හිටපු සෞඛ්‍ය ඇමති කෙහෙළියගේ මගඩියක් කෝප් කමිටුවේදි හෙලි වෙයි – විස්තරය මෙන්න!

ජාතික ඹෟෂධ නියාමන අධිකාරියේ ඇගැයීමකින් තොරව පෞද්ගලික සමාගමකට ඖෂධ වර්ග 38ක් ආනයනය කිරීම සඳහා ලියාපදිංචිය නිදහස් කිරීමේ සහතික නිකුත් කිරීමට හිටපු සෞඛ්‍ය ඇමති කෙහෙළිය රඹුක්වැල්ල විසින් අවසර දී ඇති බව පොදු ව්‍යාපාර පිළිබඳ කාරක සභාවේදී අනාවරණය වි ඇත.

ඒ අනුව 2022 වසරේදී ‘Savorite’ නමැති පෞද්ගලික සමාගමට මෙම ඖෂධ ආනයනයට අවසර දී තිබේ.

එමෙන්ම, මෙම Savorite නමැති පෞද්ගලික සමාගම මෙලෙස ඖෂධ ආනයනය කිරීම සඳහා තෝරා ගන්නා ලෙසට උපදෙස් ලබා දී ඇත්තේ හිටපු සෞඛ්‍ය අමාත්‍යවරයාම බව හිටපු සෞඛ්‍ය අමාත්‍යාංශ ලේකම්වරයා කාරක සභාවට දන්වා ඇත.

ජාතික ඖෂධ නියාමන අධිකාරියේ 2022, 2023 සහ 2024 වර්ෂයන්ට අදාළ විගණකාධිපති වාර්තා සහ වර්තමාන කාර්ය සාධනය පරීක්ෂා කිරීමට පොදු ව්‍යාපාර පිළිබඳ කාරක සභාව (කෝප්) සභාපති පාර්ලිමේන්තු මන්ත්‍රී නිශාන්ත සමරවීරගේ සභාපතිත්වයෙන් පසුගිය දා පාර්ලිමේන්තුවේදී රැස්වූ අවස්ථාවේදී මේ පිළිබඳ කරුණු අනාවරණය විය.

ජාතික ඖෂධ නියාමන අධිකාරිය විසින් ටෙන්ඩර් පටිපාටියෙන් තොරව ඉදිරිපත් වූ ඖෂධ වර්ග 38ක් ආනයනය කිරීම Savorite නමැති පෞද්ගලික සමාගමක් වෙත ලියාපදිංචි නිදහස් කිරීමේ සහතික නිකුත් කර ඇත්තේ ජාතික ඖෂධ නියාමන අධිකාරියේ ඇගයීමකින් තොරව බවට කාරක සභා සභාපතිවරයා සභාව දැනුවත් කළේ ය.

එම ඖෂධ වර්ගවල ගුණාත්මක බව, ආරක්ෂාකාරී බව හා ප්‍රත්‍යක්ෂ බව (Quality, Safety, efficacy) සඳහා වන වගකීම ජාතික ඖෂධ නියාමන අධිකාරිය පිහිටුවීමේ අරමුණ බවත් වෛද්‍ය සැපයුම් අංශයට එය භාර දිය නොහැකි බවත් පවසමින් ජාතික ඖෂධ නියාමන අධිකාරිය එහි වගකීම අත්හැර දමා ඇති බව කාරක සභා සභාපතිවරයා වැඩිදුරටත් පවසා ඇත.

එහිදී අදහස් දැක්වූ ඖෂධ නියාමන අධිකාරියේ හිටපු අධ්‍යක්ෂ මණ්ඩල සාමාජිකයෝ, තමන් සඳහා ලැබුණු අදාළ ඉල්ලීම, විශේෂ ක්‍රමවේදයකට (Special pathway) ඖෂධ ආනයනය කිරීම යටතේ පූර්ව අනුමැතියක් සහිතවම වීම හේතුවෙන්, නිසි ඇගයීමක් සිදු නොකර අධ්‍යක්ෂ මණ්ඩලයට ඒ සඳහා අවසර ලබා දීමට නොහැකි බැවින් වගකීම භාර නොගත් බව පැවසූහ.

ඒ අනුව, මේ පිළිබඳව කාරක සභාවේදී දීර්ඝ ලෙස සාකච්ඡා කෙරුණු අතර, එහිදී මාස 3ක් සඳහා හිඟ ඖෂධ ආනයනය කිරීම සඳහා Savorite නමැති පෞද්ගලික සමාගම තෝරා ගැනීමට උපදෙස් ලබා දීම සිදු කළේ හිටපු සෞඛ්‍ය අමාත්‍යවරයා බව කාරක සභාව අනාවරණය කරගෙන ඇත.

එහිදී අදහස් දැක්වූ විගණකාධිපතිවරයා, පෙර ඇණවුම් කරන ලදුව ලැබීමට නියමිතව තිබූ ඖෂධ වර්ග ද, ශුන්‍ය මට්ටමකට ළඟා වී ඇති ඖෂධ වර්ග ලෙස හුවා දක්වමින් එම ඖෂධ ද ආනයනය කිරීමට කටයුතු කර ඇති බව ප්‍රකාශ කළේ ය.

මේ අනුව, මෙම අමාත්‍ය මණ්ඩල සන්දේශය සකස් කිරීමට සම්බන්ධ වූ නිලධාරීන් කවුද යන්න පිළිබඳව පූර්ණ වාර්තාවක් කාරක සභාවට යොමු කරන ලෙසට සභාපතිවරයා නිලධාරීන්ට උපදෙස් ලබා දුන්නේ ය.