මැදිවියේ මිනිසුන් සතුටු කරන්න කළ ඉල්ලීම් දරාගන්න බැරිව තරගයෙන් ඉවත් වුනා – එංගලන්​ත රූ රැජි​න ලෝක රූ රැජි​න තරගයට බෝම්බ ගසයි!

ඉන්දියාවේ තෙලන්ගානා හි මේ වනවිට පැවැත්වෙ​න 72 වන ලෝක රූ රැජින තරඟයෙන් එංගලන්තයේ සුරූපිනිය වූ මිල්ලා මැගී එක්වරම ඉවත් වූවාය.

මැයි 7 වන දින හයිද්‍රාබාද් වෙත පැමිණි 24 හැවිරිදි මැගී, ලෝක රෑ රැජන තරඟයට අත්හැ​ර මැයි 16 වන දින එක්සත් රාජධානියට ආපසු පැමිණියාය.

මැගී තරගයෙන් ඉවත් වූයේ එක්වරමය. ඇය කීවේ ඇයගේ පුද්ගලික හේතුවක් මත මේ තරගයෙන් ඉවත්වන බවය.

මැගී ඉවත්වීමෙන් පසු, මිස් එංගලන්ත අනුශූරිය වූ චාලට් ග්‍රාන්ට් තරඟයේ ස්ථානය ලබා ගැනීම සඳහා හයිද්‍රාබාද් වෙත පැමිණියාය. මිස් වර්ල්ඩ් සංවිධායකවරුන් කීවේ තරඟයේ එංගලන්තය නියෝජනය කිරීම දිගටම සිදුවන බවය.

ඉවත්වී ගොස් සතියක් ඉක්ම යන තැන ඇය රූ රැජි​න තරගයට බෝම්බ ප්‍රහාරයක් එල්ලකලාක් බඳු ප්‍රහාරයක් එල්ල කරමින් එංගලන්තයේ ටැබ්ලොයිඩ් පුවත්පතක් වූ “සන්” සමග සම්මුඛ සාකච්ඡාවක් පැවැත්වූවාය.

ඇය ප්‍රකාශ කළේ තෙලගානාහි පැවැත්වෙන 72වැනි ලෝක රෑ රැජන තරගය යල් පැනගිය තරගයක් බවය. එහි සංවිධාකයකවරුන් තරගකාරියන් සූරා කෑමට ලක් කළ බව මැගී කීවාය. ඇය කීවේ එම සංවිධායකවරුන් තරගකාරියන් හැඟීම් හෝ අයිතිවාසිකම් රහිත සෙල්ලම් බඩු බඳු මෙවලම් ලෙස සලකන තත්ත්වයකට පත් කළ බවය. මේ තත්ත්වයට මුහුණ දිය නොහැකිව ඇය තරගයෙන් ඉවත් වූ බව එංගලන්ත රූ රැජන සන් පුවත්පතට කීවාය. ඇය එල්ල කළ චෝදනාව බරපතල එකක් විය.

“මම වෙනසක් කිරීමට එහි ගියා,” මැගී පැවසුවාය. “කවදාවත් ඒ තත්වයට පත්වනු ඇතැයි මම අපේක්ෂා කළේ නැහැ. අපි එහි සිටියේ මේ අය සතුටු කිරීමට සහ යමෙක් විසින් නටවන වඳුරන් වීමටයි.”

“තරඟකාරියන්ට සෑම විටම වේශ නිරූපණ කරගෙන ගවුම් පැළඳීමට සිද්ධ වුනා. උදෑසන ආහාරය පවා ඒ ආකාරයට යන්න උපදෙස් දී තිබුණෙ.

එක් සිදුවීමකින් පසු සංවිධායනය කල අයෙ​ක් උත්සවයකදී “කම්මැලි” වීම ගැන මැගීට සහ ඇගේ සම වයසේ මිතුරියන්ට බැණ වැදුණු බවත් ඇය ප්‍රකාශ කළාය.

තරඟකරුවන් යුගල හය දෙනෙකු පිරිමින්ගේ මේසවලට යොමු කළ රාත්‍රී භෝජන සංග්‍රහයකදී ඇය ඇගේ සීමාව ඉක්මවා ගිය බව ඇය පැවසුවාය. ලෝක රූ රැජන තරගයට ඔවුන්ගේ මූල්‍ය දායකත්වයට කෘතගුණ සැලකීමක් ලෙස ලෙස සවස් වරුවේ විනෝදවීම සඳහා තමන් ඇතුළු පිරිසට ඇරයුම් කළ බව මැගී ප්‍රකාශ කර තිබුණේ දැඩි ආවේගයෙනි.

“මේක හරිම වැරදියි. මම මෙහෙට ආවේ මිනිස්සුන්ට විනෝදාස්වාදය සපයන්න නෙවෙයි ඔවුන් මට මාව ගණිකාවක් වගේ හැඟීමක් ඇති කළා.” ඇය කීවාය.

“එක් අවස්ථාවක මම මගේ හැසිරීමට හේතු ගැන කතා කරන්න උත්සාහ කළා. නමුත් මේසයේ සිටි පිරිමින් ඒ කතාවට උනන්දුවක් නොදැක්වූ බව පැහැදිලි වුනා. එහි ප්‍රතිඵලය ලෙස මට අපහසුතාවයක් දැනුණු අමුතු කතා අහන්න වුනා.”

ජීවිතාරක්ෂකයෙකු, සර්ෆර්වරියක් සහ එංගලන්තයේ රූ රැජින වන මැගී පැවසුවේ ඇය ලෝක රූ රැජන තරගයට එක් වූයේ “අරමුණක් සහිත අලංකාරය” මූර්තිමත් කිරීමට බවත් එය එංගලන්ත රූ රැජන ලෙස ඇයගේ කැපවීම වූ බවත් ඇය අවධාරණය කළාය.

ඇය ජීවිතාරක්ෂිකාවක ලෙස CPR (හදිසියේ අකර්මණ්‍යවන හෘද පෙනහළු නැවත පණ ගැන්වීමේ ප්‍රථමාධාර) දැනුවත් කිරීමේ ව්‍යාපාරය ඉස්මතු කිරීමට ඇගේ වේදිකාව භාවිතා කළාය. තරුණ කාන්තාවන්ට ඔවුන්ගේ ස්වාභාවික සුන්දරත්වය වැළඳ ගැනීමට බල කිරීම සඳහා කෘතිම ආලෙපන තවරා හැඩ ගැන්වීම් නොකර තරඟවලට සහභාගී වී ඇත. නමුත් මිස් වර්ල්ඩ් හිදී, ඇයට මුලුමනින්ම කෘත්‍රිම බවක් දැනුණු අතර ඊට අනුකූල වීමට නොහැකි සේ ඇයගේ අභ්‍යන්තරය බලපෑම් කළ බව ඇය කීවාය.

“සදාචාරාත්මකව, මට එහි කොටසක් විය නොහැකියි.,” මැගී ටැබ්ලොයිඩ් පුවත්පතට පැවසුවාය.

මැගීගේ මෙම චෝදනාව​ට ප්‍රතිචාර දක්වමින්, ලෝක රූ රැජින සංවිධානයේ සභාපති සහ ප්‍රධාන විධායක නිලධාරී ජූලියා මෝර්ලි නිවේදනයක් නිකුත් කළාය. ඇය කීවේ මෙවැන්නකි.

“මේ මස මුලදී, මිලා මැගී ඇගේ මවගේ සෞඛ්‍ය තත්ත්වය සම්බන්ධයෙන් වාර්තා වූ පවුලේ හදිසි අවස්ථාවක් හේතුවෙන් තරඟයෙන් ඉවත් වන්නට ඉල්ලා සිටියා. අපි මිලාගේ තත්වයට අනුකම්පාවෙන් ප්‍රතිචාර දැක්වූවා පමණක නොවෙයි… ඇය සහ ඇගේ පවුලේ අයගේ යහපැවැත්මට මුල් තැන දෙමින් ඇයව එංගලන්තයට නැවත ඇරලවීමට වහාම කටයුතු කළා.”

‘අවාසනාවකට මෙන්, ඉන්දියාවේ ඇයගේ අත්දැකීම් සම්බන්ධයෙන් මිලා මැගී විසින් කරන ලදැයි කියන ව්‍යාජ සහ අපහාසාත්මක ප්‍රකාශ ඇතැම් එක්සත් රාජධානියේ මාධ්‍ය ආයතන ප්‍රකාශයට පත් කර ඇති බව අපගේ අවධානයට ලක්වුනා. මෙම ප්‍රකාශ සම්පූර්ණයෙන්ම පදනම් විරහිතයි. එය ඇය අප සමඟ ගත කළ කාලය පිළිබඳ යථාර්ථයට ගැලපෙන්නේ නෑ,” යනුවෙන් අදා​ල ප්‍රකාශයේ සඳහන් වේ.