නාමල් රාජපක්ෂගෙන් දේශබන්දු සහ ආණ්ඩුවේ හැසිරීම ගැන ප්‍රකාශයක්!

වත්මන් ආණ්ඩුව දේශබන්දු තෙන්නකෝන්ව සොයායෑමට කටයුතු කළ ආකාරයත් දේශබන්දු තෙන්නකෝන් කළ ක්‍රියාවත් දෙකම එකක් බව පාර්ලිමේන්තු මන්ත්‍රී නාමල් රාජපක්ෂ පවස​යි.

මාධ්‍යට අදහස් දක්වමින් ඔහු කියා සිටියේ, දේශබන්දු තෙන්නකෝන්ට ඇත්තේ පළාතේ පොලීසියට නොදී කොළඹින් කණ්ඩයමක් යවා මෙහෙයුමක් කිරීමේ චෝදනාවක් බවත්, දේශබන්දු තෙන්නකෝන් සෙවීමට ආණ්ඩුව කටයුතු කළෙත් ඒ ආකාරයටම බවත්​ය.

ඒනිසා එම කාර්යයන් දෙකම එකක් බවත් දේශබන්දු තෙන්නකෝන් කළ ක්‍රියාවලිය අසාධාරණ බවට කිව නොහැකි බව නාමල් රාජපක්ෂ පවසයි.

එමෙන්ම යම් කිසි කෙනෙකු වරදක් කර ඇත්නම් සමස්ත පොලිස් පද්ධතියටම පහර ගැසීම වැරදි බවත් ඊට අදාළ නීතිය අධිකරණ පද්ධතිය තුළම ක්‍රියාත්මක කරන ලෙසත් ඔහු එහිදී කියාසිටියි.

ඒ පිළිබඳ වැඩිදුරටත් අදහස් දැක්වූ නාමල් රාජපක්ෂ කියා සිටියේ,

යම් කිසි කෙනෙක් වැරැද්දක් කරලා තියෙනවනම්, ඒක අධිකරණ පද්ධතිය තුළ ක්‍රියාත්මක කරන්න , හැබැයි සමස්ත පොලිස් පද්ධතියටම පහර ගැසීම වැරදියි. එක වෙලාවක හමුදාවෙ හිටපු නිලධාරින් හෝ සෙබළුන් හමුදාව හැර ගිහිල්ලා ඝාතකයෝ බවට පත් වෙලා කියලා, සමස්ත ත්‍රිවිධ හමුදාවටම ගහනවා. අනිත් පැත්තෙන් පොලිස්පතිවරයාගේ ප්‍රශ්නයක් කේන්ද්‍ර කරගෙන මුළු පොලීසියටම ගහනවා. මුළු පොලීසියම සහ පොලීසියෙම ගෞරවය කෙලෙසුවාම, අර යාපනයේ වුණා වගේ අත්අඩංගුවට ගන්න ගියාම පොලීසියටත් ගහලා එලවන තත්වයට පත් වෙනවා. පහුගිය කාලේ ඒක දේශපානඥයන්ටත් වුණා. දැන් පොලීසියටත් වෙනවා. ඒ හින්දා අපි ආණ්ඩුවට කියන්නේ, නීතිය ක්‍රියාත්මක කරන්න. ඒක කාටද කියන ප්‍රශ්නෙ නෙවෙයි. හැබැයි නීතිය ක්‍රියාත්මක කරන මුවාවෙන් මේ රටේ ආයතනවලට තියෙන ගෞරවය කෙලෙසන්න එපා.

ආණ්ඩුව තීන්දුවක් ගත යුතුයි තමන්ගේ ක්‍රියා කලාපය පිළිබඳව. දැන් දේශබන්දුට තියෙන එක චෝදනාවක් තමයි, පළාතේ පොලීසියට දැනුම් නොදී කොළඹින් කණ්ඩායමක් යවලා මෙහෙයුමක් යන අතරතුර යම් සිදුවිමක් සිද්ධ වුණා. ඒකට උපදෙස් දුන්නා කියලා. හැබැයි ඉතින් එතුමාව හොයන්නෙත් ඒ විදිහටනම්, එතකොට එතුමා කරපු ක්‍රියාවලිය අසාධාරණයි කියලා අපි කොහොමද කියන්නේ. මේ දෙකම එකයිනේ”