Parking Tickets ජාවාරම ගැන රටටම දැනුම් දීමක් – පළමු විනාඩි 10 නොමිලේ (VIDEO)

වාහනයක් නතරකළ සැනින් ගාස්තු ගෙවිය යුතු බවට (Parking Tickets) නීතියක් පනවා නැති බව කොළඹ නාගරික කොමසාරිස් පාලිත නානායක්කාර පවසයි.

මාධ්‍ය වෙත අදහස් දක්වමින් ඔ​හු සඳහන් කළේ, පොදු රථගාල් භාවිතා කරන රියදුරන් සඳහා වාහනය නවතා තැබූ කාලය නිරීක්ෂණය කිරීම සඳහා රිසිට්පතක් නිකුත් කරනු ලබන බවයි.

ඒ අනුව, වාහනයක් නතර කළ පසු පළමු විනාඩි 10 නොමිලේ වන අත​ර මිනිත්තු 10ට වැඩි කාලයක් රථගාලේ වාහනය නවතා තබන අවස්ථාවලදී පමණල් රුපියල් 70ක ගාස්තුවක් අය කිරීමට තීරණය කර තිබෙනවා.

පොදු රථගාලක වාහනයක් නැවැත්වූ වහාම ගාස්තුවක් අය කිරීමට කිසිදු නීතිමය පදනමක් නොමැති බවද කොළඹ මහ නගර සභාවේ නියෝජිතයා අවධාරණය කර තිබුණා.

එමෙන්ම, පොහොය දිනවලදී සහ විශේෂ නිවාඩු දිනවලදී පොදු රථගාල්වල වාහන නවතා තැබීම සඳහා ගාස්තු අය නොකෙරෙන බවද කොළඹ මහ නගර සභාව තවදුරටත් දැනුම් දෙනවා.

මෙහිදී තවදුරටත් අදහස් දැක්වූ පාලිත නානායක්කාර,

රථගාල් පාලනය කලමණාකරනය කිරීම තුළ වාහනයක් නතරකළ සැනින් ගාස්තුවක් ගෙවන්න නීතියක් නෑ පනවලා. වාහනයක් නතර කරලා පළවෙනි විනාඩි 10 නොමිලේ.

වාහනයක් නවත්වන වෙලාව දාලා චිට් එකක් දෙන්න පුළුවන්. විනාඩි දහය ඉක්මවා ගියොත් තමයි ඒ පුද්ගලයාට රුපියල් 70ක මුදලක් අය කරන්න නියම කරලා තියෙනනේ. ඊට වඩා මුදලක් ගන්න කිසිසේත්ම බෑ.

ඒ වගේම පෝය දිනවල සහ විශේෂ නිවාඩු දිනවලදී අපි අයකිරීම් සිද්ධ කරන් නෑ.