කෙහෙළිය බන්ධනාගාරය​ට යද්​දි අ​තේ ගජමුතුවක් සහ ශ්‍රී මහා බෝධියේ පොත්තක් තිබිලා – විස්තරය මෙන්න!

රජයට රුපියල් ලක්ෂ 80 කට අධික මුදලක් පාඩු කළැයි සැකපිට අත්අඩංගුවට ගෙන බන්ධනාගාර ගත කළ හිටපු අමාත්‍ය කෙහෙළිය රඹුක්වැල්ල වැලිකඩ රිමාන්ඩ් බන්ධනාගාරයට රැගෙන ආ අවස්ථාවේදී ඔහු සතුව තිබී ගජමුතුවක් සහ ශ්‍රී මහා බෝධියේ බව කියන දැවමය කොටසක් බන්ධනාගාර බුද්ධි නිලධාර්න් විසින් ඊයේ (07) රාත්‍රීයේ සොයාගෙන ඇතැයි බන්ධනාගාර ආරංචි මාර්ග සඳහන් කරන බවට “ලංකාදීප” පුවත්පත වාර්තා කරයි.

එය බන්ධනාගාර බුද්ධි නිලධාරීන් භාරයට ගැනීමත් සමගම අමාත්‍යවරයා කළහකාරි ලෙස හැසිරි ඔහුගේ ආරක්ෂාව සඳහා එය සන්තකයේ තබාගත් බව පවසමින් එය නැවත ඔහු වෙත ලබා දෙන ලෙස ඉල්ලා ඇති බවයි වාර්තා වන්නේ.

ජනමාධ්‍ය පරිසර සහ සෞඛ්‍ය අමාත්‍යවරයාගේ පෞද්ගලික කාර්ය මණ්ඩල තනතුරු සඳහා සිය ඥාතීන් හිතවතුන් සහ දේශපාලන ආධාරකරුවන් පත්කරගෙන ඔවුන් සේවයේ නොයොදා ඔවුන්ට වැටුප් සහ දීමනා ගෙවූ බවට හඟවා රජයට රුපියල් ලක්ෂ 800 කට අධික පාඩුවක් සිදු කළැයි අමාත්‍යවරයා අල්ලස් හෝ දූෂණ චෝදනා විමර්ශන කොමිසමේ නිලධාරීන් විසින් ඊයේ අත්අඩංගුවට ගෙන තිබුණි.

හිටපු අමාත්‍යවරයාව බන්ධනාගාර නිලධාරීන් විසින් වැලිකඩ බන්ධනාගාරය වෙත රැගෙන ඒමෙන් අනතුරුව කොළඹ රිමාන්ඩ් බන්ධනාගාර ප්‍රධාන දොරටුව අබියසදී බන්ධනාගාර බුද්ධි නිලධාරීන් විසින් ඔහු පරික්ෂා කිරීමේදී අතෙහි සඟවා ගෙන සිටි ලේන්සුවක් තුළ ඉතා සූක්ෂම ලෙස ඔතා තිබූ ගජමුතුව සහ ශ්‍රී මහා බෝධියේ පොත්තක් බව කියන දැවමය කොටස හමු වී ඇත.

කෙසේ නමුත් වීදුරු බෝලයකට හා සමාන එම ගජමුතුව ජංගම දුරකථනයේ විදුලි පන්දම දැල්වීමේදී රක්ත වර්ණයෙන් බබලන බවද ආරංචි මාර්ග සඳහන් කරයි.

එයින් මද වේලාවකට පමණ පසු වර්තමාන රජයේ නියෝජ්‍ය අමාත්‍යවරයකුගේ නමක් ද සඳහන් කරමින් බුද්ධි ප්‍රධානියකුගේ අවසර මත යැයි පවසමින් හිටපු අමාත්‍යවරයාව හමුවීම සඳහා රාත්‍රී අටට පමණ ඔහුගේ මිණිබිරියක පැමිණ ඇති අතර බන්ධනාගාර නියාමකවරුන් එයට අවසර ලබාදී නැති බව තවදුරටත් සඳහන් වේ.