අසලංකගේ හුදෙක​ලා ශතකය හා පන්දු යවන්නන්ගේ දක්ෂතා හමුවේ පළමු එක්දි​න තරගයේ ජය ශ්‍රී ලංකාවට!

මුල් පෙල පිතිකරුවන් අසාර්ථක වූ පසුබිමක නායක චරිත් අසලංක වාර්තා කළ සටන්කාමී ශතකය හමුවේ ඔස්ට්‍රේලියාව සමග පැවැති පළමු එක්දින ක්‍රිකට් තරගයෙන් ලකුණු 49 ක ජයක් වාර්තා කිරීමට ශ්‍රී ලංකා කණ්ඩායම අද (12) සමත් වුණා.

කොළඹ ආර්.ප්‍රේමදාස ක්‍රීඩාංගනයේ පැවැති තරගය ජය ගැනීම සදහා ඔස්ට්‍රේලියාවට ලකුණු 215 ක ඉලක්කයක් හිමි වූ නමුත්, ඔවුන්ට පන්දුවාර 33.5 ක් අවසානයේ සියලු දෙනා දැවී ලබා ගත හැකි වූයේ ලකුණු 165 ක් පමණයි.

තරගයේ කාසියේ වාසිය දිනා පළමුව පන්දුවට පහර දීමට පිටියට පිවිසි ශ්‍රී ලංකාව පන්දුවාර 46 ක් අවසානයේ සියලු දෙනා දැවී ලබා ගත් ලකුණු සංඛයාව 214 ක්.

මෙම තරගයේදී ද ශ්‍රී ලංකා මුල් පෙල යළි අසාර්ථක වූයේ නිමා වූ නවසීලන්ත තරග සංචාරයේ පළමු තරග දෙක යළිත් සිහියට නංවමින්.

තරගයේ සම්පූර්ණ පාලනය සංචාරක ඔස්ට්‍රේලියානු කණ්ඩායමට හිමි කර දෙමින් ඉනිමේ පළමු කඩුලු 4 ලකුණු 31 ක් තුළත්, 5 වැනි කඩුල්ල ලකුණු 55 දීත් දැවී ගියා.

පළමු කඩුල්ල ලෙස පැතුම් නිස්සංක ලකුණු 4කටත්, දෙවැනි කඩුල්ල ලෙස අවිශ්ක ප්‍රනාන්දු එක් ලකුණකටත් දැවී ගියා. කුසල් මෙන්ඩිස් ලකුණු 19 ක් ලබා ගත් අතර, කමිදු මෙන්ඩිස් දැවී ගියේ ලකුණු 5 කටයි. ජනිත් ලියනගේ ලකුණු 11 යි.

කෙසේ වෙතත්, හුදෙකලා සටනක නිරත වෙමින් නායකත්වයේ ඉනිමක් ක්‍රීඩා කළ චරිත් අසලංක පන්දු 126 කින් ලකුණු 127 ක් ලබා ගත්තේ හයේ පහර 5 ක් හා හතරේ පහර 14 ක් සමගින්.

දුනිත් වෙල්ලාලගේ ලකුණූ 30 ක් රැස් කළා. වෙල්ලාලගේ හා අසලංක අතර 6 වැනි කඩුල්ලට ලකුණු 67 ක සම්බන්ධතාවයක් ගොඩ නැගුණු අතර, ඉනිමේ 8 වැනි කඩුල්ල ලකුණු 135 දී බිද වැටුණු පසුබිමක 9 වැනි කඩුල්ල වෙනුවෙන් අසලංක හා ඒෂාන් මාලිංග ලකුණු 79 ක අගනා සම්බන්ධතාවයක් ගොඩ නැගීමට සමත් වුණා.

එම සම්බන්ධතාවයේදී සිය වගකීම කුමක්දැයි නිසි ලෙස අවබෝධ කර ගත් මාලිංග පන්දු 26 කින් එක් ලකුණක් පමණක් ලබා තම නායකයාට ශ්‍රී ලංකා ඉනිම ගොඩ නැංවීමේ අවස්ථාව සලසා දුන්නා.

පන්දු යැවීමේ දී ඔස්ට්‍රේලියාව වෙනුවෙන් ශෝන් ඇබෝට් ලකුණු 61 කට කඩුලු 3 ක් දවා ගත්තා. ස්පෙන්සර් ජොන්සන්, ආරෝන් හාර්ඩි හා නේදන් එලිස් කඩුලු 2 බැගින් බිද හෙලුවා.

පිළිතුරු ඉනිම ක්‍රීඩා කළ ඔස්ට්‍රේලියානු කණ්ඩායමේ පළමු කඩුලු 4 ද ලකුණු 31 ක් තුළ බිද වැටීම කැපී පෙනුණා.

ඉනිමේ පළමු පන්දුවාරයේදීම අසිත ප්‍රනාන්දුගේ පන්දුවක් හමුවේ මැතිව් ශෝර්ට් ලකුණු නොලබා දැවී ගිය අතර, ජේක් ෆ්‍රේසර්-මැක්ගර්ක් ලකුණු දෙකකටත්, කූපර් කොනල්ලි ලකුණු 3කටත්, ස්ටීවන් ස්මිත් ලකුණු 12 කටත් දැවී ගියා.

මර්නස් ලබුෂේන් ලකුණු 15 කට දැවි ගිය අතර, ඉනිමේ වැඩිම ලකුණුලාභියා බවට පත් වූ ඇලෙක්ස් කෙරී ලකුණු 41 ක් ලබා ගත්තා. ආරෝන් හාර්ඩී ලකුණු 32 යි. ශෝන් ඇබෝට් ලකුණු 20 කට දැවී ගිය අතර, ඇඩම් සම්පා නොදැවී ලකුණු 20 ක් රැස් කළා.

පන්දු යැවීමේදී මහීෂ් තීක්ෂණ ලකුණු 40 කට කඩුලු 4 ක් දවා ගත් අතර, අසිත ප්‍රනාන්දු හා දුනිත් වෙල්ලාලගේ කඩුලු 2 බැගින් බිද හෙලුවා.

ඒ අනුව දෙරට අතර පැවැත්වෙන තරග දෙකකින් යුත් එක්දින තරගාවලිය මේ වන විට තරග 1-0 ක් ලෙස පෙරමුණේ පසුවන්නේ ශ්‍රී ලංකාවයි.