2025 රජයේ වියදම් ඇස්තමේන්තුව මෙන්න – වැඩිම වියදම සෞඛ්‍යයට!

මේ වසරට අදාල විසර්ජන පනත් කෙටුම්පත අග්‍රාමාත්‍ය ආචාර්ය හරිනි අමරසූරිය අද පාර්ලිමේන්තුවට ඉදිරිපත් කරනු ලැබුවා.

ඒ අනුව මේ වසරේ රජයේ වියදම රුපියල් බිලියන 4,218ක්.

විසර්ජන පනත් කෙටුම්පතට අනුව ජනාධිපති වැය ශීර්ෂය සදහා පුනරාවර්තන වියදම ලෙස රුපියල් මිලියන 2518ක් සහ මූලදන වියදම ලෙස රුපියල් මිලියන 354ක් ද ඇස්තමේන්තු කර තිබෙනවා.

2024 වසරේ එහි පුනරාවර්තන වියදම් ලෙස රුපියල් මිලියන 3,673ක් සහ මූලධන වියදම් ලෙස රුපියල් මිලියන 528ක් දැක්වුණා.

එමෙන්ම සෞඛ්‍ය සහ ජනමාධ්‍ය අමාත්‍යාංශය සදහා ඇස්තමේන්තු කර ඇති වියදම රුපියල් මිලියන හාරලක්ෂ දොළොස්දහස් නවසිය අනූනමයක්.

එම අමාත්‍යාංශය සදහා ඇස්තමේන්තු කර ඇති මූලධන වියදම රුපියල් මිලියන 95,500ක් ලෙස දැක්වෙනවා.

2024 වසරේ සෞඛ්‍ය අමාත්‍යාංශයේ ඇස්තමේන්තුගත වියදම දැක්වුණේ රුපියල් මිලියන 410,000ක් ලෙසයි.

ආරක්ෂක අමාත්‍යාංශයේ පුනරාවර්තන වියදම රුපියල් මිලියන 382,000ක් වන අතර, මූලධන වියදම රුපියල් මිලියන 60,000ක්.

ආරක්ෂක අමාත්‍යාංශය සඳහා 2024 වසර වෙනුවෙන් ඇස්තමේන්තුගත වියදම රුපියල් මිලියන 423,000ක්.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහා 2025 වසරේ ඇස්තමේන්තුගත කර ඇති මුදල පූනරාවර්තන වියදම් රුපියල් මිලියන 206,000ක් වන අතර එම අමාත්‍යංශය සඳහා මූලධන වියදම් ලෙස ඇස්තමේන්තුගතකර ඇති මුදල රුපියල් මිලියන 65,000ක්.

2024 වසරේ එහි ඇස්තමේන්තුගත වියදම ලෙස දක්වා තිබුණේ, රුපියල් මිලියන දෙලක්ෂ 36,000ක් ලෙසයි.

ප්‍රවාහන මහාමාර්ග, වරාය සහ සිවිල් ගුවන් සේවා අමාත්‍යංශය සඳහා 2025 වසරේ පූනරාවර්තන වියදම් ලෙස රුපියල් මිලියන 52,410ක් ඇස්තමේන්තු ගතකර ඇති අතර එම අමාත්‍යංශය සඳහා මූලධන වියදම් ලෙස ඇස්තමේන්තු ගතකර ඇති මුදල රුපියල් මිලියන 421,000ක්.

2024 වසරේ එහි ඇස්තමේන්තුගත වියදම ලෙස දක්වා තිබුණේ, රුපියල් මිලියන 402,000 ක් ලෙසයි.

කෘෂිකර්ම පශු සම්පත්, ඉඩම් සහ වාර්මාර්ග අමාත්‍යාංශය සඳහා 2025 වසරේ ඇස්තමේන්තු ගතකර ඇති මුදල පූනරාවර්තන වියදම් රුපියල් මිලියන 83,894ක් වන අතර එම අමාත්‍යංශය සඳහා මූලධන වියදම් ලෙස ඇස්තමේන්තු ගතකර ඇති මුදල රුපියල් මිලියන 124,828ක්.

2024 වසරේ කෘෂිකර්ම අමාත්‍යාංශයේ ඇස්තමේන්තුගත වියදම ලෙස දක්වා තිබුණේ, රුපියල් මිලියන 99,000ක් ලෙසයි.

මේ වසර සදහා වන අයවැය කතාව පෙබරවාරි 17 වනදා පාර්ලිමේන්තුවට ඉදිරිපත් කිරීමට නියමිත අතර එහි විවාදය පෙබරවාරි 18 සිට 25 දක්වා දින 07ක් පැවැත්වෙනු ඇති.

එමෙන්ම අයවැය දෙවන වර කියවීමේ ඡන්ද විමසීම පෙබරවාරි 25 වනදා පස්වරු 06 ට පැවැත්වෙනවා.

අයවැය තුන්වන වර කියවීම හෙවත් කාරක සභා අවස්ථාවේ විවාදය පෙබරවාරි 27 වනදා සිට මාර්තු 21 දක්වා පැවැත්වෙන අතර ඡන්ද විමසීම මාර්තු 21 වනදා පස්වරු 06ට සිදු කෙරෙනු ඇති.

මේ අතර අලුතින් නාමයෝජනා කැදවීමට අදාළ පළාත් පාලන මැතිවරණ විශේෂ විධි විදාන පනත් කෙටුම්පත ද අද පාර්ලිමේන්තුවට ඉදිරිපත් කළා.

සම්පූර්ණ විසර්ජන පනත් කෙටුම්පත පහතින් දක්වා ඇත.

813507926-Appropriation-Bill-E-20250102-Sin-1