අධිකරණයට අපහාස කරන කළැයි චෝදනා ලැබූ නීතිඥවරියගේ නඩුවට අභියාචනාධිකරණයෙන් තීන්දුවක්!

උසාවියට අපහාස කරන කළැයි කියමින් පුත්තලම මහාධිකරණයෙන් රිමාන්ඩ් බාරයට පත් කිරීමෙන් පසු අභියාචනාධිකරණ විසින් නොපමාව මුදා හරිනු ලැබු පුත්තලම මහාධිකරණ කලාපයේ රාජකාරී කරන නීතීඥ එස්.ඒ.පී. උදයංගනී වෙනුවෙන් ශ්‍රී ලංකා නීතිඥ සංයමය ගොනු කොට තිබූ රිට් පෙත්සමේ පාර්ශවකරුවන් අතර ඇතිවු එකඟත්වය මත නඩුව අවසන් කිරීමට අභියාචනාධිකරණය අද (02) තීරණය කළේය.

අභියාචනාධිකරණ වැඩබලන සභාපති විනිසුරු මොහොමඩ් ලෆාර් තාහීර් සහ ප්‍රියන්ත ප්‍රනාන්දු යන අයගෙන් සමන්විත අභියාචනාධිකරණ විනිසුරු මඩුල්ලක් හමුවේ පෙත්සම සලකා බැලණි.

පෙත්සම කැඳවන අවස්ථාවේදී වගඋත්තරකාර නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් මනෝහර ජයසිංහ කරුණු දක්වමින් පෙත්සම සම්බන්ධයෙන් පාර්ශවකරුවන් අතර එකඟත්වයක් වී ඇති හෙයින් අනුව නඩුකරය අවසන් කිරීමට හැකියාව ඇතැයි පැවසීය.

පෙත්සම්කාර පාර්ශ්වය වෙනුවෙන් නීතිඥ ජී.ජී. අරුල්ප්‍රගාසම්ගේ උපදෙස් මත ජනාධිපති නීතිඥවරුන් වන සාලිය පීරිස්, ෆයිසර් මුස්තාෆා ඇතුළු නීතිඥ මණ්ඩලයක් සමග පෙනී සිටි ජනාධිපති නීතීඥ ෆයිස් මුස්තාපා කරුණු දක්වමින් පෙත්සම්කාරිය අභියාචනාධිකරණයෙන් නිදහස් කර ඇති බැවින් නඩුකරය අවසන් කිරීමට තමන් කැමැත්ත පළ කරන්නෙ යැයි කීය.

ඒ අනුව දෙපැර්ශවයේ එකඟත්වය මත පෙත්සම අවසන් කිරීමට අධිකරණය තීරණය කළේය.

පෙත්සම්කාරිය වෙනුවෙන් නීතීඥ ජී.ජී. අරුල්ප්‍රගාසම්ගේ උපදෙස් මත නීතිඥවරුන් වන නිරංජන් අරූල්ප්‍රගාසම්, සේනානි දයාරත්න, ජනාධිපති නීතිඥවරුන් වන සාලිය පිරිස්, ෆයිසර් මුස්තාපා සමග ජනාධිපති නීතිඥ ෆයිස් මුස්තෆා පෙනී සිටියහ.