ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රීවරයෙක් අත්අඩංගුවට!

ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී මිලාන් ජයතිලක අත්අඩංගුවට ගෙන ඇති බව වාර්තා වේ.

අල්ලස් හෝ දූෂණ චෝදනා විමර්ශන කොමිසම විසින් ඔහුව මෙලෙස අත්අඩංගුවට ගෙන ඇති බවයි වාර්තා වෙන්නේ.

ශ්‍රී ලංකා පොදුජන පෙරමුණේ ගම්පහ දිස්ත්‍රික් පාර්ලිමේන්තු මන්ත්‍රී මිලාන් ජයතිලකට එරෙහිව අල්ලස් කොමිසම විසින් 2021 වසරේදීද කොළඹ මහාධිකරණය හමුවේ යළි නඩු පවරා තිබුණි.

ඒ ඔහු දොම්පේ ප්‍රාදේශීය සභාවේ සභාපතිවරයා වශයෙන් කටයුතු කළ අවධියේ ගල්කොරියක් පවත්වාගෙන යාමට අවශ්‍ය බලපත්‍ර නිකුත්කිරීම සඳහා ව්‍යාපාරිකයෙකුගෙන් රුපියල් ලක්ෂ 7ක මුදලක් ඉල්ලා ඉන් ලක්ෂ 06ක් අල්ලස් වශයෙන් ලබාගත්තේ යැයි චෝදනා කරමින් අල්ලස් කොමිසම විසින් 2015 වසරේ කොළඹ මහාධිකරණය හමුවේ ගොනු කර තිබූ නඩුවක් අනුවයි.

මේ අතර, 2022 වසරේදී ගාලුමුවදොර පිටිය හා අරලියගහ මන්දිරය අසල සාමකාමී විරෝධතාවයේ නිරතව සිටි පුද්ගලයින්ට පහරදීමේ සිද්ධියට සැකපිට අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් ඔහු සිද්ධියට අදාළව කලක් රක්ෂිත බන්ධනාගාර ගතවද සිටියේය.