ජනාධිපති අරමුදලෙන් මුදල් ලබා ගැනීමට ගොස් අගතියට පත්වූවා නම් දැනුම්දෙන්න – අපරාධ පරීක්ෂණ දෙපාර්තමේන්තුව කියයි!

2008 සිට 2024 දක්වා කාලය තුළදී ජනාධිපති අරමුදලෙන් මුදල් ලබාගැනීමට ගොස් අගතියට පත්වූවේ නම් ඒ බව අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත ලිඛිතව දැනුම්දෙන ලෙස අපරාධ පරීක්ෂණ දෙපාර්තමේන්තුවේ මූල්‍ය හා වානිජ අපරාධ විමර්ශන අංශය මහජනතාවගෙන් ඉල්ලා සිටියි.

ඉකුත් 2008 වසරේ සිට 2024 වසර දක්වා කාලය තුළ ජනාධිපති අරමුදලින් මුදල් ලබාගැනීමට අදාළව හිටපු මැතිඇමතිවරුන් ඇතුළු මහජන නියෝජිතයන් විසි දෙදෙනෙකු සම්බන්ධන්ධයෙන් අපරාධ පරීක්ෂණ දෙපාර්තමේන්තුවේ මූල්‍ය හා වානිජ අපරාධ විමර්ශන අංශය මගින් විමර්ශනයක් ආරම්භ කර ඇත.

එම විමර්ශනවලට සමගාමීව සිදුකරන පරීක්ෂණ කටයුතු සඳහා, අදාළ අගතියට පත්වූ පිරිස් සිටීනම් එම පිරිසගෙන් අපරාධ පරීක්ෂණ දෙපාර්තමේන්තුවේ මූල්‍ය හා වානිජ අපරාධ විමර්ශන අංශය විසින් මෙම ඉල්ලීම සිදුකර තිබේ.

එම දෙපාර්තමේන්තුවට ලැබුණු පැමිණිල්ලකට අනුව මෙම විමර්ශන කටයුතු සිදු කරනු ලබයි.

විමර්ශනයට අදාළව ජනාධිපති අරමුදලේ ගිණුමෙන් නිකුත් කරන ලද චෙක්පත් පිළිබඳ විස්තර ලබාගැනීම සඳහා විමර්ශන නිලධාරීන් කොටුව මහෙස්ත්‍රාත් අධිකරණයෙන් පසුගිය (02) දා නියෝගයක් ද ලබාගෙන තිබුණි.

ඒ අනුව අදාළ අරමුදලින් මුදල් ලබාදීම සම්බන්ධයෙන් වූ ලිපිගොනු 22ක් විමර්ශන නිලධාරීන් භාරයට ගෙන ඇති බව පොලීසිය පවසයි.

එම ගොනුවලට අනුව මහජන නියෝජිතයන් විසි දෙදෙනෙකු විවිධ මුදල් ප්‍රමාණයන් වශයෙන් රුපියල් කෝටි 10කට අධික මුදලක් ලබාගෙන ඇති බවට ද අනාවරණ වී තිබේ.

ඒ අතරින් කෙහෙලිය රඹුක්වැල්ල, දි.මූ. ජයරත්න හා ටී.බී. ඒකනායක යන මහත්වරුන් නැවත ලබාදෙන පදනමින් අරමුදලෙන් මුදල් ලබාගෙන ඇති අතර ඔවුන් නැවත එම මුදල් පියවා ඇත්ද යන්න පිළිබඳව ද විමර්ශන ක්‍රියාත්මක බවද වාර්තා වේ.

මුදල් ලබාගත් මහජන නියෝජිතයින් ඉදිරියේදී අපරාධ පරීක්ෂණ දෙපාර්තමේන්තුව වෙත ගෙන්වා ප්‍රකාශ සටහන් කරගැනීමට නියමිත බව විමර්ශන නිලධාරින් පවසයි.