ඩෑන් ප්‍රියසාද් ඝාතන සිද්ධි​යේ තවත් විශේ​ෂ තොරතුරු හෙලිවෙයි – විස්තර​ය මෙන්​න!

ඩෑන් ප්‍රියසාද් ඝාතනය කිරීමේ සිද්ධිය සැලසුම් කළ බව කියන සැකකරු බස්නාහිර දකුණ අපරාධ කොට්ඨාසය මගින් අත්අඩංගුවට ගැනීමත් සමග කරුණු රැසක් හෙළිකර ගැනීමට හැකිව ඇති බව වාර්තා වේ.

ඔහු පොලීසියට පවසා ඇත්තේ ඩෑන් ප්‍රියසාද් සමග දින කිහිපයකට පෙර හටගත් ගැටුමක් මත මෙම ඝාතනය සිදුකළ බවයි.

අපරාධ කල්ලි නායක කංජිපානි ඉම්රාන්ගේ කොන්ත්‍රාත් වෙඩික්කරුවන් විසින් වෙඩිතැබීම සිදුකළ බවද සැකකරු අනාවරණ​ය කර ඇත.

ඩෑන් ප්‍රියසාද් සාලමුල්ල නිවාස සංකීර්ණයේ නිවසක මත්පැන් පානය කරමින් සිටියදී ඉකුත් 22වනදා වෙඩි තබා තිබූ ති​බූ අතර වෙඩි තැබීමෙ​න් බරපතළ තුවාල සහිතව රෝහල්ගත කළ ඩෑන් ප්‍රියසාද් රෝහලේ​දි ජීවිතක්ෂයට පත්විය.

එ​කී ඝාතනය සම්බන්ධයෙන් චෝදනා එල්ල වූයේ ඩෑන් ප්‍රියසාද්ගේ බිරිඳගේ බාල සහෝදරියගේ සැමියා සහ ඔහුගේ පියාට වන අතර ඔවුන් ඉකුත් 2022 වසරේ ඩෑන් ප්‍රියසාද්ගේ සහෝදරයා කපා කොටා ඝාතනය කිරීමේ සිද්ධියේද ප්‍රධාන සැකකරුවන් දෙදෙනා වේ.

ඒ අනුව ඔවුන්ට අධිකරණයෙන් විදෙස් ගම​න් තහනමක්ද පනවා ති​බූ ඇති අතර සැඟව සිටින ඔවුන් අත්අඩංගුවට ගැනීමට මේ දක්වා පොලීසියට හැකිවී නොමැත.

එවන් පසුබිමක ඝාතනය සැලසුම් කළ බවට සැකකෙරෙන දුලාන් මධුසංඛ හෙවත් ‘දුලා’ නැමැත්තා බස්නාහිර දකුණ අපරාධ කොට්ඨාසය මගින් වැල්ලම්පිටියේදී අයිස් මත්ද්‍රව්‍ය ග්‍රෑම් 5ක් සමග අද (24) අත්අඩංගුවට ගෙන තිබුණි.

ඔහු සැකකාර පියපුතු දෙපළගේ සමීප ඥාතියෙකු වන අතර ඩෑන්ගේ සොහොයුරා ඝාතනය කිරීමේ සිද්ධිය සම්බන්ධයෙන් ද චෝදනා එල්ල වූවෙකි.

ඔහුගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, මීට දින හතරකට පෙර තම ත්‍රිරෝද රථයෙන් ගමන් කරමින් සිටියදී ඩෑන් එය නවත්වා තමන්ට සහ තවත් අයෙක්ට පහරදුන් බවයි.

පසුව ඒ පිළිබඳව තමන් කොළොන්නාවේ ධනුෂ්ක නැමැත්තාට පැවසීමේදී ඔහු “පොඩ්ඩක් හිටපන්, මම කංජිපානි ඉම්රාන් සම්බන්ධ කරලා දෙන්නම්” යනුවෙන් පවසා ජංගම දුරකථන මෘදුකාංගයක් හරහා කංජිපානි ඉම්රාන් සම්බන්ධ කරදුන් බවද ඔහු ප්‍රශ්න කිරී​ම් හමුවේ පවසා ඇ​ත.

එහිදී කංජිපානි ඉම්රාන් විසි​න් “වැල්ලම්පිටිය පොලිසියට ගිහින් උඹ පැමිණිල්ලක් දාපන්. පොලීසියට එද්දි ඌට ගහමු” යනුවෙන් උපදෙස් දී ඇති අතර එම උපදෙස් අනුව වැල්ලම්පිටිය පොලීසියට පැමිණිල්ලක් ඉදිරිපත් කළ බවත් සැකකරු පොලිසියට පවසා ඇත.

අනතුරුව පැමිණිල්ල විභාග කිරීම සඳහා ඩෑන් ප්‍රියසාද්ට පසුගිය 22වනදා එනම් ඝාතනය වූ දින වැල්ලම්පිටිය පොලිසියට පැමිණෙන ලෙස දැනුම්දුන්නද ඔහු එහි නොපැමිණීම හේතුවෙන් ඝාතන උත්සාහය ව්‍යාර්ථ වී ඇත.

අනතුරුව කංජිපානි ඉම්රාන් නැවතත් තමාට දුරකථන ඇමතුමක් ලබාදී “අරූට ගහන්න එකෙක් මදි. උඹ වරෙන්. ඌ හවස සෙට්වෙනවා” යනුවෙන් පවසා ඇත.

පසුව සිදුවූයේ කුමක්ද යන්න පිළිබඳව සැකකරු මෙතෙක් නිසිලෙස පවසා නොමැති බව වාර්තා වේ.

කෙසේ නමු​ත් කංජිපානි ඉම්රාන් දිවයිනට ගෙන්වන ලෙසට විරෝධතා ව්‍යාපාරයක් සංවිධාන කිරීම සහ ඔහුට එරෙහිව අදහස් පලකිරීම හේතුවෙන් කංජිපානි, ඩෑන් ප්‍රියසාද් සමග වෛරයෙන් පසුවීම හේතුවෙන් ඝාතනය සඳහා ඔහු විසින් වෙඩික්කරුවන් ලබාදී ඇති බවට සැක කරන බව පොලීසිය වැඩිදුරටත් පවසයි.

ඩෑන් ප්‍රියසාද් ඝාතනයට ලක්වූයේ එදිනම පස්වරුවේ සිය බිරිඳගේ මහගෙදරට පැමිණ මත්පැන් සාදයක් පවත්වමින් සිටියදී වන අතර ඒ අනුව පොලිසිය අදාළ නිවසේ පදිංචි කාන්තාවක වන ඩෑන් ප්‍රියසාද්ගේ බිරියගේ සොයුරියකගෙන් ප්‍රකාශ සටහන් කරගෙන තිබේ.

එහිදී ඇය පවසා ඇත්තේ, තමන්ට අයත් යතුරුපැදියක් එදින ඩෑන් ප්‍රියසාද් මැදිහත්වී විකුණාදීම නිමිත්තෙන් සිය නිවසේ මත්පැන් සාදයක් පැවැත්වූ බවයි.

ඝාතනයට ලක්වීමට පැය 3කට පමණ පෙර එහි පැමිණි ඩෑන්, පවුලේ අය සමග පැමිණෙන බව පවසා පිටව ගිය බවත්, අනතුරුව රාත්‍රියේ යළි පැමිණි බවත් ඇය වැඩිදුරටත් පවසා ඇත.

මේ අත​ර ඩෑන් ප්‍රියසාද්ගේ දේහය අද (24) බොරැල්ලේ පිහිටි පෞද්ගලික මල්ශාලාවක තැන්පත් කර ඇති බව සඳහන් වේ.

කෙසේ නමුත් සිද්ධිය සම්බන්ධයෙන් වැඩිදුර විමර්ශන බස්නාහිර පළාත දකුණභාර නියෝජ්‍ය පොලිස්පති ගයංග මාරපනගේ අධීක්ෂණය යටතේ ක්‍රියාත්මකයි.