ගෝලී​ය වසංගතයක් පිළිබඳ නැවතත් බියක් – HMPV සහ ඉන්ෆ්ලුවෙන්​සා ඇතු​ළු වෛරස කිහිපයක ව්‍යාප්තිය නිසා චීනයේ රෝහල් පිරෙයි (VIDEO)

කොවිඩ්-19 වසංගතයෙන් වසර 5කට පසු චීනය තුළ තවත් වෛරස කිහිපයක් පැතිර යමින් පවතින බව විදෙස් මාධ්‍ය පවසයි.

Human metapneumovirus (HMPV) ලෙස පැවසෙන වෛරස තත්ත්වයක් ප්‍රධාන වශයෙන් පැතිර යමින් පවතින අතර, කොවිඩ් 19 රෝගීන්ද ඒ අතර සිටින බව විදෙස් වාර්තා පෙනවා දෙයි.

එමෙන්ම ඉන්ෆ්ලුවෙන්​සා වෛරසයද චීනයේ පැතිර යමින් පවතින බවද වාර්තා වේ.

වෛරස තත්ත්වය චීනය තුළ සීඝ්‍රයෙන් ව්‍යාප්ත වෙමින් පවතින බව වාර්තා වන අතර, සමාජ මාධ්‍ය ඔස්සේ චීනයේ පවතින තත්ත්වය පිළිබඳ අදහසක් ලබාගත හැකි බව ද විදෙස් මාධ්‍ය පෙන්වා දෙයි.

වෛරස තත්ත්වය හේතුවෙන් රෝගීන්ගෙන් රෝහල් පිරී පවතින බව සඳහන්. (විඩියෝ දර්ශ​න පහතින්)

චීනයේ හදිසි තත්වයක් ඇති බව පිළිබඳ තහවුරු නොකළ ප්‍රකාශ සමාජගතව ඇතත්, විශ්වාසදායක මූලාශ්‍ර කිසිවක් මෙම ප්‍රකාශ තහවුරු කර නැහැ.

කොවිඩ්-19 ගෝලීය ජීවිතයට බාධා කිරීමෙන් වසර පහකට පසු මෙම තත්වය තවත් වසංගතයක් පිළිබඳ බියක් ඇති කර තිබෙනවා.

කෙසේ වෙතත්, චීන සෞඛ්‍ය බලධාරීන් සහ ලෝක සෞඛ්‍ය සංවිධානය (WHO) මේ වන තෙක් නව වසංගතයක් වාර්තා කර හෝ කිසිදු හදිසි අනතුරු ඇඟවීමක් නිකුත් කර නැහැ.

මේ අතර අමෙරිකානු පෙනහළු සංගමය මානව මෙටැප්නියුමෝ වයිරසය (HMPV) උග්‍ර ශ්වසන ආසාදන සඳහා සැලකිය යුතු හේතුවක් ලෙස හඳුනා ගෙන ඇති අතර එය 2001 දී නෙදර්ලන්තයේ පර්යේෂකයන් විසින් සොයා ගන්නා ලද වෛරසයක්.

සාමාන්‍යයෙන් HMPV ආසාදිත පුද්ගලයින් සමඟ සමීප සම්බන්ධතා හරහා, කැස්සෙන් හෝ කිවිසුම් යාමෙන් පිටවන ශ්වසන ස්‍රාවයන් හරහා හෝ සෙල්ලම් බඩු හෝ දූෂිත මතුපිට ස්පර්ශ කිරීමෙන් මෙම රෝගය පැතිරෙන බවයි වාර්තා වන්නේ.