ලසන්ත වික්‍රමතුංග ඝාතන සැකකරුවන් නඩුවෙන් නිදහස් කිරීම සම්බන්ධව විශේෂ කැබිනට් ප්‍රකාශයක්!

ලසන්ත වික්‍රමතුංග ඝාතන සිද්ධියට සම්බන්ධ සැකරුවන් නඩුවෙන් නිදහස් කිරීම සම්බන්ධව නීතිපතිවරයා විසින් ලබා දුන් තීන්දුව සම්බන්ධව අධ්‍යයනය කරමින් සිටින බවත් ඒ සම්බන්ධව රජය වශයෙන් ඉදිරියේ දී ප්‍රකාශයක් කරන බවත් කැබිනට් මාධ්‍ය ප්‍රකාශක සෞඛ්‍ය ඇමති නලින්ද ජයතිස්ස අද ප්‍රකාශ කළේය.

ලසන්ත ඝාතනයේ සැකකරුවන් තිදෙනා නීතිපතිවරයා විසින් නඩුවෙන් නිදහස් කිරීම සම්බන්ධව මාධ්‍යවේදියෙක් ප්‍රශ්න කළ අවස්ථාවේ දී කැබිනට් මාධ්‍ය ප්‍රකාශකවරයා පැවසුවේ නීතිය සහ යුක්තිය සම්බන්ධව ජනතාව රජය දෙස බලාගෙන සිටිනා සිද්ධියක් සම්බන්ධයෙන් නීතිපතිවරයා විසින් ලබා දුන් මෙම තීන්දුව ජනතාවට ප්‍රශ්නයක් ඇති කර තිබෙන බවය.

කැබිනට් මාධ්‍ය ප්‍රකාශකවරයා මෙසේ ද පැවසුවේය.

2006න් පස්සේදි දකුණේ පමණක් නොව උතුරේත් මාධ්‍යවේදීන් පැහැරගෙන යෑම් පිළිබඳව නිසි පරිදි විමර්ශනය කරලා දඬුවම් කිරීමට අපට ජන වරමක් තියනවා. ජනාධිපතිවරණෙයෙත් මහ මැතිවරණයේදීත් අපට ලබා දුන් ජනවරම සම්බන්ධව අපට හොඳ අවබෝධයක් තියනවා. ඒ අනුව ඔබට පේනවා ඇති අපේ ජනාධිපතිවරයා ඇතුළු සමස්ථ ආණ්ඩු පක්ෂය පසුගිය කාලයේ මේ මාධ්‍යවේදීන් පැහැර ගැනීම් අඩම්තේට්ටම් කිරීම් පිළිබඳව පරීක්ෂණවලට දෙන්න පුලුවන් උපරිම සහයෝගය දෙනවා.

අපට කරන්න තියෙන්නේ නඩු පැවරීම්වලට සහ විමර්ශනවලට යටිතල පහසුකම් සැපයීම රජයක් ලෙස. අධිකරණය මගින් තමයි අවසන් තීරණ ලබා දෙන්නේ.

අපි කිසිසේත් විශ්වාස කරන්නෙ නෑ අධිකරණයේ දි විසික්වෙන විදිහෙ නඩු පවරන්න ඕන කියලා. අනිවාර්යයෙන් ඝාතකයින් දඬුවම් ලැබිය යුතුමයි. එතනදි ඔබ කියපු ප්‍රශ්නය අප අවබෝධ කරගෙන ඉන්නවා. මේ නීතිපතිවරයාගේ මේ තීන්දුව සම්බන්ධයෙන් ආණ්ඩුව අධ්‍යයනය කරමින් ඉන්නවා.

මේ සම්බන්ධව ඉදිරියේ දී ප්‍රකාශයක් කරන්න අපි සුදානම්. ඒ නිසා ඒ පිළිබඳව අපි ඉතාම රටේ ප්‍රජාතන්ත්‍රවාදය සහ නීතිය සම්බන්ධව ජනතාව රජය ගැන බලන් ඉන්න කාරණාවට සම්බන්ධ ප්‍රශ්නයක්.

ඒ නිසා අපි අධ්‍යයනය කරලා අපි තීරණය ප්‍රකාශ කරන්නම්.