ලුණු ගැටලුව පිලිබඳ සුබ ආරංචියක්!

පවතින ලුණු හිඟයට විසඳුමක් ලෙස ඉන්දියාවෙන් ආනයනය කරන ලුණු තොගයක් අද රාත්‍රියේ දිවයිනට පැමිණීමට නියමිත බව වෙළෙඳ, වාණිජ හා ආහාර සුරක්ෂිතතා අමාත්‍ය වසන්ත සමරසිංහ පවසයි.

ඒ අනුව ලුණු මෙට්‍රික් ටොන් 3,050ක තොගයක් අද (21) රාත්‍රියේ මෙරටට රැගෙන ඒමට නියමිත බව සඳහන් ​වේ.

පෞද්ගලික අංශයෙන් ආනයනය කළ ලුණු මෙට්‍රික් ටොන් 250ක් සහ ජාතික ලුණු සමාගම විසින් ආනයකය කරන ලද ලුණු මෙට්‍රික් ටොන් 2800ක් ඊට අයත් බවයි අමාත්‍යවරයා පවසන්නේ.

මෙරට මාසික ලුණු අවශ්‍යතාවය මෙට්‍රික් ටොන් 15,000ක් වන අතර වාර්ෂික අවශ්‍යතාවය ලුණු මෙට්‍රික් ටොන් එක්ලක්ෂ 80,000කි.

යල සහ මහකන්න දෙකක මෙරට ලුණු අස්වැන්න ලබා ගන්නා අතර යල කන්නයේ අස්වැන්න පෙබරවාරි මස මැද සිට අප්‍රේල් මාසයේ මැද දක්වාත්, මහ කන්නයේ අස්වැන්න ජුනි මාසයේ මැද සිට ඔක්තෝම්බර් මාසයේ මැද දක්වාත් ලබා ගැනීම සිදුකෙරේ.

කෙසේ වෙතත් පැවති අධික වර්ෂාව හේතුවෙන් පසුගිය වසරේ යල සහ මහ කන්න යන කන්න දෙකේ දීම අපේක්ෂිත ලුණු අස්වැන්න ලබාගැනීමට නොහැකි වීම හේතුවෙන් මෙරට අවශ්‍යතාවය සඳහා ලුණු ආනයනය කිරීමට සිදුවුණි.