බුදු තෙමඟුල සිහිකෙරෙන වෙසක් පුර පසළොස්වක පොහොය දිනය අදයි – රට පුරා දන්සල් දන්සැල් 8,742 ක්!

බුදු තෙමඟුල සිහිකෙරෙන වෙසක් පුර පසළොස්වක පොහොය දිනය අදට (12) යෙදී තිබේ.

බුදුරජාණන් වහන්සේගේ ඉපදිම, බුදුවීම සහ පිරිනිවන්පෑම සිදුවුයේ අදවන් පොහෝ දිනකය.

ශාසනික වැදගත්කම් රාශියකින් යුත් වෙසක් පුර පසළොස්වක පොහොය දිනය ලක්වාසී මෙන්ම සමස්ත ලෝකවාසී ජනතාව ආමිස සහ ප්‍රතිපත්ති පූජාවන්ට ප්‍රමුඛත්වය ලබාදෙමින් මහත් හරසින් යුතුව සමරනු ලබයි.

මේ අතර තුනුරුවන් කෙරෙහි ශ්‍රද්ධාව ඇති කරගනිමින් වෙසක් දිනය අර්ථවත්ව සැමරීමට කටයුතු කළ යුතු බව අස්ගිරි පාර්ශවයේ අනුනායක පූජ්‍ය වෙඩරුවේ උපාලි හිමි පැවසූහ.

ප්‍රතිපත්ති පූජා මුල්කරගනිමින් වෙසක් උත්සවය උසස් අන්දමින් සැමරීමට පියවර ගත යුතු බව මල්වතු පාර්ශයේ මහාලේඛකාධිකාරී පුජ්‍ය පහමුණේ ශ්‍රී සුමංගල හිමි සඳහන් කළේය.

වෙසක් කාලය තුළ ලක්වාසී මෙන්ම ලෝවාසී බෞද්ධ ජනතාව ආමිස සහ ප්‍රතිපත්ති පූජාවන්ට මුල්තැන දෙමින් බුදුන් වහන්සේ පෙන්වු ධර්ම මාර්ගයේ ගමන් කිරීමට උත්සාහ කළ යුතු බව රාමඤ්ඤ මහ නිකායේ මහනායක පූජ්‍ය මකුලෑවේ විමල හිමි සඳහන් කළේය.

එමෙන්​ම වෙසක් දිනයට සමගාමීව දිවයින පුරා විවිධ ආගමික උත්සවයන් තොරණ, පහන් කූඩු සහ දන්සැල් අද සිට පැැවත්වීමට නියමිතව ඇත.

මෙවර වෙසක් උළෙල සැමරීමේ අභිලාෂයෙන් දන්සැල් 8,742කට අධික සංඛ්‍යාවක් මේ වන විට ලියාපදිංචි කර ඇති බව මහජන සෞඛ්‍ය පරීක්ෂකවරුන්ගේ සංගමය පවසයි.

ඉන් වැඩිම සංඛ්‍යාවක් ලියාපදිංචි වී ඇත්තේ බස්නාහිර පළාතේ කොළඹ මහනගර සභාව ආශ්‍රිතව බව එම සංගමයේ සභාපති උපුල් රෝහණ මහතා සඳහන් කළේය.

දන්සැල් ලබාදීමේ දී පොලිතින් හා ප්ලාස්ටික් භාවිතය අවම කිරීමට කටයුතු කරන ලෙස ද උපුල් රෝහණ මහතා දන්සැල් සංවිධායකවරුන්ගෙන් ඉල්ලීමක් ද කළේය.