හිටපු ජනපති රනිල්ට එරෙ​හි පෙත්සම් විභාගයට ශ්‍රේෂ්ඨාධිකරණය තීරණය කරයි!

ජනාධිපතිවරණය ප්‍රකාශයට පත් කිරීමෙන් පසු සුරා බදු පනතට පටහැනි අන්දමින් නව මත්පැන් බලපත්‍ර නිකුත් කිරීම මගින් මුදල් ඇමතිවරයා ලෙස හිටපු ජනාධිපති රනිල් වික්‍රමසිංහ ඇතුළු පිරිසක් රටේ ජනතාවගේ මූලික අයිතිවාසිකම් කඩ කර ඇති බවට ප්‍රකාශ කරන්නැයි ඉල්ලා ගොනු කළ පෙත්සම් දෙකක් විභාගයට ගැනීමට ශ්‍රේෂ්ඨාධිකරණය අද (03) තීරණය කර ඇති බව වාර්තා වේ.

ජනාධිපතිවරණය ප්‍රකාශයට පත්කළ 2024 ජූලි 26 වැනිදා සිට ජනාධිපතිවරණය පැවැත්වූ 2024 සැප්තැම්බර් 24 වැනිදා තෙක් මාස දෙකක කාලය තුළ නිකුත් කළ මත්පැන් බලපත්‍ර වලට අදාළ තොරතුරු සහ 2024 වසර තුළ අලුතින් නිකුත් කළ මත්පැන් බලපත්‍ර වලට අදාළ තොරතුරු අධිකරණයට ඉදිරිපත් කරන ලෙස ශ්‍රේෂ්ඨාධිකරණය සුරාබදු කොමසාරිස් ජනරාල්වරයාට වැඩිදුරටත් නියෝග කර ඇත.

ශ්‍රේෂ්ඨාධිකරණ විනිසුරුවරු යසන්ත කෝදාගොඩ, ජනක් ද සිල්වා, මහින්ද සමයවර්ධන යන අයගෙ​න් සමන්විත විනිසුරු මඩුල්ලක් හමුවේ පෙත්සම සලකා බැලුණි.

මාතලේ ප්‍රදේශයේ පදිංචි තංගවේලු ධනේන්දරාජා ඇතුළු පිරිසක් ගොනු කර තිබු පෙත්සමේ වගඋත්තරකරුවන් වශයෙන් හිටපු ජනාධිපති රනිල් වික්‍රමසිංහ සුරාබදු කොමසාරිස් ජනරාල් එම්.ඒ.ගුණසිරි, අතිරේක සුරාබදු කොමසාරිස් ඒ.එම්.පී.අරම්පල, නියෝජ්‍ය කොමසාරිස්වරුන් වන සී.ජේ.ඒ වීරක්කොඩි, යූ.ඩී.එන්. ජයවීර සහ මුදල අමාත්‍ය ලේකම් මහින්ද සිරිවර්ධන සහ, අල්ලස් කොමිසමේ සභාපතිවරයා ඇතුළු 39 දෙනකුට නම් කර තිබේ.

ජනාධිපතිවරණය ප්‍රකාශයට පත් කළ පසුගිය ජූලි 26 වැනිදා සිට ජනාධිපතිවරණ පැවැති සැප්තැම්බර් 21 වැනිදා අතර කාල සීමාව තුළ වගඋත්තරකරුවන් සුරාබදු පනතේ විධිවිධානයන්ට පටහැනිව යමින් මත්පැන්හල් බලපත්‍ර ගණනාවක් නිකුත් කර ඇතැයි සඳහන් කරන පෙත්සම්කරුවෝ අදාල බලපත්‍ර අහෝසි කරන්නැයි ඉල්ලා සිටියි.

පෙත්සම විභාගයට ගැනීමට අවසර ලබා දෙන්නැයිද පෙත්සම්කරුවෝ ඉල්ලා සිටි​යි

ඉදිරිපත් වු කරුණ සළකා බැලීමෙන් අනතුරව අදාළ නියෝග නිකුත් කළ ශ්‍රේෂ්ඨාධිකරණය පෙත්සම් විභාගයට ගැනීමට තීරණය කර ඇත.