ගණේමුල්ල සංජීවගේ ඝාතනය ගැන තවත් කරුණු හෙලිවෙයි!

අලුත්කඩේ මහෙස්ත්‍රාත් අධිකරණයේදී ඝාතනයට ලක්වූ ගණේමුල්ල සංජීවගේ දේහය මේවන විට බොරැල්ලේ පිහිටි පෞද්ගලික මල්ශාලාවක තැම්පත් කර ඇත.

පොලිසිය සිදුකළ විමර්ශනවලදී අනාවරණ වී ඇත්තේ කෙසෙල්බද්දර පද්මේගේ පියාව ඝාතනය කිරීමට පළිගැනීමක් ලෙස ගණේමුල්ල සංජීව ඝාතනය සිදුකර ඇති බවයි.

සංජීව කුමාර සමරරත්න හෙවත් ගණේමුල්ල සංජීව පසුගිය 19 වනදා අලුත්කඩේ ප්‍රධාන මහෙස්ත්‍රාත් අධිකරණයේ අංක 5 මැදිරියේ විත්තිකූඩුව තුළදි ඝාතනයට ලක් වු අතර ඝාතනය සිදුකළ වෙඩික්කරු පලා යමින් සිටියදී එදිනම අත්අඩංගුවට ගනු ලැබුවේ පුත්තලම, පාලවිය ප්‍රදේශයේදීය.

ඔහු පලා යාමට භාවිත කළ වෑන් රථයේ රියදුරුද එහිදී අත්අඩංගුවට ගත් අතර එහිදී අනාවරණ වී ඇත්තේ අදාළ වෑන් රථය ද ව්‍යාජ අංක තහඩු යොදා භාවිත කර ඇති බවයි.

වෙඩික්කරුගෙන් සිදුකළ ප්‍රශ්න කිරීම්වලදී ඔහු පවසා ඇත්තේ, ඔහු හා ඝාතනය සඳහා භාවිත කළ ගිනිඅවිය රැගෙන ආ කාන්තාව පසුගිය 17 වෙනිදා කඩුවෙල පිහිටි ලැගුම්හලක් වෙත පැමිණි බවයි. එහි ලැඟුම්ගෙන සිටියදී මෝටර් රථයකින් පැමිණි අයෙකු විසින් වෙඩික්කරුට හා අදාළ කාන්තාවට පාර්සලයක් ලබාදී පිටව ගොස් ඇත.

එම පාර්සලයේ වෙඩික්කරු හැඳ සිටි නීතීඥ ඇඳුම ඇතුළු භාණ්ඩ කිහිපයක් තිබී ඇති බව පොලිසිය අනාවරණ කරගෙන ඇත.

අනතුරුව වෙඩික්කරු හා අනෙක් කාන්තාව ඝාතනය සිදු වූ දින උදෑසන ඔවුන්ට පාර්සලය දුන් පුද්ගලයා විසින් හොන්ඩා ෆිට් වර්ගයේ මෝටර් රථයකින් අලුත්කඩේ අධිකරණය අසලට රැගෙන විත් ඇති අතර ඒ අනුව කොළඹ අපරාධ කොට්ඨාසයේ නිලධාරීන් වෙඩික්කරුවන් ප්‍රවාහනය කළ මෝටර් රථය සිය භාරයට ගනු ලැබුවා.

එමෙන්ම අදාළ කාන්තාව සමග ඝාතනයට පෙර සහ පසුව සබඳතා පවත්වන ලද මීගමුව පොලිස් ස්ථානයට අනුයුක්තව සේවය කළ පොලිස් කොස්තාපල්වරයෙකු ද කොළඹ අපරාධ කොට්ඨාසය මගින් අත්අඩංගුවට ගෙන ඇත.