යාපනය විශ්වවිද්‍යාලයේ මත්ද්‍රව්‍ය සහ මත්පැන් භාවිතයට එරෙහි වූ ශාස්ත්‍ර පීඨයේ පීඨාධිපතිට ඉල්ලා අස්වෙන්න සිදුවෙයි!

යාපනය විශ්වවිද්‍යාලය තුළ ක්‍රියාත්මකවන මත්ද්‍රව්‍ය සහ මත්පැන් ඇතුළු අශ්ලීල ලිංගික හැසිරීම්වට එරෙහි වූ ශාස්ත්‍ර පීඨයේ පීඨාධිපති සිවසුබ්‍රමනියම් රඝුරාම් සිය ධූරයෙන් ඉල්ලා අස්වීමේ ලිපිය පාලන අධිකාරිය වෙත ඊයේ ( 26 ) බාර දී තිබෙනවා.

යාපනය විශ්ව විද්‍යාලයේ සිදු වූ බව කියන ලිංගික ක්‍රියාකාරකම් කීපයක් හා මත්ද්‍රව්‍ය භාවිත කිරීම් කීපයක් නිසා විශ්ව විද්‍යාල සිසුන් 9 දෙනෙකුගේ පන්ති මීට දින කීපයකට පෙර තහනම් කොට තිබුණා.

එසේ පන්ති තහනමට ලක් වූ ශිෂ්‍යයින්ගෙන් වැඩි දෙනා ශාස්ත්‍ර පීඨයේ සිසුන් වූ අතර එම පන්ති තහනම ලබා දීමට විනය කමිටිවේ ජෙයෂ්ඨ නිලධාරියෙකු ලෙස සේවය කරණ රඝුරාම්ද මූලික වී තිබෙනවා.

යාපනය විශ්ව විද්‍යාලයේ බොහෝ සිසුන් විශ්ව විද්‍යාල භූමියේ තනා ඇති ගල් බංකු මත සිට මත්පැන් පානය කිරීමත් දුම්වැටි පානය කිරීමත් සිදු කරන බවත් ඔවුන්ගේ නේවාසිකාගාරවලදී මත්ද්‍රව්‍ය භාවිත කරණ බවත් ශාස්ත්‍ර පීඨයේ ප්‍රධානියා පාලන අධිකාරියට දැණුම් දී තිබුණා.

එමෙන්ම විශ්ව විද්‍යාල සිසුන් එහි ශිෂ්‍යාවන් සමග නොමනා හැසිරීම් වල නිරත වන බවද ඔහු අවධාරණය කොට තිබේ.
නේවාසිකාගර වල මත්ද්‍රව්‍ය භාවිත කිරීමේ සිද්ධීන් 11 වතාවක් වාර්තා වී පොලීසියද එම සිසුන්ට එරෙහිව ඒ සෑම අවස්ථාවකදීම නීතිය ක්‍රියාත්මක කිරීම නිසා එවැනි ක්‍රියා වලට සම්බන්ධ සිසුන්ගේ පන්ති තහනම් කල යුතු බවට ශාස්ත්‍ර පීඨයේ ප්‍රධානී සිවසුබ්‍රමනියම් රඝුරාම් තරයේම ප්‍රකාශ කොට තිබෙනවා.

ඒ අනුව සිසුන්ගේ පන්ති තහනම් වූ අතර සිසුන්ගේ පන්ති තහනම් නීති විරෝධී හා අසාධාරණ එකක් බව කියමින් තවත් හේතුන් හතරක්ද මුල් කරගෙන යාපනය විශ්ව විද්‍යාලයේ සිසුන් විසින් විරෝධතාවයක් ආරම්භ කොට තිබූ අතර සියලුම සිසුන් විසින් පන්ති වර්ජනයක්ද දියත් කොට තිබුණා.

අවසානයේදී යාපනය විශ්ව විද්‍යාලයේ පීඨාධිපතිවරයා හා පාලන අධිකාරිය සිසුන්ට වාසි වන අන්දමට ඔවුන්ගේ ඉල්ලීම්වලට ප්‍රතිචාර දැක්වීම නිසා දැඩි ලෙස කම්පනයට පත් වූ සිවසුබ්‍රමනියම් රඝුරාම් සිය ඉල්ලා අස්වීමේ ලිපිය යාපනය විශ්ව විද්‍යාලයේ පාලන අධිකාරිය වෙත බාර දී තිබෙනවා.