සත්ත්ව සංගණනය හෙට – සියලු ජනතාවගේ සහය ලබා දෙන ලෙස ආණ්ඩුවෙන් ඉල්ලීමක්!

හෙට (මාර්තු 15) වන දින පැවැත්වෙන රිළා, වඳුරු ආ​දි සත්ත්ව සංගණනය​ට සියලු ජනතාවගේ සහයෝගය ලබා දෙන ලෙස කෘෂිකර්ම අමාත්‍යාංශයේ තාක්ෂණික අධ්‍යක්ෂ හේමන්ත අමරසිංහ ඉල්ලීමක් කරයි.

බෝගවලට හානි සිදු කරන වන සතුන් සංගණනය කිරීමේ ජාතික වැඩසටහන ලංකාව පුරාම මේ මස 15 වන දා උදෑසන 8:00 සිට 8:05 දක්වා කාලය තුළ රට ම එක කුටුම්භයක් ලෙස සලකා සිදු කිරීමට නියමිත බවයි ඔහු පවසන්නේ.

මෙම සංගණනය සඳහා අවම වශයෙන් රාජ්‍ය නිලධාරීන් 62,000කට ආසන්න පිරිසක් එක්වන අතර නිවාස 70,000 මූලික කරගෙන පැවැත්වේ.

මෙයට අමතරව, පොදු ස්ථාන, රාජ්‍ය ආයතන, ආගමික ස්ථාන, විශ්වවිද්‍යාල හා පාසල් පරිශ්‍රයන්, වගාබිම්, ගොවිබිම් ආදී විවිධ ස්ථාන 13 ලක්ෂයක් ද මූලික කරගෙන සංගණනය පැවැත්වෙන බවද, ඒ අනුව මෙම සංගණනය ස්ථාන 8,300,000ක එක ම දිනකදී විනාඩි පහක් තුළ සිදුකරන බව ද ඔහු වැඩිදුරටත් පවසා ඇත.

සංගණනයේදී තොරතුරු සටහන් කරන්නට දැනට පත්‍රිකා 70,000 අද (මාර්තු 14) සවස් වන විට ලංකාවේ සෑම නිවෙසකටම ලැබෙන්නට සලස්වන අතර අමතර සංගණන පත්‍රිකා ලබා දෙන්නට රාජ්‍ය නිලධාරීන් සූදානමින් සිටින බවද ඔහු පවසයි.