ලසන්ත වික්‍රමතුං​ග ඝාතනය සදහටම වැළලී යන හැඩ? – සැකකරුවන් තිදෙනෙ​ක් නිදහස් කරන්නැ​යි නීතිපති අපරාධ පරීක්ෂණ දෙපාර්තුමේන්තුවට දැනුම් දෙයි!

හමුදා ඔත්තුසේවා ප්‍රමුඛ සන්නද්ධ හමුදා යොදාගනිමින් පොලීසියේ හා රාජ්‍ය නීති අංශයේ ද ආවරණය ඇතිව ශ්‍රී ලංකා රාජ්‍යය විසින් පසුගිය කාලයේ සිදුකරන ලද රාජ්‍ය අපරාධ කිසිදා හෙළිදරව් නොවනු ඇතිදැ’යි යන සැකය ත්‍රීවෘ කරමින්, ලසන්ත වික්‍රමතුං​ග ඝාතනය සම්බන්ධයෙන් දැනට සැකකරුවන් ලෙස නම්කර සිටින තිදෙනකුට එරෙහිව තවදුරටත් නීති මඟින් කටයුතු කරන්නට අදහස් නොකරන බැවින් ඔවුන් නිදහස්කර යැවිය හැකි බව ගල්කිස්ස මහේස්ත්‍රාත්වරයා වෙත දැන්විය යුතුය යි නීතිපති පාරින්ද රණසිංහ පසුගිය ජනවාරි 27 වැනිදා අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට දැනුම්දී තිබේ.

නීතිපතිවරයා අපරාධ පරීක්ෂණ දෙපාර්තමේන්තුවට වැඩිදුරටත් දන්වා සිටින්නේ, මේ බව මහේස්ත්‍රාත් අධිකරණයට වාර්තා කිරීමෙන් පසුව, ඒ සම්බන්ධයෙන් අධිකරණය ගත් ක්‍රියාමාර්ග දින 14ක් ඇතුළත තමන් වෙත දැනුම්දෙන ලෙස ය.

උදලාගම, සුගතපාල, නානායක්කාර

මෙසේ නිදහස්කර හැරීමට නිර්දේශ කරන සැකකරුවන් වන්නේ යුද හමුදා මාණ්ඩලික සැරයන් ප්‍රේම් ආනන්ද උදලාගම, උප පොලිස් පරීක්ෂක තිස්සසිරි සුගතපාල සහ නියෝජ්‍ය පොලිස්පති ප්‍රසන්න නානායක්කාර යන අය ය.

ආනන්ද උදලාගම

නිදහස් කිරීමට නිර්දේශ කර ඇති ප්‍රේම් ආනන්ද උදලාගම යනු , ලසන්ත ඝාතනයෙන් පසු ලසන්ත ගේ පෞද්ගලික රියදුරා පැහැරගෙන ගොස් තර්ජනය කරන ලද බවට එම රියදුරා විසින් හඳුනාගැනීමේ පෙරෙට්ටුවක දී හඳුනාගන්නා ලද පුද්ගලයා ය.

ලසන්ත ගේ රියදුරා විසින් ‘ලසන්ත මරාදැම්මේ ගෝඨාභය රාජපක්ෂ’ බවට තැන තැන කියන ලදැයි චෝදනා කරමින් උදලාගම විසින් ඔහු පැහැරගෙන ගොස් කට වසාගෙන සිටින ලෙසත්, එසේ නොවුණොත් ඔහුට ද ලසන්තට සිදුවූ දේ සිදුවන බවත්ටත් තර්ජනය කළේ ය. ඔහු නිදහස් කිරීමට නිර්දේශ කරන්නේ මේ ප්‍රබල සාක්ෂිය එසේම තිබියදී ය.

තිස්සසිරි සුගතපාල

තිස්සසිරි සුගතපාල යනු ලසන්ත ඝාතනය මුලින් ම විමර්ශනය කළ ගල්කිස්ස පොලිස් ස්ථානයේ අපරාධ අංශයේ එවකට ස්ථානාධිපතිවරයා ය. නියෝජ්‍ය පොලිස්පති ප්‍රසන්න නානායක්කාර ගේ සහ ජේෂ්ඨ පොලිස් අධිකාරී හේමන්ත අධිකාරී ගේ නියෝග සහ තර්ජන මත සාක්ෂි වසන් කිරීමට හා විනාශ කිරීමට කටයුතු කළ බවට ගල්කිස්ස මහේස්ත්‍රාත්වරයා හමුවේ ලබාදුන් ව්‍යවස්ථාපිත ප්‍රකාශයකින් ඔහු පිළිගත්තේ ය.

එසේ විනාශකර දමන ලද සාක්ෂි අතර ලසන්ත විසින් තමන් ඝාතනය කරන්නට පැමිණෙමින් සිටි යතුරුපැදි දෙකක අංක සටහන් කරගන්නා ලද ඔහු ගේ ක්ෂේත්‍ර සටහන් පොත ද විය. එහෙත් එම පොත නානායක්කාරට ලබාදීමට පෙර එහි ඇතැම් පිටුවල ඡායා පිටපත් රැගෙන සඟවා තබන්නට කටයුතු කළ සුගතපාල සීඅයිඩී විමර්ශන හමුවේ ඒවා ඉදිරිපත් කළේ ය.

ඒ අනුව ඔහු ද නිදහස් කරන්නට නිර්දේශ වන්නේ ඔහුට එරෙහිව බරපතල සාක්ෂි පවතින තත්ත්වයක් හමුවේ ය.

ප්‍රසන්න නානායක්කාර

ප්‍රසන්න නානායක්කාර යනු ඝාතනය සිදුවන සමයේ ගල්කිස්ස පොලිස් බලප්‍රදේශය භාරව සිටි නියෝජ්‍ය පොලිස්පතිවරයා ය. “උඹටත් ලසන්තට වෙච්ච දේ කරගන්න ඕනෑදැ”යි අසමින් ලසන්ත ගේ ක්ෂේත්‍ර සටහන් පොත සුගතපාලගෙන් ලබාගත් බවට සුගතපාල ගේ ප්‍රකාශයේ සඳහන් වන්නේ මේ කියන නානායක්කාර ය.

එතැන් පටන් මෙම පොත අතුරුහදන් ව පවතී. ලසන්ත ඝාතනය වෙඩිතැබීමකින් සිදුවූ මරණයක්ය යි වැරදි මරණ පරීක්ෂණ වාර්තාවක් ලබාදුන් කළුබෝවිල රෝහලේ අධිකරණ වෛද්‍ය නිලධාරීවරයාට ප්‍රසන්න නානායක්කාර මරණ පරීක්ෂණය පැවැත්වෙන අවස්ථාවේ දිගින් දිගටම දුරකතනයෙන් කතාකර තිබූ බව දුරකතන විශ්ලේෂණ මඟින් තහවුරු විය. මරණය වෙඩිතැබීමකින් සිදුවූවකැයි සාවද්‍ය ලෙස මරණ සහතිකය නිකුත්කිරීමට වෛද්‍යවරයාට බලපෑම් කරන ලද්දේ නානායක්කාරද යන සැකය ඔහුට එරෙහිව බරපතල ලෙස එල්ල විය.

නීතිපතිවරයා මේ සැකකරුවන් තිදෙනා නිදහස් කරන්නට යෝජනා කරන්නේ ඔවුන් තිදෙනාට ම එරෙහිව මෙවැනි ප්‍රබල සාක්ෂි පවත්නා පසුබිමකය.

නීතිපති දෙපාර්තමේන්තුව තුළ ජේෂ්ඨත්වය අතින් ඉහළින් සිටි අයේෂා ජිනසේන කපාහරිමින් පාරින්ද රණසිංහට නීතිපති තනතුර ලබාදෙන්නේ රනිල් වික්‍රමසිංහ විසිනි. අයේෂා ජිනසේන දේශපාලන බලපෑම්වලට නම්මාගත නොහැකි ඍජු නිලධාරිනියක ලෙස ප්‍රකටව සිටි අතර පාරින්ද රණසිංහ දෙපාර්තමේන්තුව තුළ ප්‍රසිද්ධව සිටියේ එහි අනෙක් පැත්ත ලෙස ය.

ගෝඨා කඩාකප්පල් කළ විමර්ශන

2019 ගෝඨාභය රාජපක්ෂ ජනාධිපති ධූරයට පැමිණ විමර්ශන නිලධාරීන්ගෙන් පළිගනිමින් ඔවුන් දෙපාර්තමේන්තුවෙන් එලවා දමා විමර්ශන කඩාකප්පල් කරන අවස්ථාව වනවිට අපරාධ පරීක්ෂණ දෙපාර්තමේන්තුව ලසන්ත ඝාතනයේ සුලමුල ඉතාම ආසන්නයට සොයාගනිමින් සිටි බව විමර්ශන වාර්තාවලින් පැහැදිළි වේ.

වත්මන් ජාජබ ආණ්ඩුව යටතේ මෙම විමර්ශන නැවත ආරම්භ වනු ඇතැයි දැඩි බලාපොරොත්තුවක් සමාජය තුළ නිර්මාණය වී තිබිණි. දේශපාලන බලපෑමකින් තොරව සාධාරණ ලෙස එම විමර්ශන ඉදිරියට යන්නට සැලැස්විණි නම්, ලසන්ත ඝාතනයට සම්බන්ධ අපරාධකරුවන් සොයාගත හැකි බවට ප්‍රබල ඉඟි සීඅයිඩී විමර්ශනවලින් හමුවී තිබිණි.

කුමන ආණ්ඩු වෙනසක් සිදුවුවත්, ඔත්තුසේවා ප්‍රමුඛ සන්නද්ධ හමුදා යොදාගනිමින් පොලීසියේ හා රාජ්‍ය නීති දෙපාර්තමේන්තුවල ආවරණය යටතේ ලංකා රාජ්‍යය පසුගිය කාලයේ සිදුකළ රාජ්‍ය අපරාධ හෙළි නොවන තත්ත්වයක් උද්ගතවනු ඇතිදැයි යන බලවත් සැකය මේ සිදුවීම සමඟින් ඉස්මත්තට පැමිණේ.