ඉදිරි මැතිවරණයට ඉලංගෙයි තමිළ් අරසු පක්ෂය තනිවම සටනට !

ඉදිරි මැතිවරණයට ඉලංගෙයි තමිළ් අරසු පක්ෂයේ නමින් සහ පක්ෂයේ ලාංජනය යටතේ ඉදිරිපත් වන බව හිටපු පාර්ලිමේන්තු මන්ත්‍රී එම්.ඒ. සුමන්දිරන් පවසනවා.

ඔහු මේ බව පැවසුවේ ඊයේ (05) ඉලංගෙයි තමිළ් අරසු පක්ෂයේ නාම යෝජනා කමිටුව රැස්වී මාධ්‍ය වෙත අදහස් පල කරමින්.

එහිදී ඔහු කියා සිටියේ එක් එක් දිස්ත්‍රික්ක සඳහා කාන්තා නියෝජනය සම්බන්ධයෙන් අපි ඉදිරියේදී තීන්දුවක් ගැනීමට නියමිතයි.

එමෙන්ම ත්‍රිකුණාමලය හා අම්පාර දිස්ත්‍රික් වෙනුවෙන් තරග කරන කණ්ඩායම සම්බන්ධයෙන් තීරණයක් ගැනීමට නියමිත බැවින් තවමත් නාමයෝජනා ලැයිස්තු සකස් කිරීම අවසන් කර නොමැති බව ඔහු කියා සිටියා.

මේ අතර ප්‍රජාතන්ත්‍රවාදී දෙමළ ජාතික සන්ධානයේ නාමයෝජනා සකස් කිරීමේ කමිටුව ද ඊයේ රැස් වූ අතර එම සන්ධානයේ මාධ්‍ය ප්‍රකාශක හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් පවසා සිටියේ උතුරු නැගෙනහිර පළාත් නියෝජනය කරන දෙමළ පක්ෂ සියල්ල එක්ව නාමයෝජනා භාර දි යුතු බවයි.

එමෙන්ම ත්‍රිකුණාමලය හා අම්පාර දිස්ත්‍රික්ක වෙනුවෙන් දෙමළ ජනතාව නියෝජනය කරන පාර්ලිමේන්තු මන්ත්‍රීවරුන් තෝරා ගැනීමේදී දෙමළ පක්ෂ සියල්ල එක්ව අදාළ දිස්ත්‍රික්ක දෙක වෙනුවෙන් තරග කිරීම සුදුසු බව ඔහු මෙහිදී කියා සිටියා.

ඒ සම්බන්ධයෙන් ඉලංගෙයි තමිල් අරසු පක්ෂයේ නායක මාවෙයි සේනාධිරාජා සහ එම පක්ෂයේ ලේකම්වරයා වෙත දැනුම් දුන් බව හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් මෙහිදී කියා සිටියා.

එමෙන්ම ත්‍රිකුණාමලය දිස්ත්‍රික්කය වෙනුවෙන් ඉලංගෙයි තමිල් අරසු පක්ෂ ලාංජනය යටතේ සහ අම්පාර දිස්ත්‍රික්කය වෙනුවෙන් අපගේ සන්ධානයේ සලකුණ වන හක් ගෙඩිය සලකුණෙන් තරග කිරීමට යෝජනා කළ බවත් ඉලංගෙයි තමිල් අරසු පක්ෂයේ තීරණය එළැඹෙන 07 වැනිදා දැනුම් දෙන බව හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් වැඩිදුරටත් කියා සිටියා.