ඔලිම්පික් ඉතිහාසයේ පළමුවරට මුල් පුටුව කාන්තාවකට හිමිවෙයි!

ජාත්‍යන්තර ඔලිම්පික් කමිටුවේ නව සභාපති ලෙස Kirsty Conventry තේරී පත්ව ඇති බව විදෙස් මාධ්‍යය වාර්තා කරයි.

ඊයේ (20) ග්‍රීසියේ පැවති 144 වන ජාත්‍යන්තර ඔලිම්පික් කමිටු සැසිවාරයේදී පළමු වටයේ ඡන්ද විමසීමෙන්ම බහුතර ඡන්ද ප්‍රමාණයක් ලබා ගනිමින් ඇය එසේ පත්ව ඇති බවයි වාර්තා වන්නේ.

ඒ අනුව Kirsty Conventry වසර 130ක ජාත්‍යන්තර ඔලිම්පික් කමිටු ඉතිහාසයේ සභාපතිනිය ලෙස තේරී පත් වූ පළමු කාන්තාව මෙන්ම එම තනතුරට පත් පළමු අප්‍රිකානු ජාතිකයා වන අතර එම තනතුරට පත් වූ ළාබාලම පුද්ගලයා ද වන බව සඳහන්.

මේ වසරේ ජුනි මාසයේදී ජාත්‍යන්තර ඔලිම්පික් කමිටුවේ දහවන සභාපතිනිය ලෙස ඇය නිල වශයෙන් පත් වනු ඇති අතර ඒ මෙතෙක් ධුරයේ කටයුතු කළ Thomas Bachගේ ඉවත් වීමෙන් පසුවයි.

ඒ අනුව අවම වශයෙන් ඉදිරි වසර 8ක කාලයක් සඳහා ජාත්‍යන්තර ඔලිම්පික් කමිටු සභාපති ලෙස ඇය කටයුතු කරනු ඇත.

1983 වසරේදී උපත ලැබූ Kirsty Conventry සිම්බාබ්වේ ජාතිකයෙකි. 2000 වසරේ සිඩ්නි ඔලිම්පික් ක්‍රීඩා උළෙල ඇයගේ මංගල ඔලිම්පික් ක්‍රීඩා උළෙල වන අතර ඇය 2004 ඇතැන්ස් ඔලිම්පික් ක්‍රීඩා උළෙලේ සහ 2008 බෙයිජිං ඔලිම්පික් ක්‍රීඩා උළෙලේ කාන්තා මීටර් 200 පසුපස ආර පිහිනුම් ඉසව්වේ රන් පදක්කම්ලාභිනිය වේ..

ඉන් අනතුරුව 2016 දී රියෝ ඔලිම්පික්හි අවසන් වරට තරග කළ ඇය ඔලිම්පික් පදක්කම් හතක් එනම් රන් පදක්කම් දෙකක් සහ රිදී පදක්කම් හතරක් සහ ලෝකඩ පදක්කමක් දිනා ගෙන ඇත.

එමෙන්ම ඇය 2018 සිට මේ දක්වා සිම්බාබ්වේහි ක්‍රීඩා අමාත්‍යවරිය ලෙස ද කටයුතු කරන බව විදෙස් මාධ්‍ය වාර්තා කරයි.

කෙසේ නමුත් පළමුව ඇයගේ නායකත්වයෙන් 2026 මිලානෝ ඔලිම්පික් ශීත ඍතු ක්‍රීඩා උළෙල පැවැත්වෙනු ඇති අතර, එහි සමාරම්භක උත්සවයට ඇත්තේ තවත් මාස 11 කටත් වඩා අඩු කාලයකි.