හෙරොයින් ලග තබාගෙන වරදකරු වුණු පුද්ගලයෙකුට අධිකරණයෙන් දුන් නියෝගය මෙන්න!

හෙරොයින් මත්කුඩු ග්‍රෑම් 2යි මිලිග්‍රෑම් 29 ක් සන්තකයේ තබාගැනීම සහ ජාවාරම් කිරීම යන චෝදනා මත වරදකරු කෙරුණු 38 හැවිරිදි පුද්ගලයෙකුට කොළඹ මහාධිකරණය විසින් ජීවිතාන්තය දක්වා සිරදඬුවම් නියම කර ඇති බව වාර්තා වේ.

දීර්ඝ නඩු විභාගයකින් අනතුරුව කොළඹ මහාධිකරණ විනිසුරු නවරත්න මාරසිංහ විසින් මෙම තීන්දුව ලබාදුන් බවයි වාර්තා වන්නේ.

එමෙන්ම විත්තිකරු විසින් අදාළ මත්ද්‍රව්‍ය ප්‍රවාහනය කිරීම සඳහා යොදාගත් යතුරුපැදිය ද රාජසන්තක කිරීමට විනිසුරුවරයා විසින් නියම කර ඇත.

2012 වසරේ පෙබරවාරි මස 17 වනදා ලැබුණු රහසිගත තොරතුරකට අනුව මෙම විත්තිකරු යතුරුපැදියකින් දෙමටගොඩ ප්‍රදේශයේ මත්ද්‍රව්‍ය රැගෙන ගමන් කරමින් සිටියදී පොලීසිය විසින් අත්අඩංගුවට ගෙන තිබූ අතර ඉන් අනතුරුව නීතිපතිවරයා විසින් හෙරොයින් මත්කුඩු සන්තකයේ තබා ගැනීම සහ ජාවාරම් කිරීම යන චෝදනා යටතේ නඩු පවරා ඇත.

දඬුවම් නියම කිරීමට පෙර අධිකරණය හමුවේ කරුණු දක්වූ විත්තියේ නීතිඥවරයා තම සේවා දායකයාට පෙර වැරදි මෙන්ම වෙනත් පවතින නඩු නොමැති හෙයින් ඔහුට ලිහිල් දඬුවමක් නියම කරන ලෙස ඉල්ලා ඇත.

නමුත් මත්ද්‍රව්‍ය උවදුරු හේතුවෙන් වැඩිහිටියන් පමණක් නොව පාසල් දරුවන්ද එහි ගොදුරක් බවට පත්ව තිබෙන බවත් විත්තිකරුට නීතියෙන් ලබාදිය හැකි උපරිම දඬුවම් ලබා දෙන ලෙසත් රජයේ නීතිඥවරයා අධිකරණයෙන් ඉල්ලා ඇති අතර ඒ අනුව විනිසුරුවරයා විසින් මෙම දඬුවම ප්‍රකාශයට පත් කර ඇත.