දකුණු කොරියානු ජනාධිපති අත්අඩංගුවට ගැනීමේ උත්සාහය අසාර්ථකයි!

වැඩ තහනම් කරන ලද දකුණු කොරියානු ජනාධිපති යූන් සුක් යෝල්ව අත්අඩංගුවට ගැනීමේ උත්සාහය අසාර්ථක වී ඇති බව විදෙස් මාධ්‍ය වාර්තා කරනවා.

ඒ, පැය හයක පමණ අඛණ්ඩ උත්සාහයකින් අනතුරුවයි.

විදෙස් වාර්තා පෙන්වා දෙන්නේ, ඔහුගේ ආරක්ෂක කණ්ඩායම සමඟ ඇති වූ නොනවතින ගැටුමකින් පසුව ඔහුව අත්අඩංගුවට ගැනීමේ උත්සාහය නතර කළ බවයි.

අවසානයේ, ‘අත්අඩංගුවට ගැනීම ප්‍රායෝගිකව කළ නොහැක්කක් බව’ නිගමනය කළ බවයි, යූන්ගේ කෙටිකාලීන යුධ නීති ප්‍රකාශය විමර්ශනය කරමින් සිටින දූෂණ විමර්ශන කාර්යාලය (CIO) නිවේදනය කර තිබුණේ.

කෙසේ නමුත් සමාලෝචනයකින් පසු ඊළඟ පියවර ක්‍රියාත්මක කරන බවත් ඔවුන් වැඩිදුරටත් සඳහන් කර තිබෙනවා.

යූන් සුක් යෙයෝල්ව අත්අඩංගුවට ගැනීම සඳහා අද දකුණු කොරියානු බලධාරීන් ඔහුගේ පරිශ්‍රයට පැමිණ තිබුණේ, දෙසැම්බර් 3 වැනි දින යුද නීතිය පැනවීමට ගත් උත්සාහය සම්බන්ධයෙන් ඔහුට එරෙහිව සෝල් අධිකරණයක් විසින් නිකුත් කළ අත්අඩංගුවට ගැනීමේ වරෙන්තුවට අදාළවයි.

අදාළ වරෙන්තුව නිකුත් කර තිබුණේ, රාජද්‍රෝහී චෝදනා සම්බන්ධයෙන් විමර්ශන කිහිපයකට මුහුණ දී සිටින යූන් හට පසුගිය සති දෙක තුළ ප්‍රශ්න කිරීම සඳහා පෙනී සිටින ලෙස නිකුත් කළ සිතාසි තුනක් නොසලකා හැරීමෙන් පසුවයි.

වත්මන් වරෙන්තුව අවසන් වීමට පෙර ඔහුව අත්අඩංගුවට ගැනීමට විමර්ශකයන්ට ජනවාරි 6 දක්වා කාලය තිබේ.

ඒ අනුව සති අන්තයේ නැවතත් යූන්ව අත්අඩංගුවට ගැනීමට උත්සාහ ගනු ඇති බව සඳහන්.