තැපැල් ඡන්ද අයැදුම්පත් භාර ගැනීම පිලිබඳ දැනුම්දීමක්!

පළාත් පාලන ඡන්ද විමසීමට අදාළ තැපැල් ඡන්ද අයැදුම්පත් භාර ගැනීම ලබන මාර්තු 17 වන දා මධ්‍යම රාත්‍රිය දක්වා දීර්ඝ කරන බව මැතිවරණ කොමිෂන් සභාව පවසයි.

නිවේදනයක් නිකුත් කරමින් එම කොමිෂන් සභාව මේ පිළිබඳව සඳහන් කර ඇත.

එම නිවේදනයේ සඳහන් කර ඇත්තේ, මාර්තු 12 වන දා මධ්‍යම රාත්‍රියෙන් අවසන් වීමට නියමිතව තිබූ පළාත් පාලන ආයතන ඡන්ද විමසීමට අදාළ තැපැල් ඡන්ද අයදුම්පත්‍ර භාර ගැනීමේ දිනය, තැපෑලේදී සිදුවිය හැකි ප්‍රමාදවීම් පිළිබඳව කොමිෂන් සභාව වෙත කරනු ලැබූ ඉල්ලීම් සැලකිල්ලට ගෙන මෙම තීරණය ගත් බවයි.

ඒ අනුව, මාර්තු 17 වන දා මධ්‍යම රාත්‍රී 12:00ට පෙර එම අයැදුම්පත්‍ර අදාළ දිස්ත්‍රික් මැතිවරණ කාර්යාල වෙත ලැබිය යුතු බව මැතිවරණ කොමිෂන් සභාව සඳහන් කරයි.

තවද අයැදුම්පත්‍ර ලැබීමේදී සිදුවිය හැකි ප්‍රමාදය වළක්වා ගැනීම සඳහා මාර්තු 13 වන දා සිට 17 වන දා දක්වා කාලය තුළ සම්පූර්ණ කරන තැපැල් ඡන්ද අයැදුම්පත් තැපෑල භාර දීමෙන් වැළකී ඒවා එක් එක් දිස්ත්‍රික් අනුව වෙන්කර වෙන වෙන ම කවරවල බහා සහතික කිරීමේ නිලධාරී කාර්යාලය පිහිටි දිස්ත්‍රික්කයේ දිස්ත්‍රික් මැතිවරණ කාර්යාලයට අතින් ගෙනවිත් භාර දෙන ලෙස දන්වා ඇත.

එමෙන්ම, මාර්තු 10 වන දා නාමයෝජනා දැන්වීම පළ කළ කිලිනොච්චිය දිස්ත්‍රික්කයේ පූනාකරි ප්‍රාදේශීය සභාව, මන්නාරම දිස්ත්‍රික්කයේ මන්නාරම ප්‍රාදේශීය සභාව හා අම්පාර දිස්ත්‍රික්කයේ දෙහිඅත්තකණ්ඩිය ප්‍රාදේශීය සභාව යන පළාත් පාලන ආයතනවල පමණක් තැපැල් ඡන්ද අයැදුම්පත් භාර ගැනීමේ අවසන් දිනය එළැඹෙන 19 වන දා බව මැතිවරණ කොමිෂන් සභාව පවසා ඇත.