අල්ලස් චෝදනාවකට ලංගම නිලධාරීන් දෙදෙනෙක් අත්අඩංගුවට!

අල්ලස් චෝදනාවකට ලංකා ගමනාගමන මණ්ඩලයේ නිලධාරීන් දෙදෙනෙක් ඊයේ (22) අත්අඩංගුවට ගෙන ඇති බව වාර්තා වේ.

මෙසේ අත්අඩංගුවට ගෙන ඇත්තේ රුපියල් ලක්ෂයක මුදලක් අල්ලස් වශයෙන් ලබාගත් නැගෙනහිර පළාත් ප්‍රාදේශීය කාර්යාලයේ ජේෂ්‍ය්ඨ විනය නිලධාරියෙක් සහ ආරක්ෂක නිලධාරියෙකි.

ඒ, කන්තලේ ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුවයි.

ත්‍රිකුණාමලය ඩිපෝවට අයත්, ලංගම බස් රථයක මගීන්ගේ ප්‍රවේශ පත්‍ර පරීක්ෂකවරුන් විසින් පරීක්ෂා කර, මගියෙකුට ප්‍රවේශ පත්‍රයක් ලබා නොදීම සම්බන්ධව එම බස් රථයේ කොන්දොස්තර වශයෙන් සේවය කළ පැමිණිලිකරුට විරුද්ධව විනය පරීක්ෂණයක් පවත්වා වැඩ තහනම් කර එම විනය පරීක්ෂණයෙන් පැමිණිලිකරුට අගතියක් නොවන පරිදි පරීක්ෂණ කටයුතු අවසන් කර, නැවත සේවය පිහිටු වීමට අදාළ කටයුතු කර දීම සඳහා අදාල නිලධාරීන් මෙම අල්ලස් මුදල ඉල්ලා ඇති බවයි වාර්තා වෙන්නේ.

එම මුදල එම කාර්යාලයේ ආරක්ෂක නිලධාරියා මඟින් ඉල්ලා ලබා ගැනීමේ අල්ලස් චෝදනා මත අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් එම සැකකරුවන් අත්අඩංගුවට ගෙන තිබේ.

අත්අඩංගුවට ගත් සැකකරුවන් කල්මුණේ මහේස්ත්‍රාත් අධිකරණය වෙත ඉදිරිපත් කිරීමට නියමිතයි.