කුකුළු මස් සහ බිත්තර මිල පහළට !

මේ වනවිට රට තුළ කුකුළු මස් හා බිත්තර නිෂ්පාදනය ස්වයංපෝෂිත මට්ටමට පැමිණ ඇති බව කෘෂිකර්ම අමාත්‍යාංශයේ ඊයේ (10) පැවැති මාධ්‍ය හමුවකට සහභාගී වූ කෘෂිකර්ම හා වැවිලි කර්මාන්ත අමාත්‍ය මහින්ද අමරවීර සඳහන් කලා.

මේ වනවිට රටේ දෛනික බිත්තර නිෂ්පාදනය මිලියන 07-08 දක්වා ඉහළ ගොස් ඇති අතර දෛනික බිත්තර පරිභෝජනය ද ඊට සමාන ප්‍රමාණයකින් වර්ධනය වී තිබෙනවා. දෛනිකව රටට අවශ්‍ය බිත්තර සමස්ත ප්‍රමාණයම රට තුළ නිපදවීමට හැකිවී ඇති බැවින් අද දිනය වන විට බිත්තර මිල ගණන් රුපියල් 38-42 දක්වා වූ මට්ටමට අඩු වී තිබෙනවා.

එමෙන්ම කුකුළු මස් නිෂ්පාදනය ද ඉහළ ගොස් ඇති අතර මේ වනවිට රට තුළ කුකුළුමස් අතිරික්ත නිෂ්පාදනයක් දක්වා වර්ධනය වී තිබෙනවා. දෛනික කුකුළු මස් අවශ්‍යතාවය මෙට්‍රික් ටොන් 500ක් පමණ වුවද, දෛනික කුකුළු මස් නිෂ්පාදනය මෙට්‍රික් ටොන් 600ක් දක්වා ඉහළ ගොස් තිබෙනවා.

මේ අතර පසුගිය කොවිඩ් සමයේ නිෂ්පාදන අලෙවි කර ගැනීමට නොහැකිව කුකුළු ගොවිපොළ 3000ක් පමණ වැසී ගිය ද මේ වනවිට එම කුකුළු ගොවිපළවල් සියල්ල ද නැවතත් සක්‍රියව ඇති අතර සියලු කුකුළු ගොවිපොළවල උපරිම ධාරිතාවයට කුකුළු පැටවුන් යොදා ඇති බැවින් දෛනික කුකුළු මස් නිෂ්පාදනයේ සීඝ්‍ර වර්ධනයක් වී ඇත.

මීට මාස කිහිපයකට පෙර රුපියල් 65ක් දක්වා වැඩි වූ බිත්තර මිල රුපියල් 38-42 දක්වා අඩුවීම මෙන්ම කුකුළු මස් කිලෝව රුපියල් 1750 සිට මේ වනවිට රුපියල් 850-975 දක්වා ප්‍රමාණයට අවම වී ඇති බව සඳහන් වුණා.

නමුත් පසුගිය කාලයේ බිත්තර මිල ඉහළ නැංවීමට ව්‍යාපාරික ප්‍රජාව කටයුතු කිරීම නිසා බිත්තර ආනයනය කිරීමට රජය තීරණය කරනු ලැබීය. නමුත් ව්‍යාපාරික ප්‍රජාව තම හිතුමතයට බිත්තර මැලි වැඩි කිරීමට කටයුතු නොකරන්නේ නම් බිත්තර ආනයනය කිරීමේ අවශ්‍යතාවයක් පැන නොනගිනු ඇති බවයි අමාත්‍යවරයා කියා සිටියේ.