බදුල්ලේ තියුණු ආයුධයකින් පුද්ගලයකුට බරපතළ තුවාල සිදුවීමේ සිද්ධිය සම්බන්ධයෙන් පොලිස් පරීක්ෂණ!

බදුල්ල රජ වීදියේ පදික වේදිකාවක දී සිදු වූ තියුණු ආයුධ ප්‍රහාරයකින් පුද්ගලයකුට බරපතළ තුවාල සිදුවීමේ සිද්ධියක් සම්බන්ධයෙන් බදුල්ල පොලිසිය පරීක්ෂණ ආරම්භ කර ඇති බව වාර්තා වේ.

පොලිසිය පවසන්නේ එකම පවුලේ සහෝදරයන් දෙදෙනෙකු අතර එම ආරවුල හටගෙන ඇති බවයි.

පදික වේදිකාවේ වෙළඳාමේ යෙදී සිටි වැඩිමහල් සහෝදරයාට බාල සහෝදරයා විසින් තියුණු ආයුධයකින් පහර දීමත් සමග ඔවුන් අතර ආරවුලක් උත්සන්න වී ඇත.

මූලික විමර්ශනවලදී අනාවරණය වී ඇත්තේ මෙම සිදුවීමේදී පහර කා රෝහල්ගතව සිටින බාල සොහොයුරා විසින් එදිනම සවස තියුණු ආයුධයක් රැගෙනවිත් බදුල්ල නගරයේ රජවීදියෙහි පදික වේදිකාවේ වෙළඳාම් කරමින් සිටි තම වැඩිමහල් සොහොයුරා වෙත පළමුව පහරදී ඇති අතර එම අවස්ථාවේ කෝපාවිෂ්ඨ වූ පහරකෑමට ලක් වූ වැඩිමහල් සොහොයුරා තියුණු ආයුධය උඳුරාගෙන පෙරළා බාල සොහොයුරාට පහරදී තිබෙන බවයි.

පහරදීම අතරතුර පොලිස් සැරයන්වරයකු සහ තවත් අයෙකු මැදිහත් වී සැකකරු එම ස්ථානයේදීම අත්අඩංගුවට ගැනීමට සමත් වී ඇති බව පොලීසිය සඳහන් කරයි.

සිද්ධියෙන් දෙදෙනාම තුවාල ලබා ඇති අතර, බරපතළ තුවාල ලැබූ වයස අවුරුදු 48ක බාල සහෝදරයා බදුල්ල මහ රෝහලට ඇතුළත් කර ඇත.

එමෙන්ම, වයස අවුරුදු 53ක වැඩිමහල් සහෝදරයා ද පොලිස් ආරක්ෂාව යටතේ රෝහල් ගතකර ඇති බවයි වාර්තා වෙන්නේ.

බදුල්ල රෝහලේ ගිලන් රථ රියදුරු යාපා රශ්මික නම් තරුණයා සහ සිදුවීම වාර්තා වූ සැනින් එම ස්ථානයට පැමිණි බදුල්ල පොලිස් ස්ථානයට අනුයුක්තව රාජකාරියේ යෙදී සිටි 39276 පොලිස් සැරයන් නිලන්ත නිලධාරියා තම ජීවිත අවධානම නොතකා තියුණු ආයුධයෙන් වැර පහර කිහිපයක් එල්ල කරමින් සිටි සැකකරු වෙතට කඩා පැන ඔහු මෙල්ල කරගැනීමට සමත් වූ බව පොලීසිය වැඩිදුරටත් සඳහන් කරයි.