අධිකරණයෙන් එළියට ආ ජොන්ස්ටන්ගේ බලාපොරොත්තුව !

අද (30) කොටුව මහෙස්ත්‍රාත් අධිකරණය හමුවේ ඇප ලබාගැනීමෙන් අනතුරුව හිටපු අමාත්‍ය ජොන්ස්ටන් ප්‍රනාන්දු මහතා අධිකරණ භූමියෙන් පිටව ගියා.

එහිදී මාධ්‍ය වෙත අදහස් දක්වමින් හිටපු අමාත්‍යවරයා පවසා සිටියේ, අධිකරණයේ දී සත්‍ය හෙළිවිය යුතු බවයි. මේ අතර තමා ඉදිරි මහ මැතිවරණයේ දී තරඟ කරන බව ද ජොන්ස්ටන් ප්‍රනාන්දු මහතා වැඩිදුරටත් පැවසුවා.

එංගලන්තයෙන් සොරකම් කර ඇති බවට සඳහන් වන එකලස් කළ, මෙරට ලියාපදිංචි නොකළ BMW වර්ගයේ මෝටර් රථයක් ළඟ තබා ගැනීමේ සිද්ධිය සම්බන්ධයෙන් ඔහුව පසුගිය 23 වනදා අත්අඩංගුවට ගැනුණා.

ඒ අපරාධ පරීක්ෂණ දෙපාර්තමේන්තුවේදී පැය 4ක පමණ ප්‍රකාශයක් සටහන් කර ගැනීමෙන් අනතුරුවය.

පසුව අධිකරණයට ඉදිරිපත් කළ ඒ මහතා ව අද (30) වනතෙක් රක්ෂිත බන්ධනාගාර ගත කිරීමට නියෝග කෙරිණා. එම නඩුකරය අද කැඳවූ අවස්ථාවේදී ජොන්ස්ටන් ප්‍රනාන්දු මහතාට ඇප ලැබුණා.

අප අධිකරණ වාර්තාකරු පැවසුවේ ඔහුව රුපියල් මිලියන 5 බැගින් වූ ශරීර ඇප 5ක් මත මුදාහැරී බවයි.