වනඅලි දුම්රියේ ගැටීමෙන් සිදුවන අනතුරු වළක්වාගැනීම සඳහා කඩිනම් පියවර රැසක් – ඩිජිටල් ඇතුළු නව තාක්ෂණ ක්‍රමවේද ගැනත් අවධානය යොමුවෙයි!

වනඅලි දුම්රියේ ගැටීමෙන් සිදුවන අනතුරු වළක්වාගැනීම සඳහා කඩිනම් පියවර රැසක් ගැනීමට ඊයේ පාර්ලිමේන්තු පරිශ්‍රයේ පැවති විශේෂ සාකච්ඡාවකදී තීරණය කර ඇති බව වාර්තා වේ. ප්‍රවාහන හා මහාමාර්ග අමාත්‍ය බිමල් රත්නායක, පරිසර අමාත්‍ය ධම්මික පටබැඳි යන අයගේ ප්‍රධානත්වයෙන් එම සාකච්ඡාව පවත්වා ඇති බව සඳහන් වේ.

ගල්ඔය – හිඟුරක්ගොඩ අතර 141ක් වන සැතපුම් කුණුව අසලදී දුම්රියේ ගැටී වන අලි 6 දෙනෙකු මියයාමේ සිද්ධියත් සමග මෙම සාකච්ඡාව පවත්වා ඇත.

ප්‍රවාහන, පරිසර, ඩිජිටල් යන අමාත්‍යංශ, දුම්රිය හා වනජීවි දෙපාර්තමේන්තුව සහ ඊට අදාළ ආයතනවල ඉහළ නිලධාරීන් ද විවිධ පරිසර හා වනජීවී සුරකින සංවිධාන ද මෙම සාකච්ඡාව සඳහා එක්වී සිටි බව වාර්තා වේ.

එහිදී වනඅලි අනතුරු බහුල අදාළ ප්‍රදේශයේ දුම්රිය මඟ දෙපස වඩාත් දෘෂ්‍යමාන වන ලෙස හෙළිපෙහෙළි කිරීමටත්, ඩිජිටල් ඇතුළු නව තාක්ෂණ ක්‍රමවේද භාවිත කිරීම පිළිබඳව වැඩි අවධානය යොමුවී ඇති බවත් සඳහන් වේ.

දුම්රියවල ආලෝක පද්ධති ඉදිරියට මෙන්ම දෙපසටත් විහිදෙන ලෙස සවිකිරීම සහ කහ ආලෝක වෙනුවට සුදු පැහැති ආලෝකය භාවිත කිරීමටත් එහිදී සාකච්ඡා කොට ඇත.

මීට අමතරව සාකච්ඡාවේ දෙවන අදියර ලෙස හෙට (22) මෙම අනතුරු සිදුවූ ස්ථානයට සියලුම පාර්ශ්වයන් ගොස් පුළුල් නිරීක්ෂණයක් කර අදාළ තීරණ සහ තවත් ක්‍රියාත්මක කළ යුතු තීරණ ඇත්නම් ඒවාද ක්‍රියාත්මක කිරීමට සැලසුම් කර ඇති බව වාර්තා වේ.