පිරමීඩ ජාවාරම් කර කෝටි 1000කට අධික මුදලක් වංචා කල මහාචාර්යවරයෙකුට අධිකරණයෙන් දුන් නියෝගය මෙන්න!

මාර්ගගත ක්‍රමය ඔස්සේ තරුණ තරුණියන්ට රැකියා දෙන බව පවසමින් මහා පරිමාණ පිරමීඩ ජාවාරමක් කර රුපියල් කෝටි 1000 කට අධික මුදලක් වංචා කරන ලදැයි චෝදනා එල්ල වී තිබෙන එම පිරමීඩ සමාගමේ සභාපති මහාචාර්යවරයා සහ ප්‍රධාන විධායක නිලධාරියා ලබන 12 වන දින තෙක් රිමාන්ඩ් භාරයේ තබන ලෙස අධිකරණය ඊයේ (02 වැනිදා) නියෝග කර ඇත.

ශ්‍රී ලංකා මහ බැංකුව විසින් තහනම් කර තිබෙන නීති විරෝධී පිරමීඩ ආයෝජන ව්‍යාපාරයක් පවත්වාගෙන යෑම සම්බන්ධයෙන් අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකය මගින් කරන ලද පුළුල් විමර්ශනයකදී අත්අඩංගුවට ගෙන තිබූ අදාළ පිරමීඩ සමාගමේ සභාපති ප්‍රධාන අධ්‍යක්ෂවරයා ලෙස කටයුතු කරන ලද මහාචාර්ය මංජුල රණසිංහ සහ ප්‍රධාන විධායක නිලධාරි අමිල විරාජ් ගලප්පත්ති එලෙස රිමාන්ඩ් භාරයේ තබන ලෙස කොළඹ ප්‍රධාන මහෙස්ත්‍රාත් තනුජා ලක්මාලි නියෝග කළාය.

මෙම මහා පරිමාණ පිරමීඩ ජාවාරමට සම්බන්ධ තවත් ප්‍රධාන පෙළේ සැකකරුවන් 07 දෙනකු පිළිබඳ වැඩිදුර විමර්ශන කරන බවද අපරාධ පරීක්ෂණ දෙපාර්තමේන්තුවේ නිලධාරීන් අධිකරණය වෙත දන්වා සිටියේය.

ෆේඩ් ඔබ් ප්‍රෝකෙයා නමැති මෙම පිරමීඩ සමාගමේ පිරමීඩ යෝජනා ක්‍රමවලට සහභාගී නොවන ලෙස දන්වමින් ශ්‍රී ලංකා මහ බැංකුව මගින් නිවේදන නිකුත් කර තිබූ බව ද අපරාධ පරීක්ෂණ දෙපාර්තමේන්තුවේ නිලධාරීන් අධිකරණය වෙත දන්වා සිටියේය.

මෙම පිරමීඩ සමාගමේ නියෝජිතයන් මාර්ගගත ක්‍රමය ඔස්සේ රැකියා දෙන බව පවසමින් දිවයින පුරා දේශන පවත්වා ඇති බවත්, එම දේශන 06 ක පැකේජය සඳහා එක් අයකුගෙන් රුපියල් 21, 500 ක මුදලක් අයකර තිබෙන බව අනාවරණ වී ඇතැයි දන්වා සිටි අපරාධ පරීක්ෂණ දෙපාර්තමේන්තුවේ නිලධාරීන් එලෙස දේශනවලට සහභාගී වූ අයැදුම්කරුවන්ගේ ගණන ලක්ෂ 05 ක් වීමෙන් අනතුරුව රැකියා දෙන බවට විවිධ මාධ්‍ය හරහා අසත්‍ය ප්‍රචාරයක් ගෙන ගොස් ඇතැයිද දන්වා සිටියේය.

සැකකරුවන් අදාළ ඇතැම් දේශන අන්තර්ජාලය හරහා පවත්වා ඇතැයිද දන්වා සිටි අපරාධ පරීක්ෂණ දෙපාර්තමේන්තුවේ නිලධාරීන් සැකකරුවන් භාවිත කරන ලද බැංකු ගිණුම් පිළිබඳ වැඩිදුර විමර්ශන පවත්වන බවද දන්වා සිටියේය.

මෙම නඩුවේ පළමු සැකකරු වන අදාළ පිරමීඩ සමාගමේ ප්‍රධාන විධායක නිලධාරිවරයා වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් කරුණු ඉදිරිපත් කරමින් පැමිණිල්ල වෙනුවෙන් පෙනී සිටි අපරාධ පරීක්ෂණ දෙපාර්තමේන්තුවේ නිලධාරීන් පවසන ආකාරයේ වරදක් වී නොමැති බවත්, අදාළ වරද වීමට පෙර තම සේවාදායකයා අත්අඩංගුවට ගෙන ඇතැයිද දන්වා සිටියේය.

මෙම සිද්ධියට අදාළ නඩුවේ තුන්වැනි සැකකාරිය ලෙසට අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් පිරමීඩ සමාගමේ අධ්‍යක්ෂවරියක සහ ලේකම්වරිය ලෙස කටයුතු කළ සිරිමල් දුරුවලාගේ සන්ධ්‍යා නමැති සැකකාරිය රුපියල් මිලියනය බැගින් වූ ශරීර ඇප 05 ක් මත මුදා හරින ලෙස නියෝග කළ ප්‍රධාන මහෙස්ත්‍රාත්වරිය, සැකකාරියට විදෙස් ගමන් තහනම් කරමින්ද, නියෝගයක් නිකුත් කළාය.

අදාළ පිරමීඩ සමාගමේ සභාපති මහාචාර්යවරයා සහ ප්‍රධාන විධායක නිලධාරිවරයා රිමාන්ඩ් භාරයේ තබන ලෙස නියෝග කළ ප්‍රධාන මහෙස්ත්‍රාත්වරිය, මෙම සිද්ධියට අදාළ අනෙකුත් සැකකරුවන් පිළිබඳ කඩිනමින් විමර්ශන පවත්වා ඔවුන් අත්අඩංගුවට ගන්නා ලෙසත්, විමර්ශනයේ ප්‍රගතිය අධිකරණයට වාර්තා කරන ලෙසත් අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකයට නියම කළාය.