වෛද්‍යවරුන්ගේ වැටුප් වැඩි වන ආකාරය සෞඛ්‍ය අමාත්‍ය නලින්ද පැහැදිලි කරයි!

වැටුප් වැඩිවීම සම්බන්ධයෙන් ඇතැම් වෛද්‍යවරුන් අනවබෝධයෙන් පසු වන බව සෞඛ්‍ය අමාත්‍ය නලින්ද ජයතිස්ස පවසයි.

අද (04) පාර්ලිමේන්තුවේදී වෛද්‍යවරුන්ගේ වැටුප් වැඩි වන ආකාරය සම්බන්ධයෙන් පැහැදිලි කිරීමක් සිදු කරමින් අමාත්‍යවරයා සඳහන් කළේ වෘත්තීය සමිති අරගලයක් නොමැති අවස්ථාවකදී වුවත් සමස්ත රාජ්‍ය සේවයට මෙන්ම වෛද්‍යවරුන්ටද දැනෙන වැටුප් වැඩිවීමක් නව රජය විසින් ලබා දී ඇති බවයි.

මූලික වැටුප, අමතර රාජකාරි දීමනා, නිවාඩු දින දීමනා, වාර්ෂික වැටුප් වර්ධකය වශයෙන් කොටස් කිහිපයකින් මෙම වැටුප් වැඩිවීම සිදු වන අමතර ඊට අමතරව payee tax එකෙන් බදු සහනයක්ද ලබා දෙන බව නලින්ද ජයතිස්ස පවසයි.

එහිදි අදහස් දැක් වූ අමාත්‍යවරයා,

රාජ්‍ය සේවයට ඇතුළත්වන වෛද්‍යවරයෙකුගේ මූලික වැටුප රුපියල් 54, 290 යි. එම වැටුප රුපියල් 94,150 දක්වා වැඩි කරනවා. මූලික වැටුප හැටියට. ඒ කියන්නේ වෛද්‍යවරයෙකුගේ මූලික වැටුප රුපියල් 39,860කින් වැඩිවීම වෙනවා. අනෙකුත් දීමනා සියල්ල එකතු වුණාට පස්සේ සාමාන්‍යයෙන් වෛද්‍යවරයෙකුගේ දළ වැටුප 240,000ක් පමණ වෙනවා.

මේකේ පළවෙනි අදියරය හැටියට අප්‍රේල් මාසයේදී විතරක්, වැටුප් වැඩිවීමෙන් රුපියල් 15,582ක් ලැබෙනවා. Grade II අයත්වන වෛද්‍යවරයෙකුට මූලික වැටුප තිබ්බේ රුපියක් 58,305යි. ඒ වැටුප රුපියල් 101,370 දක්වා වැඩි වෙනවා. ඒ කියන්නෙ රුපියල් 43,065කින් මූලික වැටුප වැඩි වෙනවා.

Grade I වෛද්‍යවරයෙකුට දැන් තියෙන මූලික වැටුප රුපියල් 71,805 යි. ඒක රුපියල් 125,670 දක්වා වැඩි වෙනවා මූලික වැටුප් වැඩිවීම රුපියල් 53,865යි. කණිෂ්ඨ විශේෂඥ වෛද්‍යවරයෙකුට දැන් ලැබෙන මූලික වැටුප රුපියල් 88,000‍යි. ඒක රුපියල් 156,000 දක්වා වැඩි වෙනවා. මූලික වැටූප් වැඩි වීම රුපියල් 68,000‍යි.

මෙම මූලික වැටුපෙන් දැනෙන කොටසක් මේ අප්‍රේල් මාසයේදී ලැබෙන බවත් තවත් කොටසක් 2026 ජනවාරී මාසයේදීත්, 2027 ජනවාරි මාසයේදීත් එනම් මාස 20ක් ඇතුළත් රුපියල් 40,000 සිට 68,000 දක්වා වන වැටුප් වැඩිවීම් ලැබෙන බවත් අමාත්‍යවරයා මෙහිදී සදහන් කලේය.