හම්බන්තොට ප්‍රාදේශීය ලේකම් කාර්යාලයේ ඩෙඟා නැටූ පුද්ගලයා රිමාන්ඩ් – සම්පූර්ණ සිද්ධිය මෙන්න!

සිය පියාගේ උප්පැන්න සහතිකයකයේ පිටපතක් ලබාගැනීමට හම්බන්තොට ප්‍රාදේශීය ලේකම් කාර්යාලයට පැමිණ එහි සේවකයන් හා ඇති වූ බහින්බස් වීමකින් පසු කාර්යාල දේපළවලට හානිකරමින් කලහකාරී ලෙස හැසිරුණු පුද්ගලයෙකු හම්බන්තොට පොලිසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් පසු සැකකරු මේ මස 19 වන දා දක්වා රක්ෂිත බන්ධනාගාරගත කරන ලෙස හම්බන්තොට මහේස්ත්‍රාත් හා අතිරේක දිසා විනිසුරු ඕෂධ මිගාර මහආරච්චි පෙරේදා (මාර්තු 5) නියම කර ඇත.

මෙලෙස රක්ෂිත බන්ධනාගාර ගත කෙරුණේ හම්බන්තොට කෑලියපුර පහේ කණුව ප්‍රදේශයේ පදිංචි හේවා වලිමුනිගේ චමින්ද ප්‍රදීප් නැමති 50 හැවිරිදි පුද්ගලයෙකි.

සැකකාර පුද්ගලයා පසුගිය 4 වන දා දහවල් දෙකට පමණ හම්බන්තොට ප්‍රාදේශීය ලේකම් කාර්යාලයේ ආයතන අංශයට පැමිණ තිබුණේ සිය පියාගේ උප්පැන්න සහතිකයේ පිටපතක් ලබාගැනීම සඳහා වන අතර එහිදී එම පුද්ගලයා හා ආයතන අංශයේ සේවකයන් අතර වචන හුවමාරුවක් ඇතිව තිබේ.

පසුව එම බහින්බස් වීම දුරදිග ගොස් එහිදී කෝපයට පත් මෙම පුද්ගලයා ආයතන අංශය තුළ කලහකාරී ලෙස හැසිරෙමින් කෑ කෝ ගසන්නට පටන්ගෙන ඇති අතර එහි සේවකයන් එය වළක්වාලීමට උත්සාහ කිරීමේදී එම පුද්ගලයා ආයතන අංශය තුළ තිබූ පුටුවක් රැගෙන එහි පරිගණක කිහිපයකට හා දේපළවලට දැඩි ලෙස හානි සිදුකර ඇත.

මෙම පුද්ගලයාගේ කලහකාරී හැසිරීමත් සමග එහි සේවයේ නිරතව සිටි සේවකයන් ද භීතියට පත්ව කාර්යාලය තුළින් ඉවත්ව තිබේ.

ඔහුගේ කලහකාරී හැසිරීම සම්බන්ධයෙන් එම අවස්ථාවේදී ම හම්බන්තොට ප්‍රාදේශීය ලේකම් කාර්යාලය පරිපාලන නිලධාරිනියක් විසින් හම්බන්තොට පොලිසියට සිදුකළ පැමිණිල්ලකට අනුව හම්බන්තොට පොලිසිය විසින් අදාළ පුද්ගලයා අත්අඩංගුවට ගෙන හම්බන්තොට මහේස්ත්‍රාත් අධිකරණය වෙත ඉදිරිපත් කිරීමට කටයුතු කර ඇත.

සිද්ධිය සම්බන්ධයෙන් හම්බන්තොට පොලිසිය වැඩිදුර විමර්ශන පවත්වන අතර සැකකාර පුද්ගලයා විසින් ප්‍රාදේශීය ලේකම් කාර්යාලයේ ආයතන අංශයට සිදුකරන ලද පාඩුවද රුපියල් ලක්ෂ දෙකකට වැඩි බව තක්සේරුවේදී අනාවරණය වී ඇත.