඩොලර් 450,000 ක දඩ මුදලක් ගෙවීමට සිදුවනු ඇති බවය. ජනාධිපති පුත්‍රයා සම්බන්ධ දඬුවම් නියම කිරීම දෙසැම්බර් 16 වැනිදාට යෙදී තිබෙනවා.

අපරාධ නඩු වලදී වරද පිළිගන්නා විත්තිකරුවන් නඩු විභාගයකින් වැළකී අඩු දඬුවමක් ලැබීමේ බලාපොරොත්තුවෙන් සාමාන්‍යයෙන් නඩු පවරන්නන් සමඟ කලින් ගිවිසුමක් ඇති කර ගනී, මෙහි එවැන්නක් පෙනෙන්නට තිබුණේ නැත.

නඩු විභාගය ආරම්භ වීමට පෙර දිනයේදී, බිඩෙන් චෝදනාවලට වරද පිළිගැනීමට ඉදිරිපත් වූ නමුත් ඔහු එතෙක් වැරදි පිළිගැනීමෙන් වැළකී සිටියා. බිඩෙන්ගේ නීතීඥ ඇබේ ලෝවෙල් විනිසුරුවරයාට පැවසුවේ ඔහුගේ දඬුවම ලිහිල් කරගැනීමට නඩු පවරන්නන් සමඟ පූර්ව එකඟතාවයක් නොතිබුණද ඔහු වරද පිළිගන්නා බවයි.

හන්ටර් බිඩෙන් කියා ඇත්තේ තමන් මත්ද්‍රව්‍යවලට ඇබ්බැහි වූ කාලයට අදාල ඔහුගේ ජීවිතයේ යම් කාල පරිච්ඡේදයක අවුල් සහගත තොරතුරු හෙළි විය හැකි නඩු විභාගයකට පෙනී සිටීමෙන් තම පවුල බේරා ගැනීමට තමන් වරද පිළිගත් බවය.

“වසර ගණනාවක් තිස්සේ ඔවුන් මා උදෙසා දරාගත් සියල්ල සඳහා, මට මෙය ඔවුන්ට ඉතිරි කළ හැකිය,” ඔහු පැවසීය. තමන් බදු මුදල් ආපසු ගෙවා ඇති බවද ඔහු පැවසීය.

හන්ටර් බිඩෙන් ගේ නීතිඥවරයින් පැවසුවේ හන්ටර් තමන්ගේ දඬුවමට අභියාචනයක් ඉදිරිපත් කළ හැකි බවය.

කෙසේ වෙතත් හන්ටර් බිඩෙන් මත්ද්‍රව්‍ය භාවිතා කරමින් නීතිවිරෝධී ලෙස තුවක්කුවක් මිලදී ගැනීම සම්බන්ධයෙන් වරදකරු වූ තීන්දුවකට ඔහු අභියාචනාවක් ඉදිරිපත් කර ඇත.

විදෙස් මාධ්‍ය වාර්තා කරන්නේ එම නඩුවේ වරදකරු වුවහොත් බදු නඩුව සඳහා ඔහුට දැඩි දඬුවමකට මුහුණ දෙන්නට සිදුවනු ඇති බවය., මන්ද ඔහු නැවත නැවතත් වැරදිකරුවෙකු වීම හේතුවෙනි.

ධවල මන්දිරය ප්‍රකාශ කර ඇත්තේ ජනාධිපති බිඩෙන් තම පුතාට සමාව දීම ප්‍රතික්ෂේප කර ඇති බවයි.

ඇමරිකාවේ ඡන්ද සටන ප්‍රබලවම පවතින අවස්ථාවක හන්ටර් බිඩෙන් ස්වකීය වරද පිළිගැනීම නඩු විභාගයක් තුළ මතුවන අනවශ්‍ය සංවාදය වළක්වා ගැනීමට කළ උත්සාහයක් ලෙස ද විදෙස් මාධ්‍ය වාර්තා කරන්වා.