ඉන්දීය පාකිස්තාන් යුධ ගිනි ඇවිලෙයි – පාකිස්තානයෙන් ඉන්දියාවට ප්‍රතිප්‍රහාර!

ඉන්දීය හමුදා විසින් එල්ලකළ මිසයිල ප්‍රහාරවලට එරෙහිව ඉන්දියාවට ප්‍රතිප්‍රහාර එල්ලකිරීමට පාකිස්තානය මෙහෙයුමක් ආරම්භ කර ඇති බව විදෙස් මාධ්‍ය වාර්තා කරයි.

පාකිස්තානයේ ආරක්ෂක ආරංචි මාර්ග උපුටා දක්වමින් විදෙස් මාධ්‍ය පැවසුවේ, ඉස්ලාමාබාද් නගරයෙන් පිටත ගුවන් හමුදා කඳවුරු තුනක් ඇතුළු ප්‍රදේශ කිහිපයකට ඉන්දියාව විසින් මිසයිල ප්‍රහාර එල්ලකළ බවයි.

ඒ අනුව ඊට ප්‍රතිප්‍රහාර පාකිස්තානය විසින් එල්ලකර ඇති අතර, එහි ප්‍රතිඵයක් ලෙසින් ඉන්දීය පරිපාලන කාශ්මීරයේ ශ්‍රීනගර් නගරයේ පිපිරීම් සිදුව ඇති බව වාර්තා වේ.

එමෙන්ම ශ්‍රීනගර් සිට කිලෝමීටර් 100ක් පමණ දුරින් පිහිටි උරිහි ලගාමා ගම්මානයට ද පාකිස්තානය විසින් කාලතුවක්කු ප්‍රහාරයක්
එල්ලකර ඇති අතර එම ප්‍රහාරයෙන් ප්‍රදේශවාසියෙකුගේ නිවසක් සම්පූර්ණයෙන්ම විනාශ වී ගොස් ඇති බවද ඉන්දීය මාධ්‍ය වාර්තා කරයි.

මේ අතර අද අළුයම 3.15 සිට දහවල් 12 දක්වා කාලය තුළ සියලුම ගුවන්ගමන් සඳහා පාකිස්තානය සිය ගුවන් කලාපය වසා දැමීමට තිරණය කර ඇති බව එරට සිවිල් ගුවන්සේවා අධිකාරිය නිවේදනයක් සදහන් කර ඇත.

රාවල්පින්ඩිහි නූර් ඛාන් ගුවන් කඳවුර අසල සහ ලාහෝර්හි ස්ථාන කිහිපයක ඊයේ (09) සවස් කාලයේ පිපිරීම් වාර්තාවීමත් සමග මෙම ගුවන් කලාපය වසා දැමීමට පියවර ගෙන ඇති බවයි විදෙස් මාධ්‍ය වැඩිදුරටත් සදහන් කරන්නේ.