පළාත් පාලන මැතිවරණය – තැපැල් ඡන්ද සළකුණු කිරීමේ කටයුතු අදින් අවසන්!

පළාත් පාලන මැතිවරණය සඳහා තැපැල් ඡන්ද සළකුණු කිරීමේ කටයුතු අද (29) පස්වරු 04.00ට අවසන් විය.

මැතිවරණ කොමසාරිස් සමන් ශ්‍රී රත්නායක පැවසුවේ අද දිනයේදී තැපැල් ඡන්ද සලකුණු කිරීමේ කටයුතු අවසන් වන බවයි.

ඒ අනුව තැපැල් ඡන්දය සලකුණු නොකළ පිරිස් වෙත ඡන්ද මධ්‍යස්ථානයේදී ඡන්දය භාවිත කිරීමේ කිසිදු හැකියාවක් නොමැති බවත් මැතිවරණ කොමසාරිස්වරයා පවසා ඇත.

මෙවර පළාත් පාලන මැතිවරණය සඳහා තැපැල් ඡන්දය සලකුණු කිරීම සඳහා පුද්ගලයින් 648,495 ක් සුදුසුකම් ලබා තිබුණි.

මේ අතර දින 04ක් පුරාවට පැවැති තැපැල් ඡන්ද භාවිත කිරීම ඉතාම සාමාකාමි අයුරින් සිදුවූ බව පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි පවසයි.

ඔහු පැවසුවේ ඡන්දය භාවිත කිරීම ඉතා ප්‍රශස්ත මට්ටමක පැවති බව තම සංවිධානය වෙත නිරීක්ෂණය වූ බවයි.

පළමු දිනම තැපැල් ඡන්දය භාවිත කිරීම 60% ඉක්මවා ගිය බවත්, පැවති දින 4ක කාලය තුළ තැපැල් ඡන්ද භාවිත කිරීම ඉහළ මට්ටමක පැවැති බවත් ඔහු පවසා සිටියේය.

එමෙන්ම වෙනත් මැතිවරණයන්ට සාපේක්ෂව ප්‍රචාරණ ව්‍යාපෘති වුවද මෙවර මැතිවරණයේදී ඡන්ද මධ්‍යස්ථාන ආශ්‍රිතව දක්නට නොලැබුණු බවත් පැෆ්රල් සංවිධානයේ විධායක අධ්‍යක්ෂවරයා මෙහිදී වැඩිදුරටත් අදහස් දක්වමින් පැවසීය.