10 වන පාර්ලිමේන්තුවේ පළමු පාර්ලිමේන්තු සැසිවාරය ඇරඹේ – කතානායකවරයා පත් කිරීම ඇතුළු සියලු තොරතුරු මෙන්න !

දසවැනි පාර්ලිමේන්තුවේ මංගල සැසිවාරය අද (21) පෙරවරු 10ට  ආරම්භ කෙරුණා.

ඒ, පාර්ලිමේන්තුවේ මහා ලේකම් කුෂාණි රෝහණධීර මහත්මියගේ ප්‍රධානත්වයෙන්.

අනතුරුව පාර්ලිමේන්තුවේ මහා ලේකම්වරිය විසින් පාර්ලිමේන්තුව විසුරුවා හැරීම සහ නැවත කැදවීමේ ගැසට් පත්‍ර පාර්ලිමේන්තුවට ඉදිරිපත් කරනු ලැබුවා.

මේ අතර මංගල සභාවාරය විවෘත කිරීමේ අවස්ථාව චාම් උත්සවයක් ලෙස පැවැත්වීමට ජනාධිපතිවරයාගේ උපදෙස් මත පැවැතුවුණු අතර ඒ අනුව මෙවර ත්‍රිවිධ හමුදා උත්තමාචාර, ආචාර වෙඩි මුර සහ රථ පෙළපාලි, ජයමංගල ගාථා පැවැත්වුණේ නෑ.

අනතුරුව දසවන පාර්ලිමේන්තුවේ කථානායකවරයා ලෙස පාර්ලිමේන්තු මන්ත්‍රී අශෝක රංවල මහතා තේරී පත්කෙරුණා.

පාර්ලිමේන්තුවේ මහා ලේකම් කුෂාණි රෝහණධීර මහත්මිය විසින් කථානායක ධූරයට මන්ත්‍රීවරයෙකු නම්කරන ලෙස නිවේදනය කළ අතර අග්‍රාමාත්‍ය ආචාර්ය හරිනි අමරසූරිය මෙනෙවිය ඒ සඳහා අශෝක රංවල මහතාගේ නම යෝජනා කරනු ලැබුවා. එම යෝජනාව ස්ථිර කරනු ලැබුවේ විදේශ කටයුතු අමාත්‍ය විජිත හේරත් මහතා විසින්.

තේරී පත්වූ අභිනව කථානායකවරයාට අග්‍රාමාත්‍යවරිය මෙන්ම, සජිත් ප්‍රේමදාස සහ රවුෆ් හකීම් යන මන්ත්‍රීවරුන් ද සුභාෂිංශන එක් කරනු ලැබුවා.

දසවන පාර්ලිමේන්තුවේ නියෝජය කථා නායකධූරය සඳහා පාර්ලිමේන්තු මන්ත්‍රී මොහොමඩ් රිස්විසාලී මහතා තේරී පත්වුණා.

ඒ සඳහා නමක් යෝජනා කරන ලෙස කථානායක අශෝක රංවල මහතා විසින් මැතිසබයට දැනුම් දුන් අතර ජනමාධ්‍ය අමාත්‍ය වෛද්‍ය නලින්ද ජයතිස්ස මහතා විසින් ඒ සඳහා පාර්ලිමේන්තු මන්ත්‍රී මොහොමඩ් රිස්විසාලී මහතා යෝජනා කරනු ලැබුවා.එම යෝජනාව ස්ථිර කරනු ලැබුවේ ළමා හා කාන්තා කටයුතු අමාත්‍ය සරෝජා සාවිත්‍රි පෝල්රාජ් මහත්මිය විසින්.

දසවන පාර්ලිමේන්තුවේ නියෝජ්‍ය කාරක සභා සභාපති ධූරය සඳහා හේමාලී වීරසේකර මහත්මිය තේරී පත්වුණා.

ඒ සඳහා හේමාලි වීරසේකර මහත්මියව යෝජනා කරනු ලැබුවේ කර්මාන්ත අමාත්‍ය සුනිල් හඳුන්නෙත්ති මහතා විසින්. එය පාර්ලිමේන්තු මන්ත්‍රීනි සමන්මලී ගුණසිංහ මහත්මිය විසින් ස්ථිර කරනු ලැබුවා.

දසවන පාර්ලිමේන්තුවේ සභානායක ධූරය සඳහා අමාත්‍ය බිමල් රත්නායක, ආණ්ඩු පක්ෂයේ ප්‍රධාන සංවිධායක ධූරය සඳහා අමාත්‍ය වෛද්‍ය නලින්ද ජයතිස්ස යන මහත්වරුන් පත්කර තිබෙනවා. කථානායක අශෝක රංවල මහතා විසින් මේ බව අද (21) මැතිසබයට දැනුම් දුන්නා.

එමෙන්ම 10 වන පාර්ලිමේන්තුවේ විපක්ෂනායකවරයා ලෙස සමගි ජනබලවේග පාර්ලිමේන්තු මන්ත්‍රී සජිත් ප්‍රේමදාස මහතා පිළිගන්නා බවයි කථානායකවරයා නිවේදනය කළේ.

ජනාධිපති අනුර කුමාර දිසානායක මහතා විසින් මේ වනවිට ආණ්ඩුවේ ප්‍රතිපත්ති ප්‍රකාශය සභාවට ඉදිරිපත් කරනු ලබනවා.

පාර්ලිමේන්තු සංකීර්ණය වෙත පැමිණි ජනාධිපතිවරයාව සාම්ප්‍රදායිනුකූලව පිළිගනු ලැබුවේ කථානායක අශෝක රංවල මහතා විසින්.

ජනාධිපතිවරයා තඹ දොරටුවෙන් පිවිස, පැළඳුම් කාමරයේ මිනිත්තු කිහිපයක් ගත කිරීමෙන් අනතුරුව රීදී දොරටුවෙන් කථානායකවරයා ප්‍රමුඛ පාර්ලිමේන්තු පෙරහර සමගින් මැති සභා ගර්භය තුළට පැමිණියා.

අනතුරුව ජනාධිපතිවරයා කථානායකවරයාගේ ආසනයෙහි අසුන් ගත් අතර එහිදී ජනාධිපතිවරයා දස වන පාර්ලිමේන්තුවේ පළමු සභාවාරය ආමන්ත්‍රණය කරමින් ප්‍රකාශ කළේ ප්‍රජාතන්ත්‍රවාදී රාජ්‍යයක් ලෙස තනි පක්ෂ පාලනයක් කිසිසේත් අපේක්ෂා නොකරන බවයි.

ආණ්ඩුවේ ඉදිරි දැක්ම පිළිබඳ සවිස්තරාත්මක විග්‍රහයක් ජනාධිපතිවරයා විසින් සිය ප්‍රතිපත්ති ප්‍රකාශය මගින් පාර්ලිමේන්තුවට සහ මහජනතාවට ඉදිරිපත් කරනු ලබනවා.

ආණ්ඩුක්‍රම ව්‍යවස්ථාවේ 33 (අ) ව්‍යවස්ථාව අනුව පාර්ලිමේන්තුවේ සභාවාරයක් ආරම්භයේදී ආණ්ඩුවේ ප්‍රතිපත්ති ප්‍රකාශය පාර්ලිමේන්තුවේදී ඉදිරිපත් කිරිමටත්, ආණ්ඩුක්‍රම ව්‍යවස්ථාවේ 33 (ආ) අනු ව්‍යවස්ථාව අනුව පාර්ලිමේන්තුවේ මංගල රැස්වීම්වල මුලසුන දැරීමටත්, ජනාධිපතිවරයාට බලතල හිමිවී තිබෙනවා.

ඒ අනුව, පාර්ලිමේන්තුවේ සෑම නව සභාවාරයක් ආරම්භයේ දී ආණ්ඩුවේ ප්‍රතිපත්ති ප්‍රකාශය ඉදිරිපත් කිරීම ජනාධිපතිවරයා විසින් සිදු කර ලබනවා.