අවුරුදු සමයේ දුර ගමන් සේවා මගී බස් රථවල ආසන වෙන් කිරීම තාවකාලිකව අත්හිටුවයි!

අවුරුදු සමයේ දුර ගමන් සේවා මගී බස් රථවල ආසන වෙන් කිරීම තාවකාලිකව අත්හිටුවිමට ජාතික ගමනාගමන කොමිෂන් සභාවේ උපදෙස් පරිදි පියවර ගෙන ඇති බව වාර්තා වේ.

එමෙන්ම ලංගම බස් රථ සඳහා ද අවුරුදු කාලය තුළ ආසන වෙන් කිරීම තාවකාලිකව අත්හිටුවා ඇති අතර අධිවේගී මාර්ග සහ සාමාන්‍ය දුර ගමන් සේවාවල යෙදෙන බස් රථ සියල්ලට ම මෙය අදාළ බවයි වාර්තා වන්නේ.

බස් රථවල ආසන වෙන් කිරීමේ හේතුවෙන් ප්‍රධාන බස් නැවතුම්පොළවල පෝලිම්වල සිටින මගී ජනතාවට සිදුවන අපහසුතාව, ඇති විය හැකි නොසන්සුන්තාව සැලකිල්ලට ගෙන තාවකාලිකව මෙම පියවර ගත් බව ජාතික ගමනාගමන කොමිෂන් සභාවේ වැඩ බලන අධ්‍යක්ෂිකා, ප්‍රවාහන අමාත්‍යාංශයේ ජ්‍යෙෂ්ඨ සහකාර ලේකම් නයෝමි ජයවර්ධන පවසයි.

මෙවර අලුත් අවුරුදු නිවාඩුවට ලක්ෂ අටක පමණ මගී ජනතාවක් කොළඹ ඇතුළු තදාසන්න නගරවල සිට ගම්බිම් බලා පිටත්ව යනු ඇතැයි ඇස්තමේන්තු කර ඇති බවත් එම ප්‍රමාණය ආපසු පැමිණෙනු ඇති බවත් සඳහන් කරන ජාතික ගමනාගමන කොමිෂන් සභාව මගී ජනතාවගේ ගමන් පහසුව සඳහා අමතර විශේෂ බස්රථ සේවා යොදවා ඇති බවත් ඇය සඳහන් කර ඇත.

සාමාන්‍ය කාලසටහනට අමතරව අන්තර් පළාත් ධාවනයට එක්කරන අතිරේක පෞද්ගලික බස් රථ සඳහා විශේෂ අවුරුදු සේවා ස්ටිකරයක් ලබා දී ඇති අතර එම විශේෂ බස් රථවල සාමාන්‍ය ගාස්තු මෙන් එකහමාරක මුදලක් අය කෙරේ.

ඒ අනුව අවුරුදු ගමන් විශේෂ බස්රථ සේවාවක් 11 වන දා සිට 21 වන දා දක්වා ක්‍රියාත්මක වේ.