දක්ෂිණ අධිවේගී මාර්ගයේ බස් රථ ධාවනයෙන් ඉවත් වෙයි!

දක්ෂිණ අධිවේගී මාර්ගයේ හොරණ කඩවත සහ පානදුර කඩවත සුඛෝපභෝගී බස් රථ ගාස්තු ගැටලුවක් මුල් කර ගනිමින් අද ධාවනයෙන් ඉවත් වී ඇති බව බස් රථ හිමියන් පවසයි.

එම බස් රථවලින් දැනට අය කරන මුදල රුපියල් 400ක් වන අතර එය මාර්ගස්ථ ප්‍රවාහන අධිකාරිය සහ ශ්‍රී ලංකා ගමනාගමන කොමිෂන් සභාව එක්ව සිදු කරන ලද සංශෝධනයකට අනුව හොරණ කඩවත බස් මාර්ගයේ රුපියල් 330ක ගාස්තුවක්ද පානදුර කඩවත මාර්ගයේ රුපියල් 360 ගාස්තුවකට යටත්ව මාර්තු 1 වැනිදා සිට ධාවනය කළ යුතු බවට කරන ලද දැනුම් දීමක් හේතුවෙන් මෙම වර්ජනය ආරම්භ කර ඇති බවයි තොරතුරු වාර්තා වන්නේ.

පවතින ආර්ථික තත්ත්වය හමුවේ ඉන්ධන අමතර කොටස්වල මිල ඉහළ යෑම වැනි ගැටලු හේතුවෙන් එම ගාස්තු යටතේ ධාවනය කළ නොහැකි මට්ටමක් පැවතීම හේතුවෙන් මෙම වර්ජන ක්‍රියාමාර්ගය ගත් බවයි බස් රථ හිමියන් වැඩිදුරටත් සඳහන් කළේ.

බස් රථ හිමියන් අද දින ගමනාගමන කොමිෂන් සභාවේ සභාපතිවරයා සහ බස්නාහිර පළාත් මාර්ගස්ථ ප්‍රවාහන අධිකාරියේ නිලධාරීන් සමග සාකච්ඡාවක් පවත්වා ඇති අතර එහිදී මේ තත්ත්වය පිළිබඳ ඔවුන් පිළිගත් බවත් මේ පිළිබඳව ලිඛිතව ඉල්ලීම් ඉදිරිපත් කිරීමෙන් අනතුරුව ඉදිරි සතියක් තුළ මේ සඳහා විසඳුම් ලබා දෙන බව එම නිලධාරීන් ප්‍රකාශ කළ බවත් බස් රථ හිමියන් සඳහන් කරයි.

ඒ අනුව ඔවුන් පැවසුවේ හෙට දිනයේ පටන් යළි බස් රථ ධාවනයට එක් කරන බවයි.