බාලවයස්කාර දැරියකට ලිංගික හිංසන සිදු කල අපරාධකරුවෙකුට අධිකරණය දුන් තීන්දුව මෙන්න!

නව හැවිරිදි බාලවයස්කාර දැරියකට ලිංගික හිංසන සිදුකිරීමේ චෝදනාවට වරදකරු කෙරුණු 59 හැවිරිදි පුද්ගලයකුට කොළඹ මහාධිකරණය විසින් බරපතළ වැඩසහිත වසර 15ක සිරදඬුවම් නියම කර ඇති බව වාර්තා වේ. කොළඹ මහාධිකරණ විනිසුරු නවරත්න මාරසිංහ විසින් තීන්දුව ලබා දුන්නේය.

ඊට අමතරව විත්තිකරුට රුපියල් 75000/-ක දඩයක් නියම කළ මහාධිකරණ විනිසුරුවරයා එම දඩ මුදල ගෙවීම පැහැර හරිනු ලැබුවොත් අමතරව වසරක ලිහිල් සිරදඬුවම් නියම කරන බවත් තීන්දුවේ සඳහන් කර ඇත.

ඊට අමතරව විත්තිකරු විසින් අතවරයට පත් දැරියට ලක්ෂ තුනක වන්දියක් ගෙවිය යුතු බවට නියෝග කළ අතර එම වන්දි මුදල ගෙවීම පැහැර හරිනු ලැබූවොත් අමතරව තවත් වසරක ලිහිල් සිරදඬුවම් නියම කරන බවත් විනිසුරුවරයා සිය තීන්දුවේ සඳහන් කර ඇත.

මෙසේ දඬුවම් නියම වුණේ 59 හැවිරිදි වියේ පසු වන ජංගම එළවළු වෙළෙන්දෙකුටයි.

මෙම විත්තිකරු විසින් 2011 වසරේ 09 වන වියේ පසුවූ පාසල් දැරියකට ටොපි චොක්ලට් ලබාදී හිතවත් කමක් ඇති කරගෙන ඇය රවටා මෙම ලිංගික අතවරය සිදුකර ඇති බව නඩු විභාගයේදී අනාවරණය වී ඇත.

තීන්දුව ප්‍රකාශයට පත් කරමින් විනිසුරුවරයා කියා සිටියේ, මෙය ඉතා බරපතළ සිද්ධියක් බවය.

අතවරයට පත් දැරිය සහ අධිකරණ වෛද්‍ය නිලධාරියා විසින් ඉදිරිපත් කළ සාක්ෂි අතර ගැලපීමක් දක්නට තිබෙන බවත් විනිසුරුවරයා සිය තීන්දුවේ පෙන්වා දී ඇති අතර මෙවැනි සිද්ධීන් ශිෂ්ඨ සම්පන්න සමාජයක් විසින් කිසිසේත්ම අනුමත නොකරන බවත් ඒවා මනූෂ්‍යත්වයට නොගැලපෙන ක්‍රියාවක් බවත් ඔහු පවසා ඇත.

පිළිකුල් සහගත මෙවැනි ක්‍රියාවන් පිළිබඳව සැහැල්ලුවෙන් කටයුතු කිරීමට හැකියාවක් නොමැති බවත් ඒ අනුව ඔහුට මෙම දඬුවම් නියම කරන බවත් විනිසුරුවරයා සඳහන් කර සිටියේය.