මින් ඉදිරියට සුළු පැමිණිලි පැය 48න් විසඳිය යුතුයි – පොලිස්පතිගෙන් විශේෂ නියෝගයක් !

මින් ඉදිරියට පොලිස් ස්ථානවලට වාර්තාවන විවිධ පැමිණිලි වාර්තා වුන දිනයේම විභාගය ආරම්භ කර පැය 48ක් ඇතුළත විභාග කර අවසන් කිරීමට මූලස්ථාන පොලිස් පරීක්ෂවරුන් සහ පොලිස් ස්ථානාධිපතිවරුන් විසින් පියවර ගත යුතු බවත් එම නියෝගය පැහැර හරින නිලධාරීන් සම්බන්ධව තමන්ව දැනුම්වත් කළ යුතු බවටත් දන්වමින් වැඩ බලන පොලිස්පති නීතිඥ ප්‍රියන්ත වීරසූරිය විශේෂ නියෝගයක් නිකුත් කර තිබෙනවා.

එම නියෝගය සහිත නිවේදනයෙන් තවදුරටත් දැක්වෙන්නේ මෙතෙක් පොලිස් ස්ථානවල විභාග නොකර ගොඩගැසී ඇති සහ විභාග කරමින් ඇති විවිධ පැමිණිලි සති දෙකක් තුළ විභාග කර අවසන් කිරීමට විශේෂ වැඩපිළිවෙළක් සකස් කර ක්‍රියාත්මක කළ යුතු බවය.

ඊයේ (05) දින වනවිට විමර්ශන කටයුතු ආරම්භ කර තිබූ පැමිණිලි සංඛ්‍යාව , විමර්ශන කටයුතු ආරම්භ නොකර තිබූ පැමිණිලි සංඛ්‍යාව, පළමු දින තුනේ විමර්ශන ප්‍රගතිය, පළමු දින හතරේ විමර්ශන ප්‍රගතිය සහ අවසන සතියේ විමරශන ප්‍රගතිය සෑම පළාතකටම අදාලව වගු ගත කර පළාත් භාර ජ්‍යෙෂ්ඨ නියෝජ්‍ය පොලිස්පතිවරුන් විසින් වැඩ බලන පොලිස්පතිවරයා වෙත විද්‍යුත් තැපෑලෙන් ලැබෙන්නට සැලැස්විය යුතු බව ද එම නියෝගයේ දැක්වෙනවා.