වැඩබලන පොලිස්පති සහ පොලිස් කොමිසම අතර ගැටු​ම්!

පොලිස් ස්ථානාධිපතිවරුන්ට මෑතකදී දුන් ස්ථාන මාරුවීම් සම්බන්ධයෙන් වැඩ බලන පොලිස්පති ප්‍රියන්ත වීරසූරිය සහ ජාතික පොලිස් කොමිසම අතර හටගෙන ඇති ආරවුල ආණ්ඩුක්‍රම ව්‍යවස්ථා සභාව දක්වා ගොස් ඇත.

පොලිස් ස්ථානාධිපතිවරුන්ට පත්වීම් ලබාදීමේ වගකීම තමාට පවරන ලෙස වැඩබලන පොලිස්පති ප්‍රියන්ත වීරසූරිය මහතා ජාතික පොලිස් කොමිසමෙන් පසුගිය සතියේදී ලිඛිතව ඉල්ලීමක් කර ඇතත්, එයට ලිඛිතව ප්‍රතිචාර දක්වමින් ජාතික පොලිස් කොමිසම එම ඉල්ලීම ප්‍රතික්ෂේප කර ඇති අතර, එම ලිපියේ පිටපතක් ජාතික පොලිස් කොමිසම ආණ්ඩුක්‍රම ව්‍යවස්ථා සභාවට ද යොමුකර තිබේ.

පොලිස් දෙපාර්තමේන්තුවේ අභ්‍යන්තර කටයුතු වලට ජාතික පොලිස් කොමිසම මැදිහත් වන බවට වැඩ බලන පොලිස්පති ප්‍රියන්ත වීරසූරිය චෝදනා කිරීමත් සමග, පොලිස් කොමිසම වැඩබලන පොලිස්පතිවරයා අතර හටගෙන ඇති ආරවුල (22) මාධ්‍ය හමුවේදී ප්‍රසිද්ධ කරළියට පැමිණියේය.

එහිදී වීරසූරිය මහතා ප්‍රකාශ කර සිටියේ ස්ථාන මාරුවීම් ලබා දීමට අවශ්‍ය බලය නොමැතිව තමන් නමට පමණක් සීමා වූ පොලිස්පතිවරයකු වනු ඇති බවයි.

ලබාදුන් ස්ථාන මාරුවීම සම්බන්ධයෙන් නීතිපතිවරයාගේ මතය විමසා සිටි බවත්, එහිදී තමන් ලබාදී ඇත්තේ පත්වීම නොව ස්ථාන මාරුවීම් බැවින් ඒ සඳහා පොලිස්පතිවරයාට බලය තිබෙන බව නීතිපති දෙපාර්තමේන්තුව දන්වා ඒවා ඇති බවත් වැඩබලන පොලිස්පති ප්‍රියන්ත වීරසූරිය (22) පැවැති මාධ්‍ය හමුවේදී ප්‍රකාශ කළේය.

කෙසේ නමුත් වැඩබලන පොලිස්පතිවරයා කරන තරයේ මෙම චෝදනාව ප්‍රතික්ෂේප කරන බවත්, ආණ්ඩුක්‍රම ව්‍යවස්ථාවෙන් කොමිසමට ලබා දී ඇති බලය තුළ කොමිසම ක්‍රියා කරන බවත් ජාතික පොලිස් කොමිසමේ නම ප්‍රකාශ කිරීමට අකැමැති ආරංචිමාර්ග පැවැසුවේය.

පොලිස් ස්ථානාධිපතිවරුන්ට පත්වීම් ලබාදීමේදී තිබෙන ක්‍රියා පටිපාටියෙන් ජාතික පොලිස් කොමිසමට බැහැර විය නොහැකි බවත් එම ආරංචි මාර්ග ප්‍රකාශ කළේය.

පොලිස් ස්ථානාධිපතිවරුන් ලෙස නිර්දේශ කරන පත්වීම් අනුමත කිරීමේදී රාජ්‍ය සේවා කොමිෂන් සභාව විසින් නියම කරන ලද ක්‍රියා පටිපාටියක් තිබෙන බවත්, එම ක්‍රියාපටිපාටියෙන් බැහැරව ජාතික පොලිස් කොමිසමට කටයුතු කළ නොහැති බවත් ජාතික පොලිස් කොමිසමේ ආරංචි මාර්ග පැවැසුවේය.

වැඩ බලන පොලිස්පති ප්‍රියන්ත වීරසූරිය මේ දක්වා පොලිස් ස්ථානාධිපතිවරුන් 197 දෙනෙකු සඳහා නිර්දේශ ඉදිරිපත් කර තිබෙන බවත්, ඉන් 140 කට ජාතික පොලිස් කොමිසම අනුමැතිය ලබාදී තිබෙන බවත් වාර්තා විය.

කීපදෙනෙකුට ස්ථානාධිපති පොලිස් ධූරය හෙබවීමට අවශ්‍ය සුදුසුකම් නොතිබීම හේතුවෙන් නිර්දේශ කීපයක් ජාතික පොලිස් කොමිසම රඳවාගෙන තිබෙන බව ද පැවැසෙයි.

පත්වීම නිසි ලබාදීමේදී ක්‍රියාපටිපාටිය අනුගමනය නොකළහොත් අධිකරණයේදී එම පත්වීම් අභියෝගයට ලක්විය හැකි බවත්, අතීතයේදී එලෙස සිදු වී තිබෙන බවත් ජාතික පොලිස් කොමිසමේ ආරංචිමාර්ග ප්‍රකාශ කළේය.

ජාතික පොලිස් කොමිසමට මෙම බලතල තබාගෙන සිටීමට අවශ්‍යතාවක් නොමැති බවත්, කොමිසම කටයුතු කරන්නේ නීතියේ රාමුව සිට බවත් ආරංචිමාර්ග පැවැසුවේය.

එම බලතල පොලිස්පතිවරයාට ලබාදීමට නම් ප්‍රථමයෙන් ඒ පිළිබඳ නීතිපති මතය විමසීමට සිදුවන බව එම ආරංචි මාර්ග ප්‍රකාශ කළේය.

21 වැනි ආණ්ඩුක්‍රම ව්‍යවස්ථා සංශෝධනය යටතේ පොලිස්පතිවරයා හැර අනෙකුත් පොලිස් නිලධාරීන් පත්කිරීම, උසස්වීම් ලබාදීම, ස්ථාන මාරුවීම් ලබාදීම, විනය පාලනය සහ සේවයෙන් පහ කිරීම සම්බන්ධයෙන් ජාතික පොලිස් කොමිසමට බලතල ඇත.

පොලිසිය අධීක්ෂණය කරන ස්වාධීන ආයතනයක් ලෙස කටයුතු කිරීමට බලය ඇති ජාතික පොලිස් සේවා කොමිසම පත්කර ඇති ප්‍රධාන අරමුණ වන්නේ පොලිස් දෙපාර්තමේන්තුව දේශපාලනයෙන් තොර කිරීමයි.

විශ්‍රාමලත් මහාධිකරණ විනිසුරු ලලිත් ඒකනායක ජාතික පොලිස් කොමිසමේ සභාපතිත්වය දරන අතර, කොමිසමේ සෙසු සාමාජිකයන් ලෙස විශ්‍රාමික අමාත්‍යාංශ ලේකම රේණුකා ඒකනායක, විශ්‍රාමික දිස්ත්‍රික් ලේකම් කේ. කරුණාහරන්, නීතිඥ ඩිල්ෂාන් කපිල ජයසූරිය, ජනාධිපති නීතිඥ ඒ. ඒ. එම්. ඉලියාස් විශ්‍රාමික නියෝජ්‍ය පොලිස්පති ජයන්ත ජයසිංහ යන අ​ය කටයුතු කරති.