ටීචර් අම්මා පහරදී තරුණයෙකු රෝහලේ, වෘෂණ කෝෂ වලට හා​නි – පොලිසියෙන් සැඟවී පළායයි!

ටීචර් අම්මා ලෙස හදුන්වන ජනප්‍රිය ශිෂ්‍යත්ව ගුරුවරියක විසින් සිදුකළ පහරදීමකින් තරුණයෙකු තුවාල ලබා මීගමුව රෝහලට ඇතුළත් කර ඇති සිදුවීමක් වාර්තා වේ.

මෙම ගුරුවරිය සිදුකළ පහරදීමෙන් තරුණයාගේ වෘෂණ කෝෂවලට හානි සිදුවිමෙන් මෙලෙස රෝහල් ගතකර ඇති අතර පහරදීම සිදුකළ සැකකාර ශිෂ්‍යත්ව ගුරුවරිය ප්‍රදේශයෙන් පළාගොස් ඇති බව සඳහන් වේ.

කෙසේ වෙතත් ඇයගේ සැමියා සහ කළමණාකරු සිද්ධිය සම්බන්ධයෙන් අත්අඩංගුවට ගෙන ඇති බව කටාන පොලිසිය පවසයි.

මෙලෙස අත්අඩංගුවට ගැනුණු සැමියා සහ කළමණාකරු ඊයේ (09) මීගමුව අධිකරණයට ඉදිරිපත් කිරීමෙන් පසු ලබන 14 වනදා දක්වා රක්ෂිත බන්ධනාගාර ගත කිරීමටයි නියෝග කර ඇති අතර මේ වනවිට සැඟව සිටින ‘ටීචර් අම්මා’ ලෙස හඳුන්වන සැකකාර ගුරුවරිය අත්අඩංගුවට ගෙන අධිකරණයට ඉදිරිපත් කරන ලෙසත් මහේස්ත්‍රාත්වරයා විසින් පොලිසියට නියෝග කර ඇත.

කටාන සෞඛ්‍ය වෛද්‍ය නිලධාරී කාර්යාලය ඉදිරිපිට Queens අධ්‍යාපන ආයතනයේ ටීචර් අම්මා නමින් හඳුන්වන ශිෂ්‍යත්ව උපකාරක පන්ති පවත්වන හයේෂිකා ප්‍රනාන්දු නම් ගුරුවරියගේ දුරකතන ක්‍රියාකරු සහ ස්ටූඩියෝ ක්‍රියාකරු ලෙස සේවය කළ කිඹුලපිටිය ගල්මංකඩ පදිංචි රිතික් ක්‍රිෂාල් අගලවත්ත නැමති 21 හැවිරිදි පුද්ගලයෙකුට පසුගිය 6 දා රාත්‍රී 9.45-10.00 අතර Queens අධ්‍යාපන ආයතනයේ කාර්යාල කාමරය තුළ සිරකරගෙන අමානුෂික අන්දමින් පහරදී ඇත.

මෙම පහරදීම සිදුකර ඇත්තේ ටීචර් අම්මා නමින් හඳුන්වන ශිෂ්‍යත්ව උපකාරක පන්ති පවත්වන හයේෂිකා ප්‍රනාන්දු සහ ඇයගේ කළමනාකරු චානක විෂ්වජිත් නම් තැනැත්තා බවයි වාර්තා වන්නේ.

මෙලෙස අමානුෂික ලෙස පහර දෙමින්, මුහුණට කෙළ ගසමින් පරුෂ වචනයෙන් බැණ ඇති අතර පහර කෑමට ලක්වූ පුද්ගලයා පවසන්නේ ‘තොගේ ඇට තලනවා..’ යැයි පවසමින් අඩි උස සපත්තු දාගෙන තම ලිංගික අවයව ප්‍රදේශයට හයේෂිකා ප්‍රනාන්දු යන අය පහරදුන් බවයි.

ඊට අමතරව අතින් ද හයේෂිකා සහ කළමනාකරු පහරදුන් බව පවසන පහර කෑ පුද්ගලයා එසේ පහර එල්ල කරමින් වරද පිළිගන්නා ලෙස වීඩියෝගත කිරීමට හයේෂිකා ප්‍රනාන්දු යන අයගේ සැමියා වන ප්‍රමිත් සුරේන්ද්‍ර යන අය බලපෑම් කොට ඇති අතර මෙසේ පහරදී තිබෙන්නේ එම අයතනයේ අනෙක් සේවක සේවිකාවන් ඉදිරියේදී බවත් ඔහු පවසයි.

පසුගිය වසරේ නොවැම්බර් මස 4 වන දින ටීචර් අම්මාගේ ආයතනයේ සේවයට බැඳුණු රිතික් ක්‍රිෂාල් නම් පහර කෑ පුද්ගලයා තවමත් පත්වීම් ලිපියක් ලබාදී නැති බව පැවසේ. සුළු වැටුපක් ලබාදෙමින්, නිවාඩු දවස් වල පවා අධික වැඩ අරගත් බවත්, රාත්‍රී ආහාර පවා ලබා නොදෙමින් අමානුෂිකව වැඩ ගන්නා නිසා මැයි මස 30 වන දින සේවයෙන් ඉවත්වන බව පවසමින් අප්‍රේල් 21 වෙනිදා අස්වීමේ ලිපියක් ද රිතික් ක්‍රිෂාල් විසින් ටීචර් අම්මාට ලබාදී තිබෙන ඔහු මාධ්‍යට පවසා ඇත.

තම සහෝදරයාගෙන් අමානුෂික ලෙස වැඩ ගන්නා ටීචර් අම්මාගේ මෙම සිද්දිය සම්බන්ධයෙන් සංවේගයට පත් රිතික්ගේ සහෝදරිය විසින් මුහුණු පොතේ මේ පිළිබඳව කොමන්ටුවක් දමා ඇත. එම කොමන්ටුව දුටු හයේෂිකා ප්‍රනාන්දු නම් ටීචර් අම්මා විසින් රිතික් ක්‍රිෂාල් අගලවත්ත යන අයට පවසා ඇත්තේ ඔහු සේවයෙන් ඉවත්වන හෙයින් ඔහුගේ කාර්යයන් තම නිවසේ වැඩ කරන සේවිකාවකට පුරුදු කරන ලෙසයි.

තමන් සේවයෙන් ඉවත්වන නිසා තම කාර්යයන් ටීචර් අම්මාගේ උපදෙස් මත උගන්වමින් සිටින අතර වාරයේ එම ස්ථානයට පැමිණි හයේෂිකා ප්‍රනාන්දු, කළමනාකරු සහ ස්වාමි පුරුෂයා, රිතික් ක්‍රිෂාල් විසින් දුලක්ෂි චාරුණී(සේවිකාව) නම් තරුණියගේ අතින් අල්ලා ලිංගික අඩන්තේට්ටම් කිරීමට තැත්කළ බව පවසමින් මෙසේ ඔහුට පහර දී ඇති බවයි පැවසෙන්නේ.

එසේ පහර දෙමින් පවසා ඇත්තේ ‘උඹේ අක්කා කළ දේට උඹෙන් පළිගත්තා’ බවයි. එමෙන්ම එසේ අමානුෂික ලෙස පහරදෙමින් කියා ඇත්තේ උඹ ලිංගික අඩන්තේට්ටම් කලා කියා වරද පිළිගෙන වීඩියෝ දර්ශනයක් ලබාදිය යුතු බවයි.

මෙසේ පහර දෙමින් බල කරමින් රිතික් ක්‍රිෂාල්ගේ නිවසට දුරකතන ඇමතුමක් ලබාගන්නා ලෙසත් වහාම නිවැසියන්ට කුවින්ස් ආයතනයට පැමිණෙන ලෙසත් මොවුන් පවතා තිබෙන බව පවුලේ අය විසින් ප්‍රකාශ කර ඇත. ‘පවුලේ අය ගෙන්වා කරන්න දෙයක් නැහැ. අක්කා කළ වැරැද්දේ පලිය මල්ලිගෙන් ගත්තා’ යැයි ටීචර් අම්මා පැවසූ බව පහර කෑමට ලක්වූ අයගේ පවුලේ අය වැඩිදුරටත් පවසයි. එමෙන්ම ඒ වනවිටත් පහර කෑමට ලක්වූ රිතික් ක්‍රිෂාල් රැගෙන ගොස් අභූත චෝදනා එල්ල කරමින් පොලිසියට භාරදී තිබූ බවද සදහන් වේ.

එම අවස්ථාවේදී පොලිසිය විසින් පහර කෑමට ලක්වූ පුද්ගලයා පෙන්වා, ‘මෙයා අමාරුවෙන් ඉන්නේ පහර දීලා. පැමිණිලි කරන්න කලින් ඉස්පිරිතාලෙට අරන් යන්න. නැත්නම් අපිත් අමාරුවේ වැටෙනවා’ යනුවෙන් ප්‍රකාශ කර ඇති බව පහරකෑමට ලක් වූ පවුලේ අය පවසයි.

ඒ අනුව පහර කෑමට ලක්වූ රිතික් පසුගිය 7 වන දින පාන්දර මිගමුව රෝහලට ඇතුළත් කර තිබෙන අතර 8 වෙනිදා සවස රෝහලෙන් පිටව ගොස් ඇත. නිවසට පැමිණි පසු යළින් අසනීප වීම නිසා 9 වෙනිදා උදේ නැවතත් රිතික් නම් පුද්ගලයා රෝහල්ගත කර ඇත.

ඔහු නැවත රෝහල්ගත කර ඇත්තේ යටි බඩ හා වෘෂණකෝෂ වල දැඩි වේදනාව සහ තුවාල සිදුවී තිබීම නිසා වන අතර 9 වන දින ටීචර් අම්මා නොහොත් හයේෂිකා ප්‍රනාන්දු යන අයට කටාන පොලිසියට පැමිණෙන ලෙස දන්වා තිබුණත් ඇය පොලිසියට පැමිණ නැති බවත් ඒ වෙනුවට ඇයගේ ස්වාමි පුරුෂයා හා කළමනාකරු පොලිසිය වෙත එවා ඇති බවත් පැවසෙයි.

අසාධ්‍ය තත්තවයේ පසුවන රිතික් ක්‍රිෂාල් අගලවත්ත නම් පුද්ගලයාට පහරදීම සම්බන්ධයෙන් ටීචර් අම්මා නොහොත් හයේෂිකා ප්‍රනාන්දු යන අයගේ ස්වාමි පුරුෂයා වන ප්‍රමිත් සුරේන්ද්‍ර සහ කළමනාකරු චානක විෂ්වජිත් යන අය පොලිස් අත් අඩංගුවට ගෙන ඇති අතර එළඹෙන මැයි මස 14 වන දින ටීචර් අම්මා නොහොත් හයේෂිකා ප්‍රනාන්දු යන අයට උසාවියේ පෙනී සිටින ලෙස දන්වා ඇත.