වැලිකඩ පොලිස් අත්අඩංගු​වේ සිට රෝහල් ගත කල තරුණයෙ​කු හදිසියේ ජීවිතක්ෂයට – විස්තරය මෙන්න!

වැලිකඩ පොලිස් අත්අඩංගුවෙ සිටි තරුණයෙකු අසාධ්‍යව රෝහලට ඇතුලත් කිරිමෙන් අනතුරුව මිය ගිය සිදුවීමක් වාර්තා වේ.

එම තරුණයා පසුගිය (01)වනදා රාජගිරිය ප්‍රදේශයේ බෝඩිමක් සොයාගෙන යන අතරතුර කිසියම් පිරිසක් ත්‍රීරෝද රථයකින් ඔහුව ලුහුබැඳගෙන ගොස් ඇති අතර ඉන් බියට පත් වූ අදාළ තරුණයා අසළ පිහිටා තිබූ නිවසකට දිව ගොස් ඇත.

එම අවස්ථාවෙදි එහි සිටි පිරිස සොරෙක් යැයි සිතා ඔහු ගස් බැඳ ඉන් අනතුරුව 119 පොලිස් හදිසි ඇමතුම් අංකයට අමතා පොලිසියට බාර දි ඇති බවයි වාර්තා වන්නේ.

ඔහු අත්අඩංගුවේ සිටියදි අසාධ්‍ය​ව ඇති අතර මුල්ලේරියාව රෝහකට ඇතුලත් කිරිමෙන් අනතුරුව මියගොස් ඇත. මෙලෙස මියගොස් ඇත්තෙ වයස අවුරුදු 26ක මීගහකිවුල ප්‍රදේශයෙ පදිංචි තරුණයෙකි.

ඔහු රෝහල් සාත්තු සේවය පිලිබඳ පාඨමාලාවක් හදාරමින් සිට ඇති අතර, නිරූපණ ශිල්පියෙකු සහ නර්ථන ශිල්පියෙකු බවද වාර්තා වේ.

මේ අතර වැලිකඩ පොලිසියේ අත්අඩංගුවට පත් වූ ඔහු එදින එනම් පසුගිය (01)වනදා සිය මවට ඇමතුමක් ගෙන පොලිස් නිලධාරින් විසින් තමන්ට හිරිහැර කරන බවට දැනුම්දී ඇති බවටද තොරතුරු වාර්තා වේ.

කෙසේ නමුත් මෙ සම්බන්ධයෙන් වැලිකඩ පොලිසියේ නිළධාරීන් ඇතුලු 20 දෙනෙකුගෙන් පමණ ප්‍රකාශ සටහන් කරගෙන විමර්ශන කටයුතු සිදුකෙරෙන බව නුගේගොඩ කොට්ඨාස අපරාධ විමර්ෂණ ඒකකය පවසයි.

මේ සම්බන්ධයෙන් සිරකරු අයිතිවාසිකම් සුරැකීමේ කමිටුවේ විධායක අධ්‍යක්ෂ නීතිඥ සේනක පෙරේරා විසින් පරීක්ෂණයක් පවත්වන ලෙස ඉල්ලා පොලිස්පතිවරයාට ලිපියක්ද යොමු කර ඇත.

නීතිඥ සේනක පෙරේරා,

මේ තරුණයා පොලිස් අත්අඩංගුවේ සිටියදී විවිධ වධහිංසාවලට ලක් වූ බව තමයි ඔහුගේ මව සහ අනෙකුත් තොරතුරු අනුව හෙළිදරව් වෙන්නේ. ඒ කියන්නේ අප්‍රේල් 02 වැනිදා මේ තරුණයා මිය ගොස් ඇති බවට මවට ආරංචි වෙනවා. මව පොලිසියට පැමිණෙනවිට එතකොට ශරීරය රෝහලට අරන් ගිහින් ඉවරයි. තවදුරටත් සොයාබැලීමේදී ඒ තරුණයා ඇඳගෙන හිටිය ඇඳුම පවා පොලිසිය විසින් හංගලා. ඩෙනිම කුණු කූඩයකට දාලා. ඒ තරුණයා භාවිත කළ දුරකතනය විනාශ කරන්න කටයුතු කරලා තියෙනවා. මේ සෑම සිද්ධියකින්ම තේරෙන්නේ, යම් දෙයක් හංගන්න උත්සහ කරපු බවයි. සියදිවි නසාගැනීමක් කියලා තමා පොලිසිය විසින් අම්මාට කියලා තියෙන්නේ. කොහොම වුණත් මේ වනවිට මුල්ලේරියාව මානසික රෝහලේ මෘත ශරීරාගාරයේ පශ්චාත් මරණ පරීක්ෂණය පැවැත්වෙනවා. වෛද්‍ය පරීක්ෂණයත් එක්ක මොකද වුණේ කියලා අපිට දැනගන්න පුළුවන්. රෝහලට ඇතුළත් කරන අවස්ථාවේදී තරුණයා බොහෝම බරපතල තත්ත්වයක හිටියේ, ශරීරයේ උණුසුම විතරයි තිබුණේ කියලා මවට වෛද්‍යවරයා කියලා තියෙනවා.”